Feykir - 16.06.2020, Blaðsíða 6

Heilir og sælir lesendur góðir.
Höfundur fyrstu vísu að þessu sinni er
Jón Arason sem var verka- og erfiðis-
vinnumaður í Reykjavík og fóru að birtast
eftir hann ágætar vísur í kringum 1950 en
þá mun hann hafa verið kominn yfir sjötugt.
Byrjum á þessum hollráðum Jóns til okkar
hinna:
Markið settu himinhátt
harma léttu í nauðum.
Svangan metta, ef saðning átt,
silfrið réttu snauðum.
Af því muntu öðlast hrós,
auðgast dyggðum sönnum.
Viljirðu þitt litla ljós
Lýsi öðrum mönnum.
Í næstu vísu Jóns lýsir hann vandamáli sem
flest okkar kannast við:
Ef ég reyni að yrkja gott
enginn vill það heyra.
Geri ég níð og napurt spott
nær það hvers manns eyra.
Veit ekki hvort svar hefur fengist við næstu
spurningu:
Vandasamt því verður hér
vel úr málum skera.
Hvort er betra, herm þú mér
hvað á ég að gera?
Nú, kannski nær 70 árum eftir að þessar
vísur eru ortar, hafa margir fengið að
kynnast því sem Jón telur ráðlegast í næstu
vísu:
Setti ég kjaftinn sóttkví í
sem er réttur vegur,
yrði ég talinn allt að því
óaðfinnanlegur.
Að lokum þessi alvarlega en vel gerða
hringhenda eftir Jón:
Hárin grána, hallar leið
hels að ránarslóðum.
Valt er lán en vökin breið,
vegurinn skánar óðum.
Ein hringhenda kemur hér enn og mun
höfundur hennar vera Hálfdán Bjarnason,
kenndur við Bjarghús:
Oft er vökult auga um nótt
og á hrökum vörnin.
Mínar stökur fæðast fljótt,
framhjátöku börnin.

Man eftir annarri hringhendu eftir Hálfdán:
Oft er dreymin innsta þrá
af því gleymist skuggi.
Stakan sveimar ofan á
andans heimabruggi.
Það er Tómas R. Jónsson á Blönduósi sem
er höfundur að næstu vísu. Er hann þar
að gantast við sinn góðvin, Skarphéðin
Einarsson, sem var næsti nágranni.
Ég hef séð þess vísan vott
á vorum kjaftafundum.
Að Skarphéðinn vill gera gott
en gleymir því bara stundum.
Ekki var okkar góði vinur og félagi,
Skarphéðinn, lengi að svara:
Víða brotinn veit ég pott
vil sem dæmi taka,
að Tómas mörgum gerir gott
en grípur sumt til baka.
Sigurður Jónsson sem kenndur var við
Katadal kom, skömmu eftir að hann gifti
sig, til kirkju. Var þá sá siður að heilsa öllum
með kossi. Heilsaði Sigurður konum með
handabandi en körlum með kossi. Er hann
var spurður hverju það sætti varð þessi vísa
til:

Ekki kyssa mey ég má
mér er skylda að baki.
Aðeins finna ylinn frá
einu handartaki.
Önnur vel gerð vísa, hringhenda, kemur
hér eftir Sigurð. Mun hann þá hafa verið að
virða fyrir sér unga, ógifta stúlku.
Böl er sveinum bið og hik
best í leynum gengur.
Þetta eina augnablik
ætti að treinast lengur.
Geta lesendur sagt mér af hvaða tilefni
næsta vísa er ort? Sé í dóti mínu að höfundur
hennar sé Skúli Þorsteinsson.
Oft frá menntamálaráði
margur napra kveðju hlaut.
Bestu skáld þeir hafa að háði
en Helga fyrir ráðanaut.
Það mun hafa verið Pétur Stefánsson sem
orti svo flotta vorvísu:
Sólarljóminn signir grund
í sælli rjómablíðu.
Fuglar óma, létt er lund
lifna blómin fríðu.
Víða kemur fram böl fólks af Kínapestinni.
Karl Kristinsson segir svo frá sínu böli:
Ég kemst ekki út að keyra
hvað þá nú heldur meira.
Ég kúldrast hér inni
með konunni minni.
Hún er voðaleg þessi veira.
Geta lesendur sagt mér hver er höfundurinn
að þessari?
Vekjum hlátur, vekjum grín,
víkja látum trega.
Brögðum kátir brennivín
bara mátulega.
Gaman finnst mér þá að enda með
játningu okkar góða vinar hér áður fyrr á
Sauðárkróki, Kristjáns Runólfssonar:
Í gærkvöldi Bakkusi lagði ég lið
lengi ég drakk af hans brunni.
Komst þó á fætur og kannaðist við
koníaksbragðið í munni.
Veriði þar með
sæl að sinni.
/Guðmundur
Valtýsson
Eiríksstöðum,
541 Blönduósi
Sími 452 7154
Vísnaþáttur 762
( GUÐMUNDUR VALTÝSSON ) palli@feykir.is
Júlíus Aðalsteinn Róbertsson. MYND: ÚR EINKASAFNI
6 24/2020
Júlíus Aðalsteinn Róbertsson hefur
heldur betur þvælst um heiminn
síðustu ár með gítarinn að vopni í
slagtogi með félaga sínum, Ásgeiri
Trausta. Júlíus fæddist árið 1986,
sonur Hafdísar Brynju Þorsteinsdóttur
og Róberts Júlíussonar, ólst upp og bjó
í Hrútafirði í Húnaþingi vestra allt þar
til sumarið 2012. Hann er nú búsettur
í „Reykjavík fyrir sunnan“ eins og hann
segir sjálfur.
„Mitt aðalhljóðfæri er gítar. Kann
eitthvað á píanó, aðeins meira á bassa en
þótti hins vegar efnilegur trompetleikari
á yngri árum, mætti alveg dusta rykið
af allskonar,“ segir Júlíus. Spurður um
helstu afrekin á tónlistarsviðinu segir
hann: „Hef mikið spilað opinberlega og
samið texta fyrir Ásgeir Trausta Einarsson
frá því hann kom fram á sjónarsviðið
2012 og ferðast nokkra hringi í kringum
hnöttinn. Dunduðum við það í einhverja
daga á einhverjum túrnum að telja
saman og skrásetja alla tónleika sem
Ásgeir projectið hefur spilað frá upphafi
og ef COVID-19 hefði ekki skollið á
hefði Ásgeir bandið spilað tónleika nr.
500 þann 14. maí síðastliðinn. Þannig
að það hefur ýmislegt verið brallað þar.
Annars þykir mér líka voðalega vænt
um allskonar opinberar uppákomur og
skemmtanir sem ég hef fengið að taka
þátt í á síðustu árum í heimasveit.
Hvaða lag varstu að hlusta á? -Crazy
Crazy Nights með Kiss. Búinn að vera
með það fast á heilanum ON og OFF í
nokkrar vikur.
Uppáhalds tónlistartímabil? -Veit
það ekki alveg en síðustu misseri hef
ég mikið verið að stunda útihlaup með
„headphone“ á hausnum og hefur ´90
rokk og metall orðið mikið fyrir valinu. Það
er voðalega misjafnt hvað ég fíla hverju
sinni.
Hvaða tónlist fær þig til að sperra
eyrun þessa dagana? -Hef soldið verið
að skoða Auður (Auðunn Lúthersson) og
GDRN (Guðrún Ýr Eyfjörð Jóhannesdóttir)
síðustu misseri, skemmtilegt stöff.
Hvers konar tónlist var hlustað á á
þínu heimili? -Það var mikið um folk
og country tónlist svona þegar ég fer að
pæla í því. Bubbi Morthens, KK, Hörður
Torfason, Johnny Cash, Willie Nelson,
Kris Kristofferson, Bob Dylan, svona það
helsta.
Hver var fyrsta platan/diskurinn/
kasettan/niðurhalið sem þú keyptir
þér? -Minnir að það hafi verið Follow the
Leader með Korn.
Hvaða græjur varstu þá með? -Það var
samtíningur af einhverjum hátölurum,
Technics magnara og ferðageislaspilara
sem var ekki með hristivörn. Hágæða
„ghetto rig“.
Hvert var fyrsta lagið sem þú manst eftir
að hafa fílað í botn? -Mýrdalssandur
með hljómsveitinni GCD. Myndbandið
var mesta rokk sem ég hafði séð á þeim
tíma, vasaklútar, gallajakkar og leður.
Hvaða lag getur eyðilagt fyrir þér daginn
(eða fer óstjórnlega í taugarnar á þér)?
-Lagið Aðfangadagskvöld í flutningi Helgu
Möller. Hef ekkert á móti henni en lagið
gerir mig bara alveg sturlaðan.
Þú heldur dúndurpartí í kvöld, hvað
læturðu hljóma í græjunum til að
koma öllum í stuð? -House of Fun með
hljómsveitinni Madness, það kemur mér
allavega í stuð.
Þú vaknar í rólegheitum á
sunnudagsmorgni, hvað viltu helst
heyra? -House of Fun með Madness.
Þú átt þess kost að fara hvert sem er
í heiminum og skella þér á tónleika.
Hvert færirðu, á hvaða tónleika og
hvern tækirðu með þér? -Veit ekki hvert
ég myndi fara en ég hugsa að ég myndi
fara á tónleika með Rammstein. Sá þá
árið ´01 og hefur alltaf langað að sjá þá
aftur. Hugsa hreinlega að ég færi bara
einn, finnst voðalega næs að fara einn á
tónleika og aðra viðburði.
Hvað músík var helst blastað í bílnum
þegar þú varst nýkominn með bílpróf?
-Platan Vulgar Display of Power með
hljómsveitinni Pantera.
Hvaða tónlistarmaður hefur þig dreymt
um að vera (eða haft mest áhrif á þig)?
-Það myndi vera sænskur maður sem
heitir Kristian Matsson og kallar sig The
Tallest Man On Earth. Heillaðist af tónlist
hans, textum og spilamennsku sem hafði
mikil áhrif á hvernig ég spila á gítar í dag
og eins hvað varðar textasmíðar.
Hver er að þínu mati besta plata sem
gefin hefur verið út (eða sú sem skiptir
þig mestu máli)? -Þykir voðalega vænt
um plötuna The Wild Hunt með The
Tallest Man On Earth. Kenndi mér margt.
Sex vinsælustu lögin á Playlistanum
þínum?
The Tallest Man On Earth - Love is all
Johnny Cash - Hurt
Auður - Enginn eins og þú
Hjálmar - Vísa úr Álftamýri
Pantera - Becoming
Rammstein - Reise, reise
Júlíus Aðalsteinn Róbertsson / gítarinn
Undir áhrifum The Tallest Man On Earth
( TÓN-LYSTIN ) oli@feykir.is