Feykir - 12.10.2022, Blaðsíða 4
Hann gerði margt sem gott var
og gaf í mörgu af sér.
Og fann út margt sem flott var
og frelsi til þess gaf sér.
Í hollum málum hér og þar
sá Hrókur var hann fagnaðar
sem glæddi menntir góðar.
Þó floginn sé hann frá okkur
hans framtak geymist hjá okkur
sem brot í þágu þjóðar!
Rúnar Kristjánsson
Hrafn
Alheimsfrumsýning á Þytur í laufi: Villimenn og villtar
meyjar fer fram 22. október í Höfðaborg á Hofsósi. Hér
er á ferðinni frumsamið hugverk eftir þær Jóhönnu
Sveinbjörgu Traustadóttur og Margréti Berglindi
Einarsdóttur á Hofsósi.
Að sögn þeirra Jóhönnu og Margrétar gerist sagan í
stórum skógi í hitabeltinu þar sem úir og grúir af
skrautlegum skógarbúum. Lífið er ekki átakalaust í
skóginum og ýmis öfl takast þar á, sem konungur
skógarins þarf að glíma við.
Verkið er nokkrir leikþættir sem fléttaðir eru saman
með þekktum dægurlögum og eru leikararnir ekki af
verri endanum; Jón Sævar Sigurðsson, Ingibjörg
Sólveig Halldórsdóttir, Sigmundur Jóhannesson,
Bjarnveig Rós Bjarnadóttir, Kristján Jónsson og Sæunn
Hrönn Jóhannesdóttir. Þau eru flest þaulreynd á
sviðinu og sjá þau um að túlka m.a. persónurnar Frið,
Valda og Mumma.
„Hér er um að ræða spaugsamt ævintýri fyrir
fullorðna. Sýningin er ekki bönnuð börnum en hún er
ekki við hæfi barna,“ segja þær stöllur um leikritið.
Tónlistarstjórn er í höndum Einars Þorvaldssonar
og Stefáns R. Gíslasonar og hafa þeir fengið til liðs við
sig úrvals tónlistarfólk; Kristján Reyni Kristjánsson
trommara, Steinar Gunnarsson bassaleikara og söng-
fuglana Sigurlaugu Vordísi Eysteinsdóttur og Ívar
Helgason.
Þytur í laufi: Villimenn og villtar meyjar
Frumsamið hugverk Jóhönnu
og Margrétar á Hofsósi
Það ætti enginn að missa af þessari skemmtun. MYND AÐSEND
Sýningar verða í Höfðaborg á Hofsósi 22. október kl.
19:30 og 20: 30 og í Miðgarði í Varmahlíð 28. október
kl. 20:30.
Miðapantanir eru í síma 834-6153 og kostar kr.
4.000 hver. / PF
M I N N I N G
Ragnar Arnalds
rithöfundur, alþingismaður og ráðherra
Fæddur 8. júlí 1938 – látinn 15. september 2022
Ragnar Arnalds, rithöfundur, alþingis-
maður og ráðherra, fæddist í Reykjavík
8. júlí 1938. Hann lést á heimili sínu 15.
september 2022. Eiginkona Ragnars er
Hallveig Thorlacius. Eiga þau tvær
dætur, Guðrúnu og Helgu. Ragnar var
alþingismaður Norðurlands vestra
1963 - 67 og 1971- 1999. Mennta-
málaráðherra 1978- 1979 og fjármála-
ráðherra 1980- 1983.
Ragnar var skólastjóri við barna- og
unglingaskólann í Varmahlíð í Skaga-
firði 1970-1972. Ragnar var um tíma
framkvæmdastjóri Samtaka hernáms-
andstæðinga. Síðar var hann formaður
Heimssýnar. Hann var ritstjóri Frjálsrar
þjóðar, Dagfara og Nýrrar útsýnar.
Ragnar Arnalds kom mjög að
einum helstu framfaramálum Norð-
lendinga og ekki síst Skagfirðinga á
árunum 1970 til 1999. Má þar nefna
Fjölbrautarskóla Norðurlands vestra
FNV, varformaður Bygginganefndar
Bóknámshússins, Hitaveitu Hjaltadals,
Hólalax og endurreisn Hólaskóla 1981.
Setti upp leikrit sín, bæði í Varmahlíð
og á Blönduósi, svo nokkuð sé nefnt.
Ragnar naut mikillar virðingar jafnt
pólitískra samherja sinna sem
andstæðinga. Hann var rökfastur,
fljúgandi mælskur, annálaður fyrir
kurteisi og virðingu fyrir málefnum
sem hann barðist fyrir. Ragnar kunni
líka að hlusta og virða skoðanir
andstæðinga sinna og leiða fram mál
til farsælla lykta.
Ég sem ungur menntaskólanemi
hreifst með baráttu Ragnars fyrir
sjálfstæðu og herlausu Íslandi. Hann
stóð í fylkingarbrjósti Samtaka her-
stöðvarandstæðinga.
Ísland var ungt lýðveldi. Já, óvopnað
friðelskandi land sem hafði unnið sér
sjálfstæði og viðurkenningu þjóða.
Í okkar huga var það andstætt
hugsjónum hins unga lýðveldis að
ganga í hernaðarbandalag og vista hér
erlendan her.
Síðar kynntist ég Ragnari sem
menntamálaráðherra. Ég var þá odd-
viti Helgafellssveitar.
Á þeim tíma voru börnin í sveitinni
send á heimavist í Laugargerðisskóla.
Við vildum söðla um og taka þátt í
byggingu og rekstri skóla í Stykkishólmi
með daglegum akstri.
Í þessu ferli var stuðningur og
leiðsögn Ragnars okkur afar mikil-
vægur.
Enn síðar varð Ragnar Arnalds
fjármálaráðherra árið 1980 sem var
mikil gæfa fyrir Hólastað.
Þá hafði verið tekist á um hvort
leggja ætti niður Bændaskólann á
Hólum „í takt við nýja tíma og hag-
ræðingu í menntamálum“ líkt og það
var þá orðað.
En reglulegt skólahald hafði fallið
niður í tvö ár. Þá kom ný ríkisstjórn
með Ragnar Arnalds sem fjármála-
ráðherra og Pálma Jónsson á Akri sem
landbúnaðarráðherra.
Þeir tveir, báðir ráðherrar að
norðan, réðu mig sem skólastjóra á
Hólum og hjólin snerust hratt.
Ég leyfi mér að fullyrða að ásýnd
Hóla í Hjaltadal væri önnur ef Ragnars
Arnalds hefði ekki notið við á þessum
örlagatímum.
Og aftur lágu leiðir okkar Ragnars
saman löngu síðar. Nú í Heimssýn,
hreyfingu sjálf-stæðissinna í Evrópu-
málum.
Tilraun „vinstrimanna“ til að sam-
einast í eina pólitíska hreyfingu 1999
strandaði m.a. á utanríkismálum.
Áhugi sumra á aðild að ESB klauf þessa
fylkingu.
Ragnar var trúr hugsjónum sínum
og gekk til liðs við þann flokk sem
hann treysti best til þess að standa
vörð um fullveldi landsins.
Hann var algjörlega andvígur um-
sókn eða aðild að Evrópusamband-
inu.
Vildi þar ekkert „bjölluat“. Ragnar
taldi að barátta gegn inngöngu í ESB
væri svo mikið grundvallarmál að það
væri hafið yfir hina hefðbundnu
flokkadrætti.
Þannig hlaut hann að vera í fylk-
ingarbrjósti þverpólitískra samtaka;
Heimssýnar, hreyfingar sjálfstæðis-
sinna í Evrópumálum. Ragnar varð
fyrsti formaður þeirra samtaka.
Vonbrigði Ragnars voru því mikil
þegar nokkrir forystumenn í flokkn-
um, sem hann hafði gengið til liðs við,
stóðu að fyrirvaralausri umsókn að
ESB með beiðni um inngöngu. Rök-
fastur og baráttuglaður tók hann
slaginn.
Undir forystu Ragnars Arnalds varð
Heimssýn að stórri og áhrifaríkri
fjöldahreyfingu með félagsdeildir út
um allt land. Og barátta Heimssýnar
skilaði árangri.
Okkur sem voru mjög andvíg ESB-
umsókninni tókst að kæfa hana, enda
fól hún í sér óafturkræft framsal á
fullveldi þjóðarinnar og sjálfstæði.
Ragnar var öflugur rithöfundur.
Bók hans „Sjálfstæðið er sívirk
auðlind“ ætti að vera skyldulesning
fyrir öll þau sem vilja ræða ESB-mál af
þekkingu.
Í upphafi bókarinnar segir Ragnar:
„Auðlindir Íslands eru margvíslegar.
Þær leynast ekki aðeins í jörðu eða í
djúpinu sem lykur um land okkar.
Dýrmætasta auðlindin er sá lífsins
kraftur sem felst í sjálfstæði þjóðarinnar
og íslenskri tungu.“ Blessuð veri barátta
Ragnars Arnalds, fyrrverandi ráðherra
og formanns Heimssýnar, fyrir
fullveldi og sjálfstæði Íslands.
Blessuð veri minning Ragnars
Arnalds.
Jón Bjarnason
4 38/2022