Margt smátt : fréttabréf Hjálparstofnunar kirkjunnar - 01.11.2021, Page 10

JANE LÉST ÚR ALNÆMI ÁRIÐ 2019 EN
BÖRNIN HENNAR SPJARA SIG NÚ VEL
Hjálparstarf kirkjunnar og grasrótarsamtökin RACOBAO hafa aðstoðað HIV-smitaða,
alnæmissjúka og munaðarlaus börn í héruðunum Rakai og Lyantonde í Úganda frá
árinu 2007. Skjólstæðingar verkefnisins eru fyrst og fremst börn sem misst hafa
foreldra sína af völdum alnæmis og búa ein en líka HIV-smitaðir einstæðir foreldrar og
ömmur sem hafa börn á framfæri og búa við örbirgð.
Árið 2018 sagði fólkið í þorpsráðinu í Rakai-héraði að Jane, 42 ára gömul ekkja og
fjögurra barna móðir, væri sú sem helst þyrfti þar á aðstoð að halda. Húsakofi hennar
og barnanna var þá að hruni kominn og hún mjög lasburða vegna alnæmis. Enga átti
fjölskyldan innanstokksmuni og enginn til að sjá henni farborða nema þá helst 15 ára
unglingspilturinn. Hjálparstarf kirkjunnar og RACOBAO réðu því verktaka sem reisti
fjölskyldunni múrsteinshús, 4000 lítra vatnstank, kamar og eldaskála á landskika
hennar.
Jane var orðin mjög lasburða um það leyti sem húsið var að verða tilbúið og um vor
2019 hjálpaði starfsfólk RACOBAO henni á næsta sjúkrahús þar sem hún fékk
lyfjameðferð. Jane fékk að snúa aftur heim og hún var vongóð um að ná heilsu. Viku
seinna lést hún hins vegar heima í kofaskriflinu á örþunnri tágarmottu. Alnæmið
hafði betur og börn Jane stóðu ein eftir, 18, 15, 12 og 10 ára gömul.
Hjálparstarf kirkjunnar og RACOBAO sá börnunum fyrir geitum, verkfærum og útsæði
til grænmetisræktunar til þess að tryggja þeim fæðu og til þess að þau hefðu möguleika
á að afla sér tekna þannig að yngri systurnar tvær gætu haldið áfram í skóla. Nú
tveimur árum seinna eru börnin komin á betri stað í lífinu og þau eldri geta séð þeim
yngri farborða.
„Áður en við fengum hjálp var
lífið bara mjög erfitt en núna
getum við séð fyrir okkur sjálf.
Við eigum landskika þar sem við
ræktum banana, baunir, maís
og kassavarót sem við borðum
en við eigum líka nóg eftir til að
selja á markaðinum,“ sagði Allen,
elst fjögurra systkina og sem nú
er tvítug að aldri.
Hér standa systkinin fjögur í hriplekum kofa fjölskyldunnar
viku eftir andlát Jane vorið 2019.
Börnin fengu rúm, dýnur, teppi og moskítónet þegar þau fluttu inn í nýja húsið. Systurnar þrjár fyrir utan húsið í nóvember 2021. Ef grannt er gáð sést að önnur yngri
systirin er í sama bol og sú elsta var í á mynd sem tekin var um vor 2019.
Jane náði aldrei að flytja í múrsteinshúsið en það gerðu börnin hennar hins vegar.
10 – Margt smátt ...