Tímarit hjúkrunarfræðinga - 01.11.2009, Blaðsíða 23

Tímarit hjúkrunarfræ›inga – 5. tbl. 85. árg. 2009 19
„Mörgum fannst erfitt
fyrst að nota stutta
viðtalið.“
Eydís hefur einnig látið hjúkrunarfræðinga
svara spurningalista um viðhorf þeirra til
fjölskylduhjúkrunar. „Svo hef ég fylgst
með á deild og talað sérstaklega við þrjá
hjúkrunarfræðinga. Mörgum fannst erfitt
fyrst að nota stutta viðtalið og voru að
velta fyrir sér hvort þeir myndu ráða við
þetta. En þegar þeir svo fóru af stað gekk
það mjög vel,“ segir hún.
Athyglisvert er að hjúkrunarfræðingar
með langa reynslu virðast hafa meira
áhuga á að nota Calgary­aðferðirnar.
Hugsanlega er það vegna þess að ekki sé
nógu mikið af áhugaverðum verkefnum í
boði fyrir „reynslubolta“. Þetta kemur
meðal annars fram í rannsókn Maríu
Einarsdóttur deildarstjóra um símenntun
fyrir hjúkrunarfræðinga sem hún gerði
í mannauðsnámi sínu. Reynslumiklir
hjúkrunarfræðingar hafi því tekið vel í
fjölskylduhjúkrunina en hún gefur
starfinu meiri dýpt. Þetta hafi líka komið
í ljós á fyrrverandi lyflækningasviði II
sem var fyrsta sviðið til að byrja með
fjölskylduhjúkrun samkvæmt Calgary­
aðferðinni. Eydís segir þetta vera efni í nýja
rannsókn, að skipta hjúkrunarfræðingum
eftir starfsaldri og meta viðhorf til
og ánægju með fjölskylduhjúkrun í
mismunandi hópum.
Sumir hafa haft áhyggjur af því að
hjúkrunarfræðingar, sem stunda
fjölskylduhjúkrun, myndu „taka vinnu“
frá félagsráðgjafa. Í staðinn hefur komið í
ljós að félagsráðgjöfum finnst tilvísanir til
þeirra núna vera markvissari. Læknar eru
einnig jákvæðir og nota gjarnan afrakstur
fjölskylduviðtala. Þeir skoða til dæmis
fjölskyldutré og nota upplýsingar úr þeim.
Einn hjúkrunarfræðingur hafði orð á því
að ef til vill væri fjölskyldumeðferð framlag
hjúkrunar til þverfaglegs samstarfs.
Eydís er sannfærð um að fjölskylduhjúkrun
skipti máli. „Við eigum eftir að sjá
uppskeruna en ég held að flestir
hjúkrunarfræðingar muni sjá að þetta er
góð vinnuaðferð. Hjúkrunarfræðingunum
á göngudeild finnst þetta nú þegar,“
segir hún. „Við höfum lengi talið okkur
vera með fjölskyldumiðaða þjónustu
á geðsviði og þegar ákveðið var að
taka upp Calgary­líkanið greip fólk það
strax.“ Calgary­hugmyndafræðin var
heldur ekki alveg óþekkt á geðsviði.
„Svava Þorkelsdóttir kom á sínum tíma
úr meistaranámi í Kaliforníu með Calgary­
líkanið í farteskinu. Vitneskja hennar var
notuð að hluta til á geðsviðinu en þá var
ekki búið að undirbúa jarðveginn eins og
nú,“ segir Eydís.
„Hjúkrunarfræðingar
horfa oft á ný fagleg
verk efni sem viðbót. En
mark miðið er að verða
betri í því sem við erum
nú þegar að gera.“
Eydís segir að það hafi vissulega
verið mikil uppörvun fyrir innleiðinguna
á Landspítala að hafa ráðstefnu um
fjölskylduhjúkrun hér á landi í vor.
Heilmikið tengslanet varð til á ráðstefnunni
og finnst Eydísi alþjóðasamskipti
hafa aukist eftir ráðstefnuna. „Ég var
sjálf í undirbúningshópnum. Í kjölfar
bankahrunsins kom upp umræða um
hvort við þyrðum að halda áfram. Til
stóð um tíma að slá ráðstefnuna af. Sem
betur fer héldum við áfram en vissulega
var mikil óvissa. Við byrjuðum smátt en
svo kom í ljós að skráningin var meiri en
vonir stóðu til. Það var mikill stuðningur
í því að vinna með fyrirtækinu Congress
sem hefur mikla reynslu af því að halda
ráðstefnur,“ segir Eydís.
En mun kreppan hafa áhrif á upptöku
fjölskylduhjúkrunar á Landspítala?
Eydís segir að ekki sé talað um að
slá alla símenntun af en það þurfi að
forgangsraða betur. Fram undan verði
minna af því að senda fólk til útlanda
og í námsleyfi á launum ef námsefnið er
ekki beint tengt verkefnum á Landspítala.
Hins vegar hafi ekki verið uppi raddir um
að slá af námskeið í fjölskylduhjúkrun í
haust.
Því verður haldið áfram að þjálfa
hjúkrunarfræðinga í fjölskylduhjúkrun og
fella hana inn í starfsemi Landspítala.
„Ekki eru allir hjúkrunarfræðingar enn þá
fullsáttir við þetta. Hjúkrunarfræðingar
horfa oft á ný fagleg verkefni sem
viðbót. En markmiðið með öllum slíkum
verkefnum er að verða betri í því sem við
erum nú þegar að gera. Calgary­líkanið,
með sitt stutta meðferðarviðtal, miðar að
því að við getum notað það í tímaþröng.
Þær upplýsingar, sem safnast þannig, eru
gagnlegar og gera hjúkrunarfræðinga að
betri starfsmönnum á fjölskyldufundum
og í allri þverfaglegu vinnu,“ segir Eydís
að lokum.