Morgunblaðið - 15.12.1991, Blaðsíða 35

MORGUNBLAÐIÐ SAMSAFNIÐ SUNNUDAGUR 15. DESEMBER 1991
C 35
Þessi langíerðabifreið þótti byltingarkennd með ekkert „húdd“.
Austurbæjarbíó þótti eitt glæsi-
legasta samkomuhús landsins.
Iðnaðarmenn leggja síðustu
hönd á salinn áður en kvik-
myndahúsið var opnað fyrir
almenning.
SÍMTALID . . .
ER VIÐ ÓLAFHÓLM, HREINGERNINGAMANN
Viðsjárverð málning
19017
„Halló?”
- Góðan daginn, við hvern tata
ég með leyfi?
„Ég heiti Ólafur Hólm.”
- Komdu sæll, þetta er á
Morgunblaðinu, Guðrún Guðlaugs-
dóttir sem talar, ég ætlaði að spyrj-
ast lítils háttar fyrir um hrein-
gerningaþjónustuna sem þið eruð
með Hólmbræður.
„Já, það er velkomið.”
- Er þessi þjónusta meira eða
minna notuð nú en árið 1952, þeg-
ar fyrirtækið var stofnað?
„Núna er málningin tiltölulega
betri en hún var þá. Fólk á því létt-
ara með að vinna slík verk sjálft
núna. Áður fyrr var málningin svo
viðsjárverð.”
- Hvernig þá viðsjárverð, fór
hún kannski af?
„Nei, en hún var svo olíuborin
að það vildu koma taumar þegar
veggirnir voru þvegnir. Auk þess
var olíukynding í húsum,sem jók
óhreinindi að miklum mun. Þetta
breyttist þegar hitaveitan kom.
Hins vegar er sarns konar mengun
frá bílum í dag, t.d. við Laugaveg-
inn. Þar sem slíku er til að dreifa
getur verið erfitt að gera hreina
veggi, þó málningin í dag-sé miklu
betri en hún var áður fyrr. Oft
bregður fólk á það
ráð að mála frekar
en gera hreint, því
það vilja koma
taumar ef farið er
að þvo. Það er orð-
ið svo miklu léttara
á mála núna.”
- Svo þið eruð
miklu minna í
hreingerningum
núna en áður?
„Okkar verksvið
hefur dálítið
breyst. Það má
segja að núna
séum við meira í
hreingerningu á
teppum. Helst
gerum við hreina
veggi og loft fyrir fólk sem er að
flytja.”
- Hvað kostar að gera hrein
teppi?
„Það kostar núna 130 krónur á
hvern gólffermetra og þá er allt
innifalið.”
- Er alveg sama hvernig teppið
er?
„Já, nema það sé mjög óhreint,
t.d. í verslunum. Þá tökum við
meira - en við segjum frá því áður
en við byrjum.”
- En ef þið gerið hreina veggi?
„Ef við tökum loft og veggi þá
tökum við 170 krónur á fermetra.
En 150 ef íbúðin er tóm. Þá gerum
við hreina veggi, loft, glugga, ofna
og hurðir.”
- Með hveiju gerið þið hreint?
„Við erum með platta og síðan
erum við með úðara og sprautum
á veggina.”
- Hvað eru plattar?
„Platti er áhald sem ég fann upp
sjálfur fyrir 30 árum. Þá setti ég
handklæði á 30x20 sm hreyfanleg-
an flöt sem ég setti á langt skaft.
Þetta hefur reynst mjög þægilegt
áhald til hreingerninga.”
- Hefur þú á tilfinningunni að
dregið hafi úr hreingerningum fyrir
jólin?
„Ég veit að svo er. Þá voru álíka
margir í hreingerningum og nú er
og þó voru heimilin
vafalaust færri.
Það fer líka eftir
því hvemig árar
hjá fólki hvað mik-
ið er að gera. Það
dregst saman þeg-
ar illa árar.”
- Og finnið þið
það núna?
„Já, þetta er við-
kvæmur mark-
aður. Um leið og
samdráttur er þá
minnkar hjá okk-
ur.”
- Jæja, þakka
þér fyrir.
„Já, vertu
blessuð.”
Ólafur Hólm
HVAR
ERU ÞAU
WÚ?
ÁRNI í ÁRNABÚÐ
Sinnir manneskju-
legum störfum
Þeir eru margir Vesturbæingarnir sem muna eftir honum Árna
Einarssyni í Árnabúð á horni Fálkagötu og Tómasarhaga þar sem
hann verslaði við góðan orðstír í tuttugu og átta ár. Fyrir þrem-
ur og hálfu ári hætti Árni verslunarrekstri.
Um það leyti sem Árni lét af
kaupskap sýndi Ríkissjón-
varpið viðtalsþátt við Árna. Ýmsir
viðskiptavinir, þ.á m. Vigdís Finn-
bogadóttir forseti, lýstu harmi sín-
um yfir að Árni hyrfi á braut.
Kaupmaðurinn upplýsti umsjón-
armann þáttarins um hann væri
að fara í „manneskjuleg störf’.
Hver skyldu þau nú vera?
Blaðamanni Morgunblaðsins
var tjáð af persónum sem láta sér
annt um heilsu sína og mataræði
að Árni seldi um helgar í Kola-
portinu vörur þénanlegar íslenskri
manneldis- og neyslustefnu,
þ.e.a.s. ávexti og grænmeti. En
varla nægir það svo lúsiðnum og
starfsömum manni sem Árna að
selja meðborgurunum gras tvo
daga í viku?
Morgunblaðið hafði fregnir af
því að Árni væri starfandi á ljós-
ritunarstofunni Ljósborg/Ljósfell.
Eigandinn Lilja Ásgeirsdóttir
veitti blaðamanni þær upplýsingar
að „hann Árni minn” (þau er gift.
innsk. blm.) ynni einungis hjá
henni í hlutastarfi en væri af-
greiðslutæknir hálfan daginn í
versluninni Björk í Bankastræti.
Morgunblaðsmenn fóru í búðar-
ferð. Mikið rétt, við afgreiðslu-
borðið stóð Ámi í Árnabúð. „Hvað
get ég gert fyrir þig?” spyr Árni.
Hvað getur Árni gert? — Það verð-
ur að segjast að það góss sem
Árni selur getur tæpast talist
hagfellt hinni íslensku heilbrigð-
isáætlun. Verslunin Björk var
áður kunn sem verslunin Bristol.
Þarna virðist flest fáanlegt til tób-
aksneyslu, reykjarpípur, kveikjar-
ar, sígarettur, vindlar, píputóbak,
néftóbak, munntóbak. Morgun-
blaðsmanni er kunnugt um að í
þessari verslun eru seldar allar
tóbakstegundir sem ÁTVR flytur
inn og þar á ofan fjölmargar sem
eigandinn, Sölvi Oskarsson, sér-
pantar. Auk þess er á boðstólum
ijölbreytt úrval af varningi til
áfengisdrykkju; glös, vasapelar,
sjússamælar og kokteilhristarar,
bæði löggiltir til veitingareksturs
og einnig til einkanota, ferðabarir
o.s.frv.
— Árni, eru þetta hin „mann-
eskjulegu störf’; að ýta undir
drykkjuskap Islendinga?
„Það er mjög manneskjulegt
að gleðja mannsins hjarta eins og
hóflega drukkið vín gerir. Og við
stuðlum að hófsemi og betri
drykkjusiðum. Viltu heldur að
menn drekki ómælt af stút en úr
glasi? Er ekki betra að blanda
kokteil eftir máli en að drekka
óblandað ómælt? Þær tækifæris-
gafir sem þú kaupir hér eru sáras-
aklausar. Við seljum ekki fylling-
una. Hana geturðu keypt í öðrum
sérverslunum í opinberri eigu.”
— En tóbakið, sem veldur
neytendum heilsutjóni og er
mörgum til ama og óþæginda?
„Eg er fyrst og fremst að svara
eftirspurn og sel tóbak bæði
hreint og blandað frá öllum heims-
hornum. — Ég vil taka það skýrt
fram að við seljum ekki ungling-
um undir lögaldri tóbak af neinu
tagi. — Okkar viðskiptavinir eru
flestir ákveðnir reykingamenn
sem hafa það að leiðarljósi að
góðir hlutir séu til að njóta þeirra.
Mér er það stórum til efs að þeir
segi skilið við tóbakið úr því þeir
hafa haldið tryggð við það þrátt
fyrir allan áróður og boð og bönn
hin síðari ár.”
Það dregur ský fyrir sólu; einn
viðskiptavinur Árna svælir ný-
keyptan varning með sýnilegri
velþóknun úr pípusterti.
— Má virkilega reykja hérna í
versluninni?
„Þó það nú væri. Við erum að
selja varning fyrir minnihlutahóp
sem hefur átt undir högg að
sækja. Sumir hafa jafnvel orðið
að hrekjast með sínar pípur og
vindla út í garð eða út á svalir.
Ég held að það sem gerist næst
verði að menn hópi sig saman á
sérstakar reykstofur þar sem þeir
fá að reykja sína pípu og vindla
í friði. Mér fínnst það megi ekki
minna vera en að þeir fái að reykja
í griðum í sinni sérverslun.”