Skólavarðan - 01.05.2006, Blaðsíða 22
22
SKÓLAVARÐAN 4.TBL. 6. ÁRG. 2006
EECERA RÁÐSTEFNA Á ÍSLANDI
segir Jóhanna Einarsdóttir dósent í
menntunarfræði og formaður undir-
búningsnefndar Evrópuráðstefnunnar
„Lýðræði og menning í menntun yngri
barna“ sem haldin verður í Kennara-
háskólanum 30. ágúst – 2. september
nk.
Samtök um menntarannsóknir á sviði
yngri barna (European Early Child-
hood Education Research Association)
standa að ráðstefnunni í samvinnu við
Kennaraháskólann en hún er árviss við-
burður í starfsemi þeirra. Einnig gefa
þau út tímarit. Um 4-500 manns sækja
ráðstefnur samtakanna að jafnaði, leik-
skólakennarar og kennarar í yngstu
bekkjum grunnskólans auk fræðimanna á
sviði menntarannsókna yngri barna, þ.e. á
aldrinum 0-8 ára.
EECERA samtökunum var lengi stýrt
frá Bretlandi en núverandi formaður
er dr. Ferre Laevers frá Belgíu. Í
undirbúningsnefnd ráðstefnunnar sitja
fulltrúar Kennarasambandsins, mennta-
sviðs Reykjavíkurborgar og Háskólans
á Akureyri auk Jóhönnu og Örnu H.
Jónsdóttur frá KHÍ. Nefndin lagði fram
tillögu um þema ráðstefnunnar til stjórnar
samtakanna sem var samþykkt og er
yfirskrift hennar: Lýðræði og menning í
menntun yngri barna.
„Lýðræði í skólastarfi hefur töluvert
verið í brennidepli að undanförnu,“
segir Jóhanna, „og fólk er farið að líta
til Barnasáttmála Sameinuðu þjóðanna
þar sem segir að börn eigi rétt á að
taka þátt í og móta sitt umhverfi, meðal
annars skólastarf. Við vildum tengja
lýðræðishugtakið menningunni því börn
njóta lýðræðis með því meðal annars að
hafa áhrif á menningu síns samfélags.
Við höfum fengið send yfir 300 erindi
frá öllum heimsálfum og fjölda landa,
til dæmis frá Suður-Afríku, Singapore,
Japan, Bandaríkjunum, Ástralíu, öllum
Norðurlöndunum og flestum öðrum
Evrópulöndum. Það er geysilega spennandi
að fá kynningu á skólastarfi svo víða að.
Þetta verður algjör veisla! Í gærkvöldi var
ég til að mynda að lesa erindi frá Singapore
sem fólk hefur mikið litið til vegna
árangurs í stærðfræði og fleiri greinum.
Þarna er sagt frá rannsókn sem leiðir í ljós
gildi samþættingar, meiri þemavinnu og
að dregið sé úr stýringu kennarans. Mikið
verður um erindi sem tengjast námskrám
og stefnumótun í málefnum yngri barna
og verður afskaplega fróðlegt fyrir okkur
að líta út fyrir landsteinana og sjá hvernig
aðrar þjóðir haga uppbyggingu síns
skólakerfis.
Þarna kynna heimsþekktir fræðimenn
rannsóknir sínar, meðal annars um
fjölmenningu og skóla fyrir öll börn,
yngstu leikskólabörnin, nám í gegnum leik
og samstarf heimila og skóla. Rannsóknir
á tengslum leik- og grunnskóla, stærð-
fræðinámi og enskukennslu ungra barna
verða kynntar. Þá má einnig nefna mat á
útileikskólum, skipulag í stórum skólum,
vináttu barna, stjórnun menntastofnana,
leiðtogahlutverk kennarans, málörvun,
listir og skapandi starf, skilning á
réttindum barna og margt fleira. Einnig
verða kynntar allmargar rannsóknir
um kennaramenntun og fagmennsku
kennara.“
Innan meginviðfangsefnis ráðstefnunn-
ar hefur undirbúningsnefndin skilgreint
ellefu þræði sem málstofuerindi (um 300
talsins) heyra undir:
• Sjónarhorn barna
• Menntun og umönnun
• Þátttaka fjölskyldunnar
• Leikurinn
• Fjölbreytileiki
• Fagmennska
• Námskrár, námsefni og námstilhögun
• Leiðtogahlutverkið
• Skil skólastiga og samfella í námi
• Samþætting þjónustu
• Kynferði
Aðalfyrirlesarar ráðstefnunnar eru allir
virtir fræðimenn á þessu sviði. Barbara
Rogoff frá Bandaríkjunum mun fjalla um
hvernig börn læra í samvinnu við aðra
og hvernig menning hefur áhrif á nám
og kennslu. Peter Moss frá Bretlandi
talar um lýðræðislegt starf í leikskólum,
að hlusta á börn og leiðir til þess. Lars
Dencik frá Danmörku er með fyrirlestur
um samskipti ungra barna og foreldra
þeirra í velferðarsamfélögum samtímans.
Joseph Tobin frá Bandaríkjunum fjallar um
samanburðarrannsókn á milli landa um
börn innflytjenda og viðhorf bæði foreldra
og kennara í þeim efnum. Hrafnhildur
Ragnarsdóttir er íslenski fyrirlesarinn og
mun hún fjalla um hlutverk menningar í
þroska barna með tilliti til niðurstaðna
máltökurannsókna.
„Fyrir fólk sem hefur áhuga á mennta-
rannsóknum á sviði yngri barna er þetta
Ráðstefnan með stórum staf og ákveðnum
greini,“ segir Jóhanna að lokum.
keg
Verður algjör veisla!
Upplýsingar um ráðstefnuna má nálgast á
www.congress.is/eecera2006
Ef fólk skráir sig fyrir 30. maí er skráningargjaldið lægra en ella og
endurgreitt að fullu ef viðkomandi kemst ekki á ráðstefnuna.
Undirbúningsnefndin er skipuð þeim Jóhönnu Einarsdóttur, Örnu H.
Jónsdóttur, Hildi Skarphéðinsdóttur, Kristínu Dýrfjörð og Þresti Brynjarssyni.
Jóhanna Einarsdóttir formaður undirbúningsnefndar ráðstefnunnar