Fréttabréf Siglfirðingafélagsins í Reykjavík og nágrenni - okt. 2012, Blaðsíða 5
5
Þórarinn Hannesson er upphafsmaður að Ljóðasetri
Íslands á Siglufirði. Þórarinn flutti til Siglufjarðar 1993,
„elti ástina“ eins og hann segir, en hann er giftur Kristínu
Önnu Guðmundsdóttur, dóttur Elínar Önnu Gestsdóttur
og Guðmundar Skarphéðinssonar. Þórarinn er menntaður
íþróttakennari og starfar sem slíkur ásamt því að kenna
fleiri fög við Grunnskóla Fjallabyggðar.
Fyrir nokkrum árum blés hann til ljóðakvölds á Siglu-
firði „til að lífga upp á menningarlífið á staðnum,“ segir
hann. Þessi viðburður heppnaðist það vel að áfram var
haldið. Næstu tvo vetur voru haldin átta ljóðakvöld þar
sem ýmsir lesarar komu fram og fluttu efni úr ýmsum
áttum. Ánægjulegt var þegar tvö „skúffuskáld“, þeir Páll
Helgason og Sigurður Helgi Sigurðsson, lásu úr verkum
sínum en þau stóðust fyllilega samanburð við útgefið efni
ýmissa landsþekktra skálda.
Þórarinn hefur staðið fyrir þriggja daga ljóðahátíð á
Siglufirði á hverju ári frá 2007. Þar hafa ýmsir heimamenn
komið fram auk þekktra skálda t.d. Þórarinn Eldjárn,
Aðalsteinn Ásberg Sigurðsson, Sigurbjörg Þrastardóttir
(dóttir Þrastar Stefánssonar), Ingi Steinar Gunnlaugsson
(sonur Gunnlaugs Hjálmarssonar) og Kristján Kristjánsson
bókaútgefandi (sonur Kristjáns Rögnvaldssonar skipstjóra).
Ingunn Snædal, af Fljótsdalshéraði, var ein af þeim sem
sótti ljóðahátíðina heim í ár en hún er eitt af vinsælustu
ungskáldum landsins. Annar góður gestur var Sigurður
Skúlason leikari, sem er líklega okkar besti upplesari í dag.
Hann sýndi leikþátt úr verkum Shakespears.
Frú Vigdís Finnbogadóttir vígði svo Ljóðasetur Íslands
þann 8. júlí 2011 og hefur það verið vel sótt og vakið mikla
athygli. Þar má nú finna ýmislegt sem tengist íslenskum
kveðskap sem og siglfirskum. Afkomendur Guðlaugs
„Laugja pósts“ afhentu Þórarni t.d. ýmis gögn sem Laugji
skildi eftir sig. Upp úr þessum gögnum samdi Þórarinn
leikþátt um Laugja auk þess að semja tvö lög við ljóð hans.
Leikþátturinn var frumsýndur á ljóðahátíðinni 2011.
Þórarin yrkir einnig sjálfur og þriðja ljóðabók hans,
Nýr dagur, kom út í sumar. Bókaforlagið Ugla gaf út en
Jónas Ragnarsson var Þórarni mikil stoð og stytta við
undirbúning útgáfunnar.
Þórarinn kemur og les upp úr nýju bókinni á upp-
lestrarkvöldi Siglfirðingafélagsins í nóvember. Þórarinn
hefur líka tekið saman siglfirskar gamansögur. Komin
eru út þrjú bindi með 50 sögum í hverju hefti og stefnir
Þórarinn að því að mæta með fjórða heftið glóðvolgt úr
prentvélunum á upplestrarkvöldið.
Þórarinn vill að lokum færa Siglfirðingafélaginu og
Vildarvinum Siglufjarðar kærar þakkir fyrir þann stuðning
sem þessi félög hafa veitt Ljóðasetrinu.
á Siglufirði
Ljóðasetur Íslands
Vigdís Finnbogadóttir og Þórarinn Hannesson
við vígslu Ljóðasetursins 8. júlí 2011.
Guito Thomas, Þorsteinn Sveinsson og Þórarinn flytja lög
Þórarins við ljóð Ingunnar Snædal á ljóðahátíðinni 2012.