Fréttablaðið - 17.05.2014, Qupperneq 102

17. maí 2014 LAUGARDAGUR| LÍFIÐ | 70
„Mig langar að verða víðsýnni og
nýta sumrin á meðan ég er í laga-
deild til að prófa eitthvað nýtt,“
segir laganeminn Áslaug Arna
Sigurbjörnsdóttir. Hún hefur ráðið
sig í sumarstarf hjá lögreglunni á
Hvolsvelli og tekur til starfa í lok
þessa mánaðar.
„Þetta var búinn að vera leynd-
ur draumur í smá tíma. Ég held að
þetta sé mjög gefandi starf og felst
mikið í að hafa samskipti við fólk.
Ég held að þetta henti mér vel því
ég er mjög félagslynd. Ég er mjög
spennt fyrir þessu starfi því þetta
getur bæði verið erfitt og gleðilegt.
Ég er nokkuð lífsreynd eftir það
sem ég hef gengið í gegnum þannig
að ég tel mig geta sinnt þessu vel,“
segir Áslaug en hún ræddi opin-
skátt um veikindi í fjölskyldu sinni
í þættinum Prófíl á PoppTV í síð-
asta mánuði.
Áslaug segir ráðningarferlið
hafa verið skemmtilegt og krefj-
andi en auk hefðbundins vinnuvið-
tals þurfti hún að þreyta þrekpróf.
„Þrekprófið var blanda af
ýmsum stöðvaæfingum, hlaupi,
sundi og ýmsu öðru. Það reyndi á
en er alveg gerlegt fyrir þá sem eru
ekki algjör sófadýr. Ég bjó allavega
vel að því að hafa hreyft mig eitt-
hvað,“ segir Áslaug glöð í bragði.
Áslaug flytur til Hvolsvallar í
sumar en býst við því að kíkja til
Reykjavíkur í vaktafríum endrum
og eins. Hún segir þessa reynslu
líka nýtast sér í náminu.
„Það hefur lengi tíðkast að laga-
nemar starfi hjá lögreglunni yfir
sumartímann. Faðir minn, Sigur-
björn Magnússon, gerði þetta líka
á sínum tíma enda er þetta góð
reynsla. Í laganáminu lærum við
um margt sem tengist störfum lög-
reglunnar. Í þessu starfi er maður
í samskiptum við stóran hóp af fjöl-
breyttu fólki og ég er mjög spennt
fyrir sumrinu.“
liljakatrin@frettabladid.is
Úr lögfræði í lögguna
Áslaug Arna Sigurbjörnsdóttir hefur ráðið sig í
sumarstarf hjá lögreglunni á Hvolsvelli. Faðir hennar,
Sigurbjörn Magnússon, gerði slíkt hið sama áður.
LAGANNA VÖRÐUR Áslaug segir það
hafa tíðkast í gegnum tíðina að laga-
nemar starfi hjá lögreglunni á sumrin.
MYND/ÚR EINKASAFNI
Ég er mjög spennt
fyrir þessu starfi því
þetta getur bæði verið
erfitt og gleðilegt. Ég er
nokkuð lífsreynd eftir
það sem ég hef gengið í
gegnum þannig að ég tel
mig geta sinnt þessu vel.
Áslaug Arna Sigurbjörnsdóttir
„Þetta byrjaði þegar ég hitti full-
trúa útgáfufélagsins Klett-Cotta
sem höfðu verið að gefa út eitt-
hvað af íslenskum bókum,“ segir
Jón Gnarr borgarstjóri, en bókin
hans, Hvernig ég varð borgarstjóri
á Íslandi og breytti heiminum, kom
út á ensku á dögunum.
„Þeir spurðu hvort ég myndi
íhuga að gefa út bók sem varp-
aði lítils háttar ljósi á hvað Besti
flokkurinn væri og gæti sagt fólki
frá þessu. Mér fannst það bara svo
sniðugt að ég féllst á þetta,“
segir Jón og bætir því við að
hann hafi verið mikið spurður
hvort bókin kæmi ekki líka út
á íslensku.
„Ég býst ekki við því, þetta
er meira svona upptalning á því
sem hefur gerst og því kannski
engar fréttir fyrir Íslendinga,“
segir borgarstjórinn. „Ég hef
ekki beint haft neinn gríðarlegan
tíma til þess að sitja við skriftir
þannig að þetta er svona samsuða
úr ýmsum greinum og viðtölum
sem birst hafa áður hér,“ segir Jón
um bókina. „Þetta er svona lítið
kynningarrit um Ísland, Reykja-
vík, mig og Besta flokkinn.“
Sjálfur hefur Jón tekið eftir aukn-
um áhuga erlendra fræðimanna
á störfum hans sem borgarstjóra.
„Sérstaklega í Bandaríkjunum,
þeir hafa líka smekk fyrir ein-
hverju sem er frumlegt og óvenju-
legt,“ segir Jón. „Ég fæ líka mikið
af fyrirspurnum frá Toronto, núna
er borgarstjórinn þeirra í meðferð
við krakkfíkn sinni og þau eru lík-
legast að velta því fyrir sér hvort
annar maður
væri hugsan-
lega betri í starfið.“
Spurður hvort Besti flokkurinn
komi til með að starfa á alþjóðleg-
um vettvangi segir Jón það vera
ólíklegt. „Ég held að þetta verði ekki
endurtekið með þessum hætti, þetta
var svo mikið magic-móment.“ segir
Jón. „Mér finnst þetta bara allt svo
einstakt, Besti flokkurinn og þetta
ævintýri hérna heima, þannig að ég
held að allar aðrar tilraunir yrðu
léleg eftirlíking.“ baldvin@frettabladid.is
Hvernig Jón Gnarr
breytti heiminum
Bók borgarstjórans Jóns Gnarr var nýlega gefi n út á ensku en Jón lýsir bókinni
sem litlu kynningarriti um Ísland, Reykjavík, hann sjálfan og Besta fl okkinn.
BESTI BORGARSTJÓRINN Jón Gnarr vekur gríðarlega
athygli erlendis.
Ég fæ líka mikið af
fyrirspurnum frá Tor-
onto, núna er borgar-
stjórinn þeirra í meðferð
við krakkfíkn sinni og
þau eru líklegast að velta
því fyrir sér hvort annar
maður væri hugsanlega
betri í starfið.
Jón Gnarr
STÓRSTJARNA Í
ÍSLENSKUM SÖNGLEIK
Stórleikkonan Cady Huffman leikur eitt
aðalhlutverkið í íslenska söngleiknum
Revolution Inside the Elbow of Ragnar
Agnarsson Furniture Painter, sem frum-
sýnt verður í New York síðar í ágúst.
„Þetta eru frábærar fréttir, það er rosa-
lega mikill heiður og viðurkenning að fá
hana í verkið,“ segir Karl Pétur Jónsson,
framleiðandi verksins.
Um 500 manns komu
í prufur fyrir verkið.
„Okkur leið eins og
litlum skólastrákum
þegar við sáum hana
mæta í prufuna. Hún
söng eins og engill.“
- glp
LEITA ENN AÐ BILLY
ELLIOTT
Leikstjórinn Bergur Þór Ingólfsson
og aðrir aðstandendur söngleiksins
Billy Elliott, sem verður frumsýndur í
Borgarleikhúsinu í mars, leita nú enn
að hinum íslenska Billy Elliott.
Alls 75 börn komust í gegnum
fyrstu síu leikhússins
og í dag og á morgun
munu þau þurfa að
syngja, leika
og dansa fyrir
framan breska
ballettkennarann
Elizabeth Greasley
og Lee Proud, dans-
höfund úr Mary
Poppins. - hg
GRILL, GIGG OG
FH-LEIKURINN
Heiðar Örn Kristjánsson, söngvari og
gítarleikari hljómsveitarinnar Pollapönks
og Eurovision-fari, eyddi gærkvöldinu
heima hjá móður sinni þar sem hann
borðaði grillmat og slakaði á í heita
pottinum með fjölskyldunni. „Það var
fyrst á dagskrá eftir þessa ævintýraferð
að slaka á í pottinum með fjölskyld-
unni,“ segir Heiðar. Hann og
aðrir meðlimir Pollapönks
ætla að spila á Olís í Álf-
heimum klukkan þrjú í dag
og á sunnudag ætlar Heiðar
að sjá FH spila gegn ÍBV
í Kaplakrika. „Svo ætlum
við að hittast, Eurovision-
teymið, og grilla saman á
sunnudagskvöld.“ - hg
„Þetta er
ástæðan fyrir
því að ég gekk
í herinn– ég er
ekki mjög fljótur
að slá inn texta í
tölvu.“
HARRY BRETA-
PRINS ÞEGAR HANN
TÍSTI Í FYRSTA SINN Á
BLAÐAMANNAFUNDI
INVICTUS-LEIKANNA.