Lögmannablaðið - 2021, Blaðsíða 18

18 LÖGMANNABLAÐIÐ TBL 03/21
IV. FLUTNINGUR MÁLA
FYRIR DÓMI
Skiptir málflutningur máli?
Fyrsta spurningin var um hvort málflutningur skipti raun -
veru legu máli og var henni beint til dómar anna í pallborðinu,
Sigurðar Tómasar Magnússonar hæstaréttardómara og
Eiríks Tómassonar, f.v. hæstaréttardómara. Dómararnir
voru sammála um að málflutningur skipti alltaf máli og
væri ómissandi þáttur af málsmeðferðinni en hins vegar
væri sjaldgæft að málflutningur ylli kúvendingu í afstöðu
dómara. Þá voru dómararnir sammála um að það væri
jafnan svo að dómarar kæmu inn í málflutning með nokkuð
mótaða hugmynd að niðurstöðu málsins, í það minnsta
ef að dómarar mættu undirbúnir til leiks. Það væri í raun
óeðlilegt að ætla dómara, sem væri búinn að fara vel yfir
gögn málsins, að hann væri ekki búinn að mynda sér
skoðun á málinu og mögulegri niðurstöðu þess. Það lægi
í mannlegu eðli að mynda sér skoðun á þeim álitamálum
sem viðkomandi væri að kynna sér. Báðir dómarar ræddu
svo um dómarafundi, sem fram fara strax eftir málflutning
á æðra dómstigi, sem skerpti þá enn fremur á afstöðu
þeirra strax í kjölfar málflutnings og þá væri hin endanlega
niðurstaða fædd.
Lögmennirnir í pallborðinu, þau Sigríður Rut Júlíusdóttir
hjá Rétti, Jóhannes Karl Sveinsson hjá Landslögum og
Gizur Bergsteinsson hjá Lagastoð, voru á einu máli um
að góður málflutningur einkenndist alls ekki af því að
svara öllu sem mögulega varðar málið eða fara yfir það
í heild sinni og gleyma engu. Þvert á móti ætti í góðum
málflutningi að fókusera á aðalatriði málsins og „pakka
þeim inn“ fyrir dómara.
Þá kom fram sú spurning hvernig væri þá í raun áhrifaríkur
málflutningur og sköpuðust skemmtilegar og fróðlegar
umræður um það á pallborðinu.
Eftirfarandi punktar komu meðal annars fram:
• Vertu þú sjálf/ur, vertu eðlileg/ur í málrómi og hafðu
sanngirni í framsetningu að leiðarljósi.
• Það virkar ekki að vera með hörku eða stæla og hvað
þá vera reiðileg/ur eða í uppnámi.
• Fylgstu með málflutningi hjá lögmönnum gagnaðila og
reyndu að tileinka þér það besta frá þeim.
• Byrjaðu vel, komdu með sterkustu rökin fyrir þínum
málstað fyrst.
• Ekki byggja ræðu upp eins og stefnuna.
• Færðu málið og málflutninginn á þann stað sem þú vilt
hafa hann, ekki láta lögmann gagnaðila færa málið til
sín.
LAGADAGURINN 2021
Málstofan um flutning mála fyrir dómi fór vel af stað á Lagadaginn 2021.
Fjölmennt var í salnum og einvalalið í pallborði. Hjördís Halldórsdóttir, lögmaður
hjá LOGOS, kynnti þátt takendur og stjórnaði af röggsemi.
Enginn var með framsögu en Hjördís varpaði fram spurn ingum sem svarað var sitt
á hvað. Náðust á flug mjög góðar umræður með þátttöku allra á pallborðinu,
lögmanna jafnt sem dómara. Málstofan skiptist í tvo hluta, annars vegar áttu sér
stað skoðanaskipti og umræður um hvað virkar og hvað virkar ekki í málflutningi
fyrir dómstólum. Hins vegar var fjallað um málarekstur fyrir yfirdeild MDE og hvað
við á Íslandi gætum lært af honum.