Gerðir kirkjuþings - 01.01.2014, Qupperneq 29

29
• Tillaga til þingsályktunar um aðgerðir til að fjölga sóknarbörnum í þjóðkirkjunni
• Tillaga til þingsályktunar um uppbyggingu ferðaþjónustu í Skálholti
• Tillaga að starfsreglum um breyting á ýmsum starfsreglum.
• Tillaga til þingsályktunar um kaup og sölu fasteigna
• Tillaga til þingsályktunar um breyting á þjóðkirkjulögunum (setning í prestsembætti)
Kirkjuþing unga fólksins 2014
Kirkjuþing unga fólksins kemur saman árlega. Hlutverk þess er að ræða stöðu og hlutverk
ungs fólks í þjóðkirkjunni og í samfélagi kirkna um heim allan. Þar eiga sæti fulltrúar
prófastsdæma þjóðkirkjunnar og fulltrúar frá KFUM og KFUK með málfrelsi, tillögurétti
og atkvæðisrétti. Fulltrúarnir skulu vera á aldrinum 14 til 30 ára og skráðir í þjóðkirkjuna.
Kirkjuþing unga fólksins er vettvangur ungs fólks til að hafa áhrif á starfsemi kirkjunnar.
Kirkjuþing unga fólksins var haldið á Biskupsstofu laugardaginn 17. maí sl. Þóra Björg
Sigurðardóttir var kjörin forseti kirkjuþings unga fólksins. Samkvæmt starfsreglum um
kirkjuþing unga fólksins nr. 952/2009 skal kirkjuþingið kjósa einn fulltrúa á kirkjuþing
með málfrelsi og tillögurétti. Á þessu kirkjuþingi situr fyrrnefndur forseti kirkjuþings
unga fólksins.
Ályktanir kirkjuþings unga fólksins 2014
Þingsályktun um undirbúning á málum fyrir kirkjuþing unga fólksins
Kirkjuþing unga fólksins hefur nú verið haldið þrisvar sinnum samkvæmt starfsreglum
sem hið almenna kirkjuþing samþykkti 2010. Árið 2013 kom tillaga að nýjum starfsreglum
og eru þær í gildi í fyrsta skipti á þessu þingi 17. maí 2014.
Í 1. gr. starfsreglnanna kemur fram eftirfarandi: „Þingmál skulu hafa borist þingfulltrúum
a.m.k. fimm virkum dögum fyrir þingdag“. Illa hefur gengið að undirbúa þingmál með
þeim fyrirvara sem er tilgreindur í starfsreglum og viljum við með einhverjum hætti reyna
að bæta úr því til að stuðla að því að kirkjuþingsmál endurspegli sem best vilja, hugmyndir
og skoðanir ungs fólks í kirkjunni sem Kirkjuþing unga fólksins á að vera fulltrúi fyrir.
Við leggjum til að haldin séu leiðarþing í hverju prófastdæmi þar sem ungt fólk í kirkjunni
kemur saman, undirbýr mál og velur þau mál sem helst á þeim hvíla með góðum fyrirvara.
Við leggjum þetta til svo þingið geti betur starfað eftir þeim starfsreglum sem því er gert
að gera. Við leggjum til að búinn verði til rafrænn umræðuvettvangur fyrir ungt fólk til að
ræða um kirkjuna og samfélagið í heild. Þannig geti fleiri haft áhrif á málin sem tekin eru
fyrir á kirkjuþingi.
Þingsályktun um umhverfismál
Kirkjuþing unga fólksins skorar á kirkjuna að beita sér og vera sýnileg í umhverfismálum.
Við skorum á kirkjuna að láta rödd sína heyrast og vera samkvæm umhverfisstefnu
sinni í stórum málum sem hafa áhrif á stöðu ímynd þjóðarinnar og taki systurkirkjur
sínar á Norðurlöndum sér til fyrirmyndar. Kirkjur í Noregi eru t.d. með græn kirkjunet.
Umhverfismál eru heita málið í nútímanum og við viljum sjá þjóðkirkjuna sem leiðandi
afl í stefnumótun um umhverfismál.