Austurglugginn - 04.11.2021, Síða 4

4 Fimmtudagur 4. nóvember AUSTUR · GLUGGINN
Austurglugginn - Fréttablað Austurlands // Miðvangur 2-4, 700 Egilsstaðir // S: 477-1750
• Ritstjórn: Gunnar Gunnarsson ritstjóri og áb.m: gunnar@austurfrett.is • Albert Örn Eyþórsson, blaðamaður : frett@austurglugginn.is
• Auglýsingar: Anna Dóra Helgadóttir: auglysing@austurglugginn.is • Áskriftir: Anna Dóra Helgadóttir: askrift@austurglugginn.is
• Útgefandi: Útgáfufélag Austurlands ehf. • Umbrot og prentun: Héraðsprent
Leiðari
Eftirköstin að mæta á
svæðið?
Ástæða virðist til að hafa áhyggjur
af því að dýrtíð og eða vöruskortur
sé í vændum. Eftirköst Covid-
faraldursins á efnahagslíf virðast
loks að koma í ljós.
Undanfarið hafa birst greinar
um að viðbúið sé að erfitt geti
verið að fá ákveðnar vörur fyrir
jólin eða það geti orðið mjög
dýrt. Ástæðan er tvíþætt, annars
vegar eru flutningakerfi heimsins í
lamasessi eftir Covid-faraldurinn.
Úti fyrir stærstu höfn Kína hefur
fjöldi skipa lónað og beðið eftir
að fá afgreiðslu. Í Evrópu skortir
bílstjóra. Afleiðingarnar eru að þeir
sem borga mest geta komið vörum
sínum áleiðis, en það leiðir aftur út
í verðið.
Hin ástæðan er að dregið var úr
framleiðslu, meðal annars þar sem
starfsmenn komust ekki lengur
til vinnu eða ekki þótti óhætt að
safna fólki saman. Til skamms tíma
sluppu hlutirnir fyrir horn á meðan
til voru birgðir. Verðið hækkar
þegar þær minnka.
Kannski eru jólavörurnar
minnsta vandamálið. Frekar kann
að vera ástæða til að hafa áhyggjur
af matarverði. Erfitt er orðið að
fá áburð, vandamál sem íslenskir
bændur reyna nú að finna lausn
á. Ef ekki fæst áburður minnkar
uppskeran auk þess sem meira
land þarf undir. Framleiðslan
verður dýrari. Þessum kostnaði
þarf einhvern vegin að ná til baka,
væntanlega í verðinu. Erlendis
hefur frá upphafi faraldursins reynst
erfitt að fá verkafólk í landbúnað.
Verð á hrávörum hækkar, til
dæmis á járni. Það er kannski ekki
alslæmt, skógarbændur gleðjast
yfir að íslenskur viður er nú orðinn
ódýrari en sá innflutti.
Óskandi er að dýrtíðin verði
skammvinn. Að verð á flutningi
lækki þegar aftur kemst regla
á hann eða vöruverð fari niður
þegar framleiðslan verður aftur
í námunda við það sem hún var
áður. Hætt er þó við að það taki
tíma. Líklegt er að fjöldi fyrirtækja
hafi orðið gjaldþrota í faraldrinum.
Tíma tekur að standsetja ný í
þeirra stað. Hérlendis gæti öflug
loðnuvertíð, sem yrði til þess að
gengi krónunnar hækki, orðið
til þess að innflutningur verði
hagstæðari á ný.
Ekki er þó neitt fast í hendi og
rétt að muna að verðlækkanir skila
sér sjaldnast til neytenda. Rifja
má upp söguna af skattinum sem
settur var á í Vestur-Þýskalandi við
sameiningu þýsku ríkjanna til að
styrkja austrið og hið nýja ríki. Sá
skattur er enn til staðar, rúmum 30
árum eftir sameininguna.
Eins og með pestina sjálfa tókst
að mörgu leyti að standa í gegnum
fyrstu bylgjuna, en eftirköstin geta
komið fram svo löngu síðar.
GG
Þann 23. október frumsýndi
Leikfélag F ljótsdalshéraðs
gamanleikinn Tom, Dick og Harry
eftir feðgana Ray og Michael
Cooney í leikstjórn Ármanns
Guðmundssonar.
Ray Cooney er vel þekktur fyrir sína
farsa og hafa margir þeirra verið
þýddir og settir upp á Íslandi, eins
og t.d. Nei, ráðherra!, Tveir tvöfaldir
og Með vífið í lúkunum. Þeir feðgar
kunna svo sannarlega listina að
setja saman farsa. Verkið fjallar um
hjónin Tom og Lindu sem eiga von á
heimsókn frá ættleiðingarskrifstofu.
Þau ætla að ættleiða, en til þess að það
sé hægt þarf allt að vera í toppstandi
á heimilinu. En Tom á tvo bræður,
þá Dick og Harry, og þó að þeir séu
allir að vilja gerðir þá eru þeir mjög
fljótir að setja heimilishaldið á annan
endann. Dick með því að koma
með smyglvarning og flóttamenn
inn á heimilið og Harry með því
að koma með líkamsleifar í poka.
Tom reynir eftir sinni bestu getu að
leysa vandann jafnóðum, en vandinn
stigmagnast og það verður síerfiðara
að hafa stjórn á hlutunum.
Reynir á leikarana
Tom er leikinn af Víði Má
Péturssyni og ég minnist þess ekki
að hafa séð hann á sviði áður. Það
er nánast eins og Víðir af sprottið
fram fullmótaður leikari. Leikur
hans er mikið þrekvirki en það er í
raun hans verk að halda sýningunni
gangandi. Víðir fer létt með það þó
að hamagangurinn sé á köflum svo
mikill að maður hreinlega svitni með
Tom.
Bræður Toms, þeir Dick og
Harry eru leiknir af Agli Erni
Sveinbjörnssyni og Trausta
Dagbjartssyni. Dick er skemmtilega
mislukkaður karakter og kannski sú
persóna sem fær bestu brandarana í
verkinu. Egill stóð sig firna vel og
uppskar mörg hlátrasköllinn. Það
sama má segja um Trausta, en það
var mjög auðvelt að trúa að Dick
og Harry væru bræður og mjög
auðvelt að vorkenna Tom að eiga
slíka bræður.
Linda er leikin af Jarþrúði
Hólmdísi Júlíusdóttur. Jarþrúður
skilar sínu hlutverki á líflegan hátt
á sama tíma og persónan veit ekkert
hvað er að gerast í kringum hana.
Jón Vigfússon og Hrefna Hlín
Sigurðardóttir eru hreint út sagt
yndisleg sem flóttamenn frá
Kósóvó. Jón er mjög sannfærandi
og skemmtilegur sem pissfullur,
aldraður Balkanskagatrompetleikari.
Hrefna Hlín hefur mjög
skemmtilega útgeislun á sviði og
heillaði bæði þegar hún var vinaleg
og þegar hún var verulega ósátt.
Jóhanna Helga Jóhannsdóttir lék
Shakespeare-áhugamanninn, frú
Potter frá ættleiðingarskrifstofunni
og gerði það sköruglega. Hafsteinn
Máni Hallgrímsson leikur Downs
lögreglumann, sem snuðrar
óheppilega mikið í kringum
heimilið. Hafsteinn á góða spretti,
og má þá sérstaklega minnast á
skemmtileg endurtekin atriði með
gúmmíhönskum. Garðar Valur
Hallfreðsson leikur síðan mafíósann,
Boris. Lítið hlutverk en Garðar Valur
gerir því góð skil.
Kátína í salnum
Ármann Guðmundsson hefur
reglulega leikstýrt áhugaleikfélögum,
en er í fyrsta skipti að leikstýra
Leikfélagi Fljótsdalshéraðs.
Honum hefur tekist listavel til og
margar lausnir hans snilldarlegar.
Undirritaður mætti á sýningu
laugardagskvöldið 30. október
og það var virkilega gaman að
mæta í troðfullan sal á Iðavöllum.
Hlátrasköllin ómuðu allt kvöldið og
það var augljóst kátínan í salnum
smitaði upp á svið og til baka.
Árni Friðriksson
Tom, Dick og Harry
Leikrýni
Egill Örn, Víðir Már, Trausti og Jarþrúður í aðalhlutverkunum. Mynd: LF