Nesfréttir - 01.04.2022, Page 20

20 Nesfrétt ir
Það er af sem áður var, þegar Seltjarnarnes þótti til
fyrirmyndar þegar kom að rekstri og þjónustu við íbúa.
Vissir þú til dæmis að bærinn okkar hefur verið rekinn með
miklum og sívaxandi halla undanfarin ár? Skuldir á íbúa
hafa aukist úr 350 þúsund kr. árið 2014 í 1,3 milljónir árið
2021. Það er afleitur árangur og ekki skrítið að hver höndin
sé uppi á móti annarri í Sjálfstæðisflokknum sem farið
hefur með öll völd hér á Nesinu á þessu hnignunarskeiði.
Ég er nútímakona með þeim hætti að ég rek bæði eigið
fyrirtæki og heimili. Þess vegna treysti ég mér vel til þess að
fullyrða, að hallarekstur og skuldasöfnun verður að stöðva
ef bærinn á að halda sjálfstæði sínu. Viljum við virkilega að
vandinn þróist áfram og niðurstaðan verði stækkun á Vesturbæ Reykjavíkur?
Kannski þarf meira af hyggjuviti okkar mæðranna sem tökumst á við
margháttuð verkefni og viljum gera það vel? Ég heiti því allavega að gera mitt
besta fyrir fallega bæinn minn. Hann á það skilið að komast aftur í fremstu röð.
Þegar ég flutti á Seltjarnarnesið fyrir rúmum áratug leit ég þannig á að með
þeirri ákvörðun væri ég að tryggja börnunum mínum góða menntun, vandað
tómstundanám og öruggt samfélag að búa í.
Ég var stolt og státaði mig gjarnan af því hversu góð þjónusta væri í bænum.
Þá var Seltjarnarnes með hæstu tómstundastyrkina á landinu, boðið var upp
á hafragraut á morgnana í grunnskólanum þar sem foreldrar, ömmur og afar
gátu setið með börnunum og átt gæðastund fyrir skóla og almennt góðan
mat í matartímum. Þjónustan á leikskólanum og skólum var til fyrirmyndar,
þótt stundum hefði þurft meira fjármagn til viðhalds og endurbóta. Á öllum
skólastigum vann fagfólk sem brennur fyrir starfið og það gaf af sér.
Þess vegna er hnignun undanfarinna ára svo sár og áberandi. Sífelldur
niðurskurður sem bitnar á smáu sem stóru og leiðir til lakari lífsgæða og
minni stemningar meðal bæjarbúa. Margir kennarar lýsa yfir óánægju sinni
með starfsumhverfið eins og það er í dag, enda erfitt að blómstra í starfi þegar
aðbúnaður og umhverfi er þannig að sífellt sé verið að herða sultarólina. Það
bitnar á gæðum kennslunnar og að allir fái jöfn tækifæri til menntunar.
Maturinn í skólunum stendur ekki lengur undir væntingum, börn frá
efnaminni heimilum fá ekki lengur afgreiðslu í skólamötuneytinu og ekki hefur
tekist að standa við loforð um leikskólapláss frá tólf mánaða aldri. Það þarf að
ganga í öll þessi verk til þess að endurheimta traust bæði foreldra og fagfólks. Til
dæmis er tómstundastyrkurinn hinn sami og árið 2015, þótt verðlag hafi hækkað
mikið. Styrkurinn ætti að vera um 65 þúsund krónur. Og þangað ætlum við.
Sem rekstrarmanneskja finnst mér merkilegast, að þrátt fyrir allan
niðurskurðinn og skerta þjónustu halda skuldirnar áfram að aukast. Ég held að
hvert einasta heimili með börn finni fyrir þrengingunum sem sveitarfélagið er í.
Það er því augljóst að dæmið gengur ekki upp. Það kostar meira að reka
bæinn okkar. Við erum að borga fyrir að halda honum gangandi á þjónustustigi
sem við sættum okkur ekki við. Allt tal nýrra fulltrúa Sjálfstæðisflokksins um
óbreytt útsvar eða lækkað er bara ávísun á frekari erfiðleika og verri þjónustu.
Við viljum frekar meiri gæði og fá það sem borgað er fyrir.
Ég er stoltur Seltirningur og elska bæinn minn. Ég er ekki ein um það að
finnast að margt mætti betur fara í bænum okkar. Ég hef raunar heyrt í mörgum
bæjarbúum sem telja undanfarin ár hafi fremur einkennst af afturför frekar en
framförum. Það auðvitað gengur ekki. Þess vegna gat ég ekki skorast undan
að láta til mín taka þegar Framtíðarhópurinn hóf samtal um framfaramál á
Seltjarnarnesi.
Að baki Framtíðinni stendur hópur Seltirninga með ólíka reynslu og
bakgrunn, sem telur að með kjarki, gleði og nútímalegum stjórnunaraðferðum
megi móta betra samfélag á Nesinu. Framtíðin býður fram lista til bæjarstjórnar
á Seltjarnarnesi í kosningunum 14. maí 2022.

Áslaug Ragnarsdóttir framkvæmdastjóri og frambjóðandi í 2. sæti á
lista Framtíðarinnar.
Viljum við sjálfstætt
Seltjarnarnes eða
stærri Vesturbæ?
Áslaug
Ragnarsdóttir.
Um og í kringum aldamótin síðustu hafði
Seltjarnarnesbær á sér sterka ímynd og var miðbænum
með Eiðistorg í broddi fylkingar oft lýst af nágrönnunum
í Reykjavík sem stássstofu sveitarfélagsins. Nú er öldin
önnur. Á Eiðistorgi hríðlekurinnandyra í almenningi
sem notaður er til samkomuhalds. Torgið sem ætti að
vera iðandi verslunar­ og þjónustumiðja, minnir helst á
draugabæ þar sem ljósin eru slökkt og neglt hefur verið
fyrir glugga. Bókasafnið, menningarstofnun bæjarsins,
er vel falið og megin inngangur þess í gegnum sérrými
verslunarhúsnæðis. Austurströnd er lífvana rými og tengja
fæstir hana við miðbæinn þó þar sé að finna miðstöð
stjórnsýslu og framlínuþjónustu bæjarins.
Aðkoman inn í miðbæinn er jafnframt aðkoman inn í bæjarfélagið. Lítill
metnaður hefur verið lagður í hönnun svæðisins þ.e. að gera aðkomu og ásýnd
bæjarins sem besta en grjóthleðsla við bæjarmörkin með skildi Seltjarnarness
er eina atrennan til þessa. Aðdráttarafl miðbæjarsvæðisins sem viðkomustaður
er lítið, hvort sem er fyrir íbúa eða gesti, og því eru forsendur fyrir hverskonar
rekstri veikar og hvati verslunar­ og þjónustuaðila til að byggja upp starfsemi
sína því lítill sem enginn. Áherslan er auk þess á umferð akandi umferð sem
einnig gengur erfiðlega að hemja hraðann á. Því víkur mannlífið.
Sterka hugmyndafræði hefur skort um langa hríð um uppbyggingu á miðbæ
Seltjarnarness sem endurspeglast í því sem virðist vera tilviljanakenndar
skipulagsákvarðanir og metnaðarlaus umhverfismótun. Ábyrgðin liggur víða,
en þó helst hjá sveitarstjórn bæjarins sem ber ábyrgð á að skipulag sé hugsað
til langs tíma og útfært með almannahag, umhverfi, og öflug rekstrarskilyrði
að leiðarljósi. Grundvallargæði miðbæjar felast að miklu leyti í því að í honum
fléttast saman margvíslegir þræðir í eina heild. Þræðir sem við hér á Nesinu
upplifum í dag sem aðskilda.
Þessu ætlar Samfylkingin og óháðir að breyta með því að leita allra leiða til
að styrkja miðbæinn sem miðstöð mannlífs, verslunar og þjónustu á sama tíma
og við byggjum undir markmið um sjálfbæra þróun á fjölmarga vegu. Við ætlum
hefja samtal meðal annars við Haga hf., um þróun á Eiðistorgi þar sem nú eru
m.a. bílastæði og/eða endurskipulagningu núverandi húsnæðis. Við viljum stuðla
að uppbyggingu sem felur í sér blandaða byggð íbúða, verslunar og þjónustu
ásamt stofnunum og viðeigandi atvinnustarfsemi eftir því sem kostur gefst.
Við ætlum okkur að reisa nýtt kennileiti með því að gera metnaðarfulla
vinningstillögu Andrúm um nýjan leikskóla að veruleika. Við hefjum strax
undirbúning að byggingu fyrsta áfanga skólans, á sama tíma og við takmörkum
röskun á starfseminni á sjálfum byggingartímanum. Við lítum á fjárfestingu í
góðri, aðlaðandi og heilnæmri vinnuaðstöðu fyrir börn og starfsfólk leikskólans
sem virðisaukandi fjárfestingu fyrir bæinn til framtíðar hvort sem litið er til
umhverfis­, félags­ eða rekstrarlega þátta.
Við viljum að helstu umferðarsvæðin þ.e. götuleggirnir að gatnamótum
Suðurstrandar og Nesvegs, verði hannaðar sem borgargötur. Slíkt festir í sessi
ákveðna framtíðarsýn um tilgang, mikilvægi og útfærslur gatna sem fjölbreytt og
lifandi almenningsrými, þar sem húsin og gatan mynda eina heild og áhersla lögð
á samræmda yfirborðshönnun. Við munum ásamt því tryggja vandað og öflugt
samgöngukerfi fyrir alla samgöngumáta til einkanota, hefðbundið og seinna
meir hágæðakerfi almenningssamgangna, þar sem öryggi allra vegfarenda er
haft í fyrirrúmi í vistlegu og aðlaðandi götuumhverfi.
Við viljum útvíkkað sjónarhorn á miðbæinn með því að skapa öflugar
tengingar hans við önnur svæði, sem og flæði inn í og innan hans. Til suðurs
með ströndinni viljum við leggja grunn að endurheimt tengsla miðbæjarins við
sundlaugina, íþróttahús, Gróttuvöll og heilsugæsluna, áningastaði sem íbúar
og gestir sækja til að efla líkamlegt hreysti. Niður að Norðurströnd viljum að
aðlaðandi svæði tengi saman bæjarhliðið og Austurstörnd. Við viljum einnig
lengja miðbæjarásinn frá Eiðistorgi og upp Nesveginn og efla tengslin við hin
andlegu málefni sem felast annarsvegar í náttúrugæðum á Valhúsarðhæðar og
hinsvega í kyrrðinni í Seltjarnarneskirkju.
Ábyrgð sveitarstjórnarmanna er skýr. Ávinningurinn af markvissri
stjórnun líka!

Karen María Jónsdóttir
4. sæti á lista Samfylkingar og óháðra.
Nýr og spennandi
miðbær!
Karen María
Jónsdóttir.