Lindin - 01.04.2008, Blaðsíða 5

ÁRSÆLL AÐALBERGSSON,
FRAMKVÆMDASTJÓRI VATNASKÓGAR
Mikill meðbyr með Vatnaskógi
Hvernig gengur undirbúningur fyrir sumarið
hjá Skógarmönnum?
„Jú bara mjög vel, nú þegar nýtt starfstímabil er að hefjast horfum við Skógarmenn
bjartsýnir fram á veginn, það er gott ár að baki. Starfsemin er sífellt í vexti og margar nýjungar undanfarinna ára
hafa fest sig rækilega í sessi. Fermingarnámskeiðin hafa aldrei verið eins vel sótt en liðlega 2500 börn tóku þátt á
liðnu ári. Vegna mikillar aðsóknar á feðgahelgar verða þær þrjár talsins í haust og skráning á feðginahelgi sem og
almennt í sumarbúðirnar fer frábærlega af stað.
Við skynjum líka óvenju góðan meðbyr með starfinu um þessar mundir, margir hafa sent tölvupósta eða komið að
máli við okkur og þakkað fyrir starfið sem við vinnum í Vatnaskógi. Sú umræða um kristna fræðslu í skólum og
miðlun trúararfsins til nýrra kynslóða hefur líka vakið fólk upp af værum blundi. Margir nefna að þau vilji að barnið
sitt alist upp í þeirri trú og þeirri von sem Skógarmenn hafa miðlað í yfir 85 ár. Við erum stolt af því góða kristilega
starfi sem við stöndum fyrir. "
Nú er húsbygging á dagskrá, hvernig gengur það?
,,Jú við finnum fyrir mikilli velvild víða og margir ætla að leggja verkefninu lið með einhverjum hætti. Bæði með
vinnu við hönnun hússins og einnig hafa menn boðið fram aðstoð við byggingu þess. Þá má geta þess að fjölmargir
hafa ákveðið að taka jeátt í söfnun í Skálasjóð Skógarmanna með því að leggja fram ákveðið framlag í hverjum
mánuði. Verkefnið er stórt að sniðum og 40 milljónir sem uppá vantar. Eitt af markmiðum með útgáfu þessa blaðs er
að fá fleiri til þess að styðja við Skálasjóðinn og gerast velunnarar Vatnaskógar."
5