Morgunblaðið - 03.05.2002, Blaðsíða 10
FRÉTTIR
10 FÖSTUDAGUR 3. MAÍ 2002 MORGUNBLAÐIÐ
ÞRIÐJU og síðustu um-
ræðu um ríkisábyrgð til
handa Íslenskri erfðagrein-
ingu var framhaldið á Al-
þingi. Fresta varð um-
ræðunni í upphafi þing-
fundar eftir að stjórnar-
andstæðingar höfðu farið
fram á að þeir fengju meiri
upplýsingar um málið. Til
stóð að hefja umræðuna um
ríkisábyrgðina strax í gær-
morgun, þar sem frumvarp-
ið var fyrsta mál á dagskrá, en eftir að þing-
menn stjórnarandstöðunnar höfðu kallað eftir
frekari upplýsingum beindi Halldór Blöndal,
forseti Alþingis, því til formanns efnahags- og
viðskiptanefndar þingsins, Vilhjálms Egilsson-
ar, að hann kallaði nefndina saman áður en
þriðja umræða hæfist. Að því búnu var málið
tekið út af dagskrá og um hádegið var nefndin
kölluð saman. Vilhjálmur Egilsson, formaður
nefndarinnar, sagði í samtali við Morgunblaðið
síðdegis í gær að fundur nefndarinnar hefði
staðið yfir í um það bil klukkustund og að á
fundinum hefðu nefndarmenn farið nánar yfir
málið ásamt fulltrúum fjármálaráðuneytisins,
heilbrigðis- og tryggingamálaráðuneytisins,
fulltrúum frá Fjárfestingarstofunni og Ragnari
Aðalsteinssyni lögmanni en í grein þess síðar-
nefnda, sem birtist í Morgunblaðinu 1. maí sl., er
því m.a. haldið fram að umrætt frumvarp gangi
gegn 2. gr. stjórnarskrárinnar um skiptingu
valdsins milli handhafa löggjafarvalds og fram-
kvæmdavalds.
Það var Ögmundur Jónasson, þingflokksfor-
maður Vinstrihreyfingarinnar – græns fram-
boðs, sem hóf máls á því í upphafi þingfundar í
gær að hann teldi að þingmenn ættu að fá meiri
upplýsingar um títtnefnt frumvarp áður en það
yrði tekið til þriðju umræðu. „Ég tel mjög mik-
ilvægt að þingið fái miklu gleggri upplýsingar
um allt það sem snýr að þessu máli. Sérstaklega
vil ég beina því til hæstvirts fjármálaráðherra
og hæstvirts iðnaðar- og viðskiptaráðherra að
þingið fái upplýsingar um öll þau fyrirtæki sem
leitað hafa hófanna á þessu sviði; óskað eftir
stuðningi beint eða óbeint af hálfu stjórnvalda
um starfsemi hér á landi.“
Jóhanna Sigurðardóttir, þingmaður Samfylk-
ingarinnar, tók undir með Ögmundi og kallaði
eftir frekari upplýsingum um málið. „Ég held að
það sé fyllsta ástæða til þess að málið gangi aft-
ur til efnahags- og viðskiptanefndar m.a. í ljósi
þessara upplýsinga sem hér er kallað eftir og
ekki síður í ljósi þess sem fram kom hjá virtum
lögmanni hér í bæ, Ragnari
Aðalsteinssyni, sem heldur
því fram fullum fetum að
lögin um ríkisábyrgð vegna
deCODE standist ekki
stjórnarskrána.“
Í máli Kristins H. Gunn-
arssonar, þingflokksfor-
manns Framsóknarflokks-
ins, kom fram að eðlilegra
hefði verið fyrir þingmenn-
ina, Ögmund og Jóhönnu, að
tala beint við formann efna-
hags- og viðskiptanefndar og biðja hann um að
kalla nefndina saman vegna málsins í stað þess
að koma upp í upphafi þingfundar og gagnrýna
það að þau hefðu ekki fengið nægar upplýsingar
um málið. Það væri með öðrum orðum í hendi
formanns nefndarinnar að boða til nefndarfund-
ar ef hann teldi næga ástæðu til þess.
Síðan sagði Kristinn. „Hvað varðar spurn-
inguna um stjórnarskrána þá leitumst við auð-
vitað við eftir föngum og bestu getu að sjá til
þess að mál sem hér eru lögð fyrir þingið stang-
ist ekki á við stjórnarskrána, en það er hins veg-
ar dómstóla að lokum að skera úr um það, ekki
þingsins eða framkvæmdarvaldsins, það er
dómsvaldsins að skera úr um þennan þátt máls-
ins og enginn annar hefur endanlegt úrskurð-
arvald í þeim efnum.“
Eftir frekari umræður um það hvort kalla
þyrfti efnahags- og viðskiptanefnd saman tók
Halldór Blöndal, forseti þingsins, af skarið og
beindi því til formanns fyrrgreindrar nefndar að
hún yrði kölluð saman út af þessu máli.
Ítarleg skoðun hjá ESA
Fundur nefndarinnar hófst síðan kl. 13 og
stóð yfir í um það bil klukkustund að sögn Vil-
hjálms Egilssonar, formanns nefndarinnar.
Hann sagði í samtali við Morgunblaðið í gær að
á fundinum hefðu nefndarmenn, ásamt fulltrú-
um fjármálaráðuneytisins, fulltrúum heilbrigð-
is- og tryggingamálaráðuneytisins, fulltrúum
frá Fjárfestingastofunni og Ragnari Aðalsteins-
syni lögmanni, m.a. rætt um framhald málsins,
verði það samþykkt, gagnvart eftirlitsstofnun
EFTA (ESA). Sagði Vilhjálmur að það lægi fyr-
ir að ESA gæti tekið nokkra mánuði í að skoða
málið áður en það yrði afgreitt þaðan. Þá var á
fundinum m.a. rætt um samninga Íslenskrar
erfðagreiningar við heilbrigðiskerfið og það álit
Ragnars Aðalsteinssonar að frumvarpið stæðist
ekki stjórnarskrána. Aðspurður segist Vil-
hjálmur ekki telja umrætt álit Ragnars sann-
færandi. Vilhjálmur segir að ekki sé hægt að af-
greiða ríkisábyrgð nema með atbeina Alþingis.
„Mér finnst það langsótt að telja að málið sé
andstætt stjórnarskránni,“ segir hann og bætir
því við að sú spurning hafi aldrei komið upp áður
þegar ríkisábyrgðir hafi verið veittar til ein-
stakra fyrirtækja.
Við 3. umferð um ríkisábyrgð vegna Íslenskr-
ar erfðagreiningar, sem fram fór á Alþingi í
gærkvöldi, ítrekuðu stjórnarandstæðingar and-
stöðu sína við frumvarpið. Sverrir Hermanns-
son, þingmaður Frjálslynda flokksins, óskaði
eftir svörum um hvaða stofnun hefði í raun mælt
með ríkisábyrgðinni í ljósi þess hversu margir
hefðu mælt á móti henni.
Jóhanna Sigurðardóttir, þingmaður Samfylk-
ingar, benti á að í lögum um ríkisábyrgð væri
kveðið á um að ekki mætti veita aðila sem stend-
ur í skuld við ríkissjóð ríkisábyrgð. Sagði hún
ljóst að skuldir deCODE gagnvart ríkinu hlypu
á tugum milljóna króna og með ólíkindum að
rætt væri um að veita slíka ábyrgð í ljósi þessa.
Ögmundur Jónasson, þingmaður Vinstri
grænna, gagnrýndi stjórnarflokkana fyrir að
flýta málinu í gegnum þingið og fyrir þann skort
á upplýsingum sem einkennt hefði málið. Hvatti
hann meðal annars til þess að skuldastaða de-
CODE yrði tekin til gaumgæfilegrar skoðunar
og að fjármálaráðherra færi varlega með þá
heimild sem stjórnarmeirihluti væri í þann
mund að veita honum.
Geir H. Haarde fjármálaráðherra ítrekaði að
heimildinni yrði beitt af varfærni og tók undir
þau orð að sjálfsagt væri að Íslensk erfðagrein-
ing gerði upp skuldir sínar við ríkissjóð áður en
ábyrgðin yrði veitt. Þá undirstrikaði ráðherra
þá skoðun sína að ríkisábyrgðin myndi ekki hafa
áhrif á lánshæfi ríkissjóðs þrátt fyrir að ýmsir
hefðu haldið öðru fram.
Átök urðu á Alþingi um ríkisábyrgð til Íslenskrar erfðagreiningar
Morgunblaðið/Golli
Miklar annir hafa verið hjá þingmönnum á Alþingi undanfarna daga.
ESA gæti haft
lögin til umfjöll-
unar í mánuði
Frumvarp um útlendinga samþykkt
FRUMVARP um útlendinga var af-
greitt sem lög frá Alþingi í gær en
það var samþykkt með 31 atkvæði
stjórnarliða gegn 19 atkvæðum
stjórnarandstæðinga. Í lögunum er
m.a. að finna reglur um réttarstöðu
útlendinga hér á landi, við komu
þeirra, dvöl og brottför. „Í frum-
varpinu (um útlendinga) hefur verið
tekið tillit til almennrar þróunar sem
á undanförnum árum hefur orðið á
löggjöf og viðhorfi til málefna út-
lendinga,“ segir m.a. í athugasemd-
um sem fylgdu frumvarpinu. Þar
kemur jafnframt fram að það hafi
upphaflega verið lagt fram á Alþingi
til kynningar vorið 1991. Eftir það
fór það til umfjöllunar í dómsmála-
ráðuneytinu þar sem gerðar voru á
því nokkrar breytingar, einkum
breytingar sem lutu að þátttöku Ís-
lands í Schengen-samstarfinu.
Guðrún Ögmundsdóttir, þingmað-
ur Samfylkingarinnar, gerði grein
fyrir því í atkvæðagreiðslu við frum-
varpið í gær að stjórnarandstæðing-
ar myndu leggjast gegn frumvarp-
inu. Tók hún fram að umrætt
þingmál hefði hlotið mikla umræðu
og mikla gagnrýni. „Við í stjórnar-
andstöðunni segjum nei við af-
greiðslu frumvarpsins,“ sagði hún.
Sex önnur frumvörp voru gerð að
lögum á Alþingi í gær. Þar á meðal
frumvarp um varnir gegn landbroti
og frumvarp um húsnæðismál.
Höfuðborgarsamtökin kynna framboðslista
Áhersla á þéttingu byggðar
HÖFUÐBORGARSAMTÖKIN, ný
samtök sem stofnuð voru í apríl síð-
astliðnum og bjóða fram til borgar-
stjórnarkosninga í maí, hafa kynnt
framboðslista sinn fyrir komandi
kosningar. Fyrsta sætið skipar Guð-
jón Erlendsson arkitekt, 2. sæti
Nanna Gunnarsdóttir, 3. sæti Hjörtur
Hjartarson, 4. sæti Dóra Pálsdóttir, 5.
sæti Hinrik Hoe Haraldsson, 6. sæti
Hreinn Ágústsson, 7. sæti Vigfús
Karlsson, 8. sæti Örn Sigurðsson, 9.
sæti Hilmar Bjarnason og 10. sæti
Sigurður S. Kolbeinsson.
Í stefnuskrá samtakanna er lögð
mest áhersla á nýja borgarstefnu til
mótvægis við ríkisrekna byggða-
stefnu, virkt lýðræði í stjórn borgar-
innar, skipulagsmál, fjármál og fjár-
reiður.
Þá segir að meginmarkmið sam-
takanna sé að stöðva útþenslu byggð-
ar í Reykjavík og meðal annars sé
gert ráð fyrir að endurreisa miðborg-
ina og flytja Reykjavíkurflugvöll í
áföngum úr Vatnsmýri til ársins 2010.
Enn fremur leggja Höfuðborgarsam-
tökin áherslu á að svæðið vestan Ell-
iðaáa taki við mestallri fólksfjölgun í
Reykjavík næstu 20 árin og er í því
sambandi stefnt að því að hafin verði
byggð á uppfyllingum við Sæbraut,
Hólma, Örfirisey og Akurey.
LITLAR breytingar urðu á fylgi
stjórnmálaflokkanna á landsvísu í
síðasta mánuði miðað við mánuð-
inn á undan skv. skoðanakönnun
Gallup sem gerð var dagana 27.
mars til 28. apríl. Sjálfstæðisflokk-
urinn eykur þó fylgi sitt um eitt
prósentustig og fengi nú ríflega
41% fylgi en fylgi Framsóknar-
flokksins hefur minnkað í rösklega
16% í stað 18% í síðustu mælingu.
Þá bætir Frjálslyndi flokkurinn að-
eins við sig og fengi um 3% fylgi í
stað 2% áður. Engin þessara breyt-
inga er þó marktæk þar sem þær
eru innan skekkjumarka. Í könn-
uninni kemur jafnframt fram að
Samfylkingin og Vinstrihreyfingin
– grænt framboð eru með sama
fylgi milli mánaða, þ.e. Samfylk-
ingin með 22% og Vinstri grænir
með rúmlega 17%.
Stjórnarflokkarnir og Frjáls-
lyndi flokkurinn sækja nú eins og
áður meira fylgi til karla en kvenna
en því er öfugt farið hjá Samfylk-
ingunni og Vinstri grænum sem
sækja meira af fylgi sínu til kvenna
en karla.
Fylgi við
stjórnina 57%
Í könnuninni kemur einnig fram
að fylgi ríkisstjórnarinnar hefur
aukist um eitt prósentustig og hef-
ur nú tæplega 57% fylgi eins og í
lok febrúar en naut stuðnings rúm-
lega 56% kjósenda í marslok.
Tæplega 20% voru ekki viss um
hvað þau myndu kjósa eða neituðu
að gefa það upp og tæplega 6%
sögðust myndu skila auðu eða ekki
kjósa ef kosningar færu fram nú.
Úrtakið í könnuninni var 2.690
manns. Svarhlutfall var 68% og
vikmörk 1–3%.
Litlar breyt-
ingar á fylgi
flokkanna