Fréttabréf Ættfræðifélagsins - 01.01.1992, Blaðsíða 1
FRETTABREF
ÆTTFRÆÐIFELAGSINS
1. tölublað
10. árgangur.
Félagsfundur var haldinn í Ættfræðifélaginu lO.desember
1991 á Hótel Lind.
Formaður setti fundinn og stjórnaði honum. Ræðumaður var Inga
Huld Hákonardóttir, sem vinnur að yfirlitsriti þar sem lýst er á
breiðum grundvelli opinberum viðhorfum til hjónabanda, ástamála
og barneigna frá þjóðveldisöld fram undir okkar tíma með
Stóradóm í brennipunkti.
Hún rakti nokkrar sögur um meinleg örlög frá fyrri öldum.
Meðal annars sagði hún frá frægu sifjaspellamáli sem leiddi til
aftöku Þórdísar Halldórsdóttur, Sólheimum í Sæmundarhlíð í
Skagafirði.
Hún ól barn árið 1608 og hélt því fram fullum fetum að það
væri eingetið, enda hafði hún fáum mánuðum áður svarið opinberan
eið að því að hún væri ósnortin af nokkrum karlmanni. Þórdís var
ógift og bjó hjá systur sinni Bergljótu og manni hennar, Tómasi
Böðvarssyni, í Sæmundarhlíð. Voru þær systur skyldar og tengdar
helsta fyrirfólki landsins.
Málarekstur stóð í tíu ár, en loks komst upp að Þórdís
hafði átt barnið með systurmanni sínum. Hann flúði land, en
Þórdís var ein af fyrstu konunum sem endaði líf sitt á botni
Drekkingarhyls.
Einnig sagði hún frá Þórði Vídalín og kvennamálum hans.
Þórður var bróðir ræðuskörungsins Jóns Vídalíns, og
skólameistari í Skálholti, hámenntaður í ýmsum greinum, en vegna
drykkju hrökklaðist hann austur í Hornafjörð. Hann gekk aldrei í
hjónaband, en ýmsar konur kenndu honum börn. Tregur var hann að
meðganga,
ýmist sór fyrir börnin eða hummaði málin fram af sér. Því fór
sem fór fyrir Helgu Magnúsdóttur frá Þórólfsdal í Lóni. Hún var
ráðskona hjá Þórði sem var fimmtán árum
eldri en hún og miklu menntaðri, sigldur og heimsvanur.
Þegar hún varð barnshafandi af hans völdum fór gamanið að
grána. Svo virðist sem hann hafi ekki viljað styðja hana í einu
né neinu. Hún ákvað að leyna fæðingunni og bera barnið út, án
þess að nokkur fengi um það að vita. Þetta játaði hún á
héraðsþingi að Holtum í Hornafirði 31. maí 1709, og var henni
drekkt á Alþingi sama sumar.
Enginn veit hvað Þórður hafðist að á meðan barnsmóðir hans
tók síðustu andköfin í hrollköldu vatninu. Máski sat hann í
hlýjunni heima á bæ sínum í Skaftafellssýslu og saup á
strandreknu koníaki sér til hugarléttis.
Formaður þakkaði fyrirlesara, og í kaffihléi spunnust
fjörugar umræður um efnið.
ÆTTFRÆÐIFÉLAGIÐ ÓSKAR FÉLÖGUM SÍNUM ÁRS OG FRIÐAR.