Skólavarðan - 01.08.2004, Blaðsíða 3
3
FORMANNSPISTILL
SKÓLAVARÐAN 6.TBL. 4. ÁRG. 2004
Þegar líður að hausti er viss eftirvænting í loftinu. Hún tengist
gjarnan því að skólar taka aftur til starfa eftir sumarfrí nemenda
og kennara. Lífið og tilveran taka á sig annan blæ eftir verslun-
armannahelgina, verkefni haustsins og vetrarins eru í sjónmáli.
Hjá sumum örlar á eftirsjá eftir fríinu og frelsinu sem því fylgir að
vera ekki bundinn klukku og fyrirfram ákveðnum verkefnum dag-
inn út og inn. Kannski verður eftirsjáin í haust óvenju mikil vegna
þess að sumarið hefur leikið við okkur Íslendinga, hlýja og logn
dögum saman, oft líka sól - er hægt að biðja um það betra?
Ég geri ráð fyrir að í hugum félagsmanna Kennarasambands-
ins einkennist haustið þó fyrst og fremst af væntingum til nýrra
kjarasamninga sem framundan eru. Allt bendir til þess að kjara-
bætur verði ekki auðsóttar nú frekar en endranær. Það hefur
komið berlega í ljós í samningaviðræðum vegna grunnskólans,
enda liggur í loftinu að verkfall skelli á síðari hluta september.
Samningaviðræður hafa legið niðri í sumar en eru að hefjast að
nýju um þessar mundir. Vonandi leggja aðilar allt undir til að ná
samningum sem fyrst. Sveitarstjórnarmenn verða að opna augu
sín fyrir því að það verður að stíga stórt skref til að bæta kjör
kennara í þessum samningum. Ennfremur verður að nást um það
víðtæk sátt í þjóðfélaginu.
Félag leikskólakennara hefur gert áætlun um viðræður við
Launanefnd sveitarfélaga en kjarasamningur vegna leikskóla
rennur út í lok ágúst. Í viðræðuáætlun kemur fram að verði ekki
búið að ná samkomulagi fyrir lok september verði óskað eftir að
ríkissáttasemjari taki við stjórn viðræðna. Gera má ráð fyrir að
staða í samningamálum vegna grunnskólans hafi að verulegu
leyti áhrif á samningaviðræður vegna leikskólans. Áherslur í
kröfugerð FL eru ekki ósvipaðar áherslum grunnskóla og skal þar
fyrst og fremst nefna verulega hækkun grunnlauna auk ýmiss
konar samræmingar við aðra kennarahópa.
Væntanlegir kjarasamningar félaga innan KÍ eru þeir fyrstu
eftir að leikskólakennarar gengu til liðs við Kennarasambandið.
Nýtt umhverfi og nýir samherjar vekja vissulega væntingar og
vonir í hugum leikskólakennara. Kjarasamningarnir eru einnig
þeir fyrstu þar sem tími og ráðrúm gafst til að undirbúa í samein-
ingu og setja fram sameiginlegar áherslur allra félagsmanna KÍ,
sem öll félögin standa á bak við. Það hlýtur að verða til þess að
auka samhug, samstöðu og stuðning milli kennarahópa á ólíkum
skólastigum. Í því sambandi vil ég sérstaklega minna á það mark-
mið KÍ að byrjunarlaun kennara í leik-, grunn-, framhalds- og tón-
listarskólum verði sambærileg við byrjunarlaun opinberra starfs-
manna með sambærilega menntun og ábyrgð í starfi.
Um þetta stefnumál þarf að standa saman af einurð og festu
og hvika hvergi fyrr en markinu er náð. Hvert og eitt félag verð-
ur að styðja þann hóp sem í sviðsljósinu er hverju sinni, grunn-
skólakennara fyrst, leikskólakennara næst og svo koll af kolli,
en samningar tónlistar- og framhaldsskólakennara losna síðar í
haust. Þetta er mjög mikilvægt og styrkir okkur öll í senn, bæði
inn á við og út á við.
Því segi ég: Allir saman nú, einn, tveir, þrír, en við ætlum ekki
að vera þæg og góð í orðsins fyllstu merkingu eins og segir í text-
anum og einhver gæti ályktað eða vonað. Við ætlum að þjappa
okkur saman og styðja hvert annað í því að bæta kjör kennara
hjá vorri þjóð.
Björg Bjarnadóttir
Björg Bjarnadóttir
Allir saman nú,
einn, tveir, þrír