Veðráttan - 01.06.1999, Side 1

ISSN 0258-3836
VEÐRÁTTAN 1999
MÁNAÐARYFIRLIT SAMIÐ Á VEÐURSTOFU ÍSLANDS
Júní
Tíðarfarið í mánuðinum var rysjótt einkum á sunnan- og vestanverðu landinu þar sem var
úrkomusamt og svalt og gróður fór seint af stað. Norðan til var hlýrra en kal var víða í túnum.
Snjór var óvenju lengi í fjöllum ofan byggða.
I byrjun mánaðarins var norðaustlæg átt og fremur kalt en hlýnaði fljótt þegar smá lægð myndaðist
suðvestur af landinu þ. 2. og vindátt snerist til austurs og suðausturs. Skýjað var um allt land og
víða súld eða rigning við ströndina, einkum þ. 3. þegar lægðin þokaðist austur með suðurströndinni.
Þ. 4. létti smám saman til um leið og hæðarhryggur sunnan úr hafi þokaðist austur yfir landið og
var hæg vestlæg átt næsta dag og skúrir vestanlands.
Dagana 6.-13. var fremur milt og vætusamt á landinu og suðlægar áttir ríkjandi. Háþrýstisvæði
var vestur af Bretlandseyjum og lægðir eða lægðardrög á sunnanverðu Grænlandshafi. Vætusamt
var við suður- og suðvesturströndina en þurrt og bjart að mestu fyrir norðan og austan. Úrkomusvæði
var yfir vestanverðu landinu þ. 7. og annað þ. 8. en þurrt hélst um allt austanvert landið. Aðfaranótt
þ. 9. létti til um stundarsakir á vestanverðu landinu en fljótlega fór að súlda og var þokumóða við
suðurströndina. Þ. 10. dýpkaði lægð við Hvarf og þokaðist úrkomusvæði frá henni í átt til landsins.
Herti þá sunnanáttina og hlýnaði og var sá 11. hlýjasti dagur mánaðarins að tiltölu. Talsvert rigndi
á sunnan- og vestanverðu landinu, en þurrt var að mestu fyrir norðan og austan, nema við ströndina,
þar voru skúrir. Þ. 13. lægði að mestu um allt land.
Dagana 14.-19. var fremur svalt og voru vestlægar áttir ríkjandi. Lægðardrög voru á hreyfingu
austur yfir land fyrstu tvo dagana og var norðan kalsarigning fyrir norðan og sums staðar slydda til
fjalla en vestanátt og skúrir suðvestanlands. Að morgni þ. 16. létti til um stundarsakir á landinu
nema við norðausturströndina, þar var norðvestan strekkingur og skúrir. Aðfaranótt 17. júní var
vaxandi lægð við Hvarf á leið norðaustur og fór að rigna frá henni í allhvassri suðaustanátt um allt
vestanvert landið upp úr hádegi en úrkomulítið var austan til. I kjölfarið fylgdi vestanátt með
skúrum og rigndi sums staðar á Norðurlandi næsta dag og einnig þ. 19. þegar lægðardrag þokaðist
suður landið. Kaldast að tiltölu var á þessu tímabili.
Þ. 20. létti til um allt land og hægðarhryggur sunnan úr hafí þokaðist austur yfir land.
Dagana 21.-23. var sunnan strekkingur á vestanverðu landinu en hægari suðvestanátt um
austanvert landið. Súld var með köflum við suður- og vesturströndina og víða til fjalla, en á láglendi
annars staðar var úrkomulítið, þurrt og sums staðar léttskýjað.
Síðdegis þ. 24. snerist vindátt til austurs um leið og vaxandi lægð fór austur um haf fyrir sunnan
land. Stíf austanátt var við suðurströndina þ. 25. og rigning í flestum landshlutum.
Lægðin fjarlægðist og grynntist næsta dag og það sem eftir lifði mánaðarins var hæð fyrir
norðan land og lægð yfir Bretlandseyjum. A landinu var hæg austnorðaustlæg átt. Vætusamt og
svalt var við austur- og norðurströndina en úrkomulítið á sunnan- og vestanverðu landinu og stundum
léttskýjað. Þokubakkar voru sums staðar við ströndina. Síðustu tvo daga mánaðarins lægði og létti
til víða og hlýnaði þá verulega.
Loftvægi var 3,6 mb undir meðaltali áranna 1931-1960, frá því að vera 4,4 mb undir í Sth að
vera 2,5 mb undir í Vm. Hæst stóð loftvog 1030,1 mb í Akn þ. 11. kl. 9 og lægst 987,1 mb í Blnv
þ. 18. kl. 12.
(41)