Skólavarðan - 01.08.2009, Blaðsíða 12
12
SKÓLAVARÐAN 5.TBL. 9. ÁRG. 2009
NÁMSGÖGN
Það er í einu orði sagt ofboðslega skemmti-
legt að sækja Skólavefinn heim. Andrúms-
loftið er kokteill af frumkvöðlahugsun,
gleði, samvinnu og því besta frá staðal-
myndinni af nörd, áráttukenndum áhuga á
viðfangsefninu. Á þriðja þúsund íslenskra
heimila eru með áskrift hjá Skólavefnum
og fer fjölgandi þegar líður á skólaárið.
Um 95 prósent grunnskóla á landinu
nota Skólavefinn, leikskólar hafa sína eigin
síðu á vefnum og nú er kominn undirvefur
fyrir framhaldsskólann, Framhaldsskóli.is.
Skólavefurinn er því farinn að þjónusta
nemendur frá leikskóla og að háskóla.
Það var heitt á könnunni þegar ég datt
inn og spjallaði við þá Pál Guðbrandsson
markaðs- og kynningarstjóra og Ingólf B.
Kristjánsson ritstjóra og námsefnishöfund.
„Okkar kredda,“ sagði Páll, „er að nýta alla
miðla. Hljóð, mynd, hreyfimynd og gagn-
virkt tölvuefni.“ „Þannig teljum við að við
getum náð til sem flestra nemenda,“ bætir
Ingólfur við. „Ef þú lærir ekki af því að lesa
efni getur verið að það opnist fyrir þér ef
þú heyrir það lesið upp fyrir þig. Og svo
framvegis.“ „Ingólfur er algjör hamhleypa til
verka,“ segir Páll brosandi. „Hann setur inn
nokkra nýja efnisþætti á dag. Enda erum við
að fara að endurnýja viðmótið okkur til að
koma þessu öllu fyrir á sem mest aðlaðandi
og aðgengilegastan máta.“
Að losna úr fjötrum
Fleiri nýjungar eru hjá Skólavefnum en fram-
haldsskólavefurinn og má þar fyrst nefna
heildstætt námsefni í íslensku fyrir miðstig
grunnskóla, 5. - 7. bekk, sem er byrjað að
kenna í Sjálandsskóla og fer í útgáfu nú
í september. Þetta eru þrjár lesbækur og
þrískipt vinnubók á lausblöðum, allt til að
setja í möppu. Námsefnið tekur til allra
þátta námskrár og framsetning þess er með
öðrum hætti en áður hefur tíðkast. Allir textar
lesbókanna eru fánlegir sem hlustunarskrár
á neti í þremur útgáfum, lesnir upp af konu,
af karli og loks í hægum lestri. Það sem
hefur vakið sérstaka athygli og ánægju meðal
kennara er meðal annars að allir nemendur
hafa eins útlítandi möppur þótt þeir séu ekki
allir með samskonar námsefni og þar með
eru þeir nemendur sem vinna ef til vill hægar
eða á annan hátt ekki sérmerktir sem slíkir.
Aukaverkefni eru til í fleiri útgáfum á vefnum,
bæði léttari og þyngri en grunnurinn, þau
er hægt að prenta út og smella í möppuna.
Auk þess eru til lesbækur með stærra letri
og auknu bili á milli orða. Í fyrstu atrennu
verður nýbúastuðningur á ensku og pólsku
og fyrirhugað er að bæta fleiri tungumálum
við. Efnisspurningar og orðskýringar eru á
þessum tungumálum auk íslensku og á vef
er einnig hægt að fá hugtakaskýringar á
öllum tungumálunum þremur. Gagnvirkni er
í hávegum höfð og öll verkefni sem á annað
borð geta verið gagnvirk eru sett á vefinn í
því formi. Höfundar heildstæða íslensku-
námsefnisins eru þeir Baldur Hafstað. Ing-
ólfur B. Kristjánsson, Sigurður Konráðsson
og Þórður Helgason. Námsefnið dregur nafn
sitt af fjötrunum sem héldu Fenrisúlfi: Læð-
ingur, Drómi og Gleypnir. Það má því að segja
að fjötrar fáviskunnar losni af manni, einn af
öðrum, eftir því sem náminu vindur fram!
Bókaútgáfa, saga og stærðfræði
Að frátaldri vefútgáfu er Skólavefurinn er líka
farinn að prenta námsbækur. Gagnvirkni er á
milli vefjarins og prentbókanna, því öllum bók-
unum fylgir stuðningsefni á vef og margar
þeirra eru líka fáanlegar sem vefbækur.
Prentútgáfan hófst í fyrra og búið er að gefa
út tuttugu og sex titla. Nú þegar hafa verið
seldar um fimmtán þúsund bækur.
Í deiglunni er námsefni þar sem öll
Íslandssagan er tekin fyrir, ein öld í senn.
Mikið er stuðst við tímalínur í þessar metn-
aðarfullu útgáfu sem lítur dagsins ljós á vetri
komanda og er fyrir nemendur frá og með 5.
bekk og upp í framhaldsskóla.
Þá er um það bil að verða tilbúið námsefni
um heimsstyrjaldirnar tvær. Dr. Geir Sigurðs-
son á veg og vanda af þessu efni og systir
hans, Mjöll Gunnarsson kvikmyndagerðar-
maður og veitingahúsaeigandi í Kólombíu,
hefur tekið heimildaviðtöl í mynd við breska
hermenn og gyðinga af meginlandinu sem
flúðu til Bretlands í seinni heimsstyrjöldinni.
Þess má geta til gamans að argentínskur
unnusti Mjallar hefur myndskreytt talsvert
fyrir Skólavefinn.
Á vefnum Framhaldsskóli.is eru tveir magn-
aðir stærðfræðivefir.
Annar heitir Stærðfræðiskýringar. Þar eru
útskýrð öll helstu hugtök sem nemendur í
efri bekkjum grunnskólans og fyrstu áföng-
um framhaldsskóla eiga að ná tökum á í
stærðfræði, bæði í texta og með mynd-
bandskennslu. Þetta eru alls um áttatíu hug-
tök og eitt til fjögur kennslumyndbönd fylgja
hverju verkefni.
Hinn vefurinn heitir Stærðfræðikennarinn.
Þetta námsefni er samið af kennurum í ellefu
breskum háskólum með gífurlega háum ríkis-
styrkjum. Skólavefurinn.is festi kaup á því síð-
asta vetur en það skemmtilega er að grunn-
hugmyndin er fyllilega sambærileg við Stærð-
fræðiskýringar. Stærðfræðikenninn tekur við
þar sem Stærðfræðiskýringum sleppir og kynn-
ir til sögunnar flóknari hugtök.
Ingólfur og Páll hvetja nemendur, kenn-
ara og foreldra til að hringja eða senda
tölvupóst ef vantar upplýsingar um eitthvað
tengt Skólavefnum.is og Framhaldsskóla.
is. „Við heimsækjum líka skóla,“ segja þeir
félagar sem hafa farið vítt og breitt þessara
erinda á stór-Reykjavíkursvæðinu og einnig
á haustþing til Akureyrar og víðar. Síminn
er 551 6400 og netfangið skolavefurinn@
skolavefurinn.is
keg
Skólavefurinn.is
Stjórn Námsleyfasjóðs hefur ákveðið að
við úthlutun verði sett í forgang nám sem
tengist kennslu í lestri og læsi.
Skal allt að 1/3 námsleyfa úthlutað
vegna þessa. Umsækjandi, sem æskir
námsleyfis, skal fullnægja eftirfarandi
skilyrðum og skuldbindingum, sbr. reglur
Námsleyfasjóðs:
Hafa gegnt kennslustarfi í 10 ár samtals, í
eigi minna en hálfu starfi, og verið í starfi
sl. fjögur ár.
Vera fastráðinn starfsmaður sveitarfélags
eða aðila sem stofnað er til með samstarfi
sveitarfélaga og taka laun samkvæmt
kjarasamningi Launanefndar sveitarfélaga
og Kennarasambands Íslands vegna
grunnskólans.
Ljúka 60 ECTS eininga háskólanámi
eða sambærilegu námi, miðað við 1/1
námsleyfi, og skal námið miða að því að
nýtast viðkomandi í því starfi sem hann er
Námsleyfi grunnskólakennara og skólastjórnenda 2010–2011
ráðinn til að sinna.
Að loknu námsleyfi skal námleyfishafi
senda stjórn sjóðsins innan fjögurra
mánaða staðfest vottorð skóla um nám í
námsleyfinu.
Enginn getur fengið hærri fjárhæð í
námsleyfi en sem nemur tveggja ára föstum
launum á starfsævi viðkomandi.
Laun í námsleyfi miðast við starfshlutfall
námsleyfisþega næsta ár áður en námsleyfi
hefst eða meðaltal síðustu þriggja ára ef
það er hærra.
Umsækjendum er gert að sækja um á
rafrænu formi. Rafræn umsóknareyðublöð
er að finna á heimasíðu Sambands
íslenskra sveitarfélaga www.samband.is.
Nánari upplýsingar um Námsleyfasjóð veitir
Guðfinna Harðardóttir í síma 515 4900
eða í tölvupósti á gudfinna.hardardottir@
samband.is.
Umsóknarfrestur um námsleyfi grunnskólakennara og stjórnenda
grunnskóla fyrir skólaárið 2010–2011 er til og með 12. október 2009.
Páll Guðrandsson markaðs- og kynningarstjóri,
Jökull Sigurðsson framkvæmdastjóri og Ingólfur B.
Kristjánsson ritstjóri og námsefnishöfundur.