Skólavarðan - 01.10.2001, Blaðsíða 14

•Kennsluaðferðir urðu mun fjölbreyttari
en í hefðbundnu kennslufyrirkomulagi.
•Námsaðferðir nemenda urðu fjölbreytt-
ari. Þeir sýndu almennt mikinn áhuga og
frumkvæði í verkefnavinnu.
Helstu gallar:
•Nemendur urðu oft óöruggir á meðan
þeir voru að ná valdi á nýju námsumhverfi.
•Þar sem unnið var út frá þemum en
ekki kennslubók skapaðist mikil vinna við
öflun og gerð námsefnis.
•Sumir nemendur áttu í erfiðleikum
með að afmarka efnið.
•Öll umsjón var umfangsmikil, svo sem
skráning mætinga, móttaka verkefna og yf-
irferð þeirra.
•Þessum kennsluháttum fylgdi mikil
skipulagsvinna og fundahöld sem mjög oft
voru utan hefðbundins starfstíma kennara.
•Mikill tími fór í að tengja skjávarpa,
koma sýningartjaldi fyrir í upphafi
kennslustunda og ganga frá því í lokin.
•Erfitt var að fylgjast með öllum nem-
endum og því gátu þeir einangrast eða
komið sér undan vinnu.
Eftir reynsluna af fyrirkomulagi og
kennsluháttum í Nát-106 var það samróma
álit kennara áfangans að kostirnir við hina
nýju kennsluhætti væru fleiri en gallarnir.
Á haustönn 2001 var ákveðið að vinna sam-
kvæmt fyrsta skipulaginu og eru nemendur
aftur 75 í einum hópi. Kennararnir eru
fimm: Björg Pétursdóttir, Guðrún Ingvars-
dóttir, Óðinn Örn Jóhannsson, Svala Sig-
urgeirsdóttir og Örn Óskarsson. Megin-
þema áfangans í þetta sinn er Hagnýt jarð-
efni.
Þar sem lítill tími vannst í fyrra til að
meta hvernig nemendum fyndust þessar
nýjungar er í haust lögð mikil áhersla á
mat. Hver lota er metin og reynt að finna
út hvaða aðferðir hafa hentað nemendum
best. Ennfremur er lögð áhersla á sjálfsmat
og mat samnemenda. Nemendur meta fyr-
irlestra og veggspjöld hver hjá öðrum auk
þess að leggja mat á eigin hópavinnu sem
og vinnu hópsins í heild.
Björg Pétursdóttir
bjorg@fsu.is, S: 8948970
Afmæl i Hamraskóla
15
Föstudaginn 21. september var haldin hátíð í Hamraskóla í tilefni af tíu ára afmæli
skólans. Undirbúningur afmælisins stóð í þrjá daga en þá fór engin hefðbundin
kennsla fram heldur unnu nemendur í hópum á þemadögum að því að fegra skól-
ann sinn og bæta á allan hátt. Yfirskrift þemadaganna var umgengni, vinátta og
kurteisi og tóku verkefnin mið af því. Á göngum skólans var hengd upp vinarkeðja
þar sem hendur allra nemenda, kennara og starfsfólks tengdust. Kærleikstré
prýddu anddyri skólans en á þau hengdu nemendur kærleiksorð og fallegar setn-
ingar. Þríhyrndur tréstandur með myndum eftir nemendur var útbúinn með
dyggri aðstoð handmenntarkennara.Einnig var útbúin sýning með ljósmyndum
frá opnun skólans og fram á þennan dag, búnar til stuttmyndir, leikrit og ljóð voru
samin, unnið með málshætti, vefsíðu skólans og margt fleira.
Efnt var til slagorðasamkeppni í tilefni af afmælinu og varð slagorðið
Allir snjallir hlutskarpast. Það var prentað á sérstaka afmælisboli. Einnig var
þetta tækifæri notað til að ljúka við og hengja upp glerlistaverk sem listamaðurinn
Jónas Þórir á heiðurinn af en byrjað var á því í tilefni af því að Reykjavík var
menningarborg árið 2000.
Afmælishátíðin sjálf hófst klukkan tíu með því að nemendur 1.- 4. bekkja röðuðu
sér í stigann í anddyrinu og sungu nokkra afmælissöngva. Því næst tóku við atriði
á sal þar sem nemendur í 5. og 6. bekkjum sýndu leikrit. Þar á eftir var öllum boð-
ið út í stórt tjald á skólalóð þar sem beið risastór afmælisterta. Einnig var búið að
koma fyrir stórum leiktækjum og hoppköstulum á skólalóðinni en þau voru af-
mælisgjöf frá versluninni 10-11 og Búnaðarbankanum. Klukkan ellefu tóku við
atriði á sal sem 7.-10. bekkir sáu um. Síðan hélt hátíðin áfram til klukkan 12:40.
Allir skemmtu sér vel og ekki spillti veðrið sem var með allra besta móti þrátt
fyrir slæmar veðurspár dagana á undan.
Hrund Hlöðversdóttir
Allir snjallir - Hamraskóli tíu ára
Frétt