Monitor - 02.09.2010, Side 10

vera að hlusta á Gufuna í unglingavinnunni. Þá var
ég alltaf að hlusta á útvarpsleikhúsið sem mér finnst
alveg geggjað dæmi. En mönnum fannst ég algjör fáviti
að vera að hlusta á Ríkisútvarpið en ekki FM957 eða
eitthvað svoleiðis.
Þú hefur áður talað um að þú hafir lent í einelti á
þínum yngri árum í Austurbæjarskóla og verið tekinn
fyrir af því að pabbi þinn er prestur.
Já, ég var kallaður „prestadjöfull“ og svona. Ég veit
samt ekki hvort ég á að þora út í þessa umræðu. Ég
opnaði mig um þetta í viðtali um daginn og fékk í
kjölfarið símtal frá skólastjóranum sem var ekki sáttur
við þá frásögn mína. En einelti er auðvitað mál sem
má aldrei þagga niður, það á alltaf að tala um það. Það
má samt koma fram að mér finnst Austurbæjarskóli
frábær skóli, ég var heppinn með kennara og á mjög
góðar minningar yfir það heila, þó að það hafi verið
erfið tímabil inn á milli.
Var þetta alvarlegt?
Þetta var voða mikið í orðum, en ég var alveg tekinn
fyrir og það var setið fyrir mér eftir skóla. Þetta fór
leynt. Þeir náðu mér einum, kannski þegar ég var að
labba heim úr skólanum og ég var látinn biðja fyrir
mér fyrst að ég var svona vel tengdur. En ég náði alveg
að hrista þetta af mér. Ég vorkenndi þeim bara hvað
þeir voru hallærislegir að gera þetta. En það gleymist
oft í umræðunni um einelti að bæði gerandinn og
þolandinn eru fórnarlömb. Manneskjau sem leggur
aðra manneskju í einelti hlýtur að líða mjög illa.
Þú ert mikill fjölskyldumaður og
nýlega kvæntur, ekki satt?
Jú. Ég giftist konunni minni í fyrrasumar og við eigum
saman strák sem verður tveggja ára núna í september.
Mér finnst allt sem hann gerir skemmtilegt og ég
hlakka til á hverjum morgni að vakna með honum og
heyra snilldina sem hann kemur með. Konan mín er
hjúkrunarfræðingur og er að læra að verða ljósmóðir,
sem mér finnst einhver flottasti starfstitill sem til er.
Ég held að þú finnir ekki magnaðara starf en þetta,
að verða vitni að kraftaverkum hvern einasta dag.
Á meðan er ég bara að segja brandara eða að syngja
eitthvað lag og maður bara skammast sín við hliðina
á henni.
Hvernig baðstu konunnar þinnar?
Ég klúðraði því svolítið. Þetta var þegar við bjuggum
á Akureyri. Hún var að koma heim frá Bandaríkjunum
og ég sótti hana á flugvöllinn. Við fengum okkur að
borða og svo fór ég með hana í bíltúr. Við keyrðum um
Akureyri og fórum svo hinum megin við Pollinn upp í
Vaðlaheiði. Ég var alveg búinn að plana þetta maður,
með hringinn í vasanum og svakalegur gæi. Svo stoppa
ég bílinn og ætlaði að fá hana með mér út úr bílnum,
þar sem við vorum með útsýni yfir Akureyri og ég
ætlaði að biðja hennar þar. Ég spurði hvort við ættum
ekki að kíkja aðeins út, en hún sagði: „Nei, það er svo
kalt úti.“ Byrjaði ekki vel, en ég sannfærði hana um að
koma út úr bílnum. Svo sný ég að henni og þá fer hún
með höndina í átt að jakkanum og ég stressast allur
upp, sný mér hratt undan og bara: „Hvað ertu að gera?“
Því ég var með hringinn í jakkavasanum. Þannig að
hún spurði: „Bíddu hvað ertu með þarna?“ Þá dró ég
fram hringinn. Ég var ekki alveg eins kúl og ég hafði
hugsað mér. En engu að síður sagði hún já, við giftum
okkur og erum voða hamingjusöm í dag. Þannig að allt
fór vel að lokum.
10 Monitor FIMMTUDAGUR 2. SEPTEMBER 2010
Þeir náðu mér
einum, kannski
þegar ég var að labba
heim úr skólanum og
ég var látinn biðja fyrir
mér fyrst að ég var
svona vel tengdur.