Austurglugginn - 19.08.2021, Qupperneq 3

Fréttir frá Fjarðaáli
Ábyrgðarmaður: Dagmar Ýr Stefánsdóttir
Farfuglarnir hjá Fjarðaáli
BRÍET SIGURJÓNSDÓTIR
Fólkið er það besta við
vinnuna
Bríet Sigurjónsdóttir gegnir stöðu
framleiðslustarfsmanns á E-vakt í
kerskála og þetta er hennar fyrsta
sumar hjá Fjarðaáli. Foreldrar
hennar, Sigurjón Rúnarsson og
Kristborg Bóel Steindórsdóttir
hafa reyndar báðir unnið hjá
fyrirtækinu en þau eru farin í önnur
störf. Stjúpmóðir hennar, Rebekka
Rán Egilsdóttir, er öryggisstjóri
Fjarðaáls.
Um ástæðuna að baki því að Bríet
hafi ákveðið að vinna í álverinu í
sumar, segir hún að það sé vegna
góðra tekjumöguleika og einnig
að margir af vinum hennar séu að
vinna þar. Hvað finnst henni best
við vinnuna hjá Fjarðaáli? „Fólkið
er án efa það skemmtilegasta við
vinnuna,“ segir hún afdráttarlaust.
„Stemningin er mjög góð og allt
fólkið sem ég vinn með er frábært.“
Og hvað finnst henni erfiðast?
„Það getur verið erfitt að vinna í
miklum hita, og eins og í flestum
störfum þá tekur tíma að venjast
svona líkamlegri vinnu.“ Það er
eflaust mikil breyting að fara úr
kyrrsetuvinnu eins og nám getur
verið í það að ganga fleiri kílómetra
á dag. Hvað hitann varðar og
aðgerðir til að gæta að hitaálagi,
segist Bríet reyna eins og hún getur
að drekka nægilega mikið af vatni
og taka góð hlé annað slagið til að
ná hitanum aðeins niður. „Síðan
er líka frábært að hægt sé að fá sér
frostpinna inn á milli,“ segir hún.
Skemmtilegur og
jákvæður vinnustaður
Bríet hefur lagt stund á nám í
Menntaskólanum á Egilsstöðum
og útskrifaðist þaðan með
stúdentsgráðu í maí. Hvað
framtíðina varðar segist hún
óákveðin en ætlunin sé að vinna hjá
Fjarðaáli til áramóta og fara síðan í
áframhaldandi nám og ferðast eins
og hún getur.
BERGUR ÁGÚSTSSON
Fjölbreytt vinna og
skemmtilegt fólk
Bergur Ágústsson hefur í sumar
unnið sem framleiðslustarfsmaður
á C-vakt í steypuskála. Þetta er
annað sumarið hans svo hann er
einn af farfuglunum og hyggst
snúa aftur næsta sumar. Hann var
einnig að
vinna hjá Fjarðaáli um jólin og
páskana. Um ástæðu þess hvers
vegna hann valdi að koma og vinna
hjá Fjarðaáli í sumar segir hann:
„Ég var búinn að heyra góða hluti
þannig ég ákvað bara að prófa og
sé ekki eftir því.“
Bergur er sammála Bríeti að
samstarfsfólkið skipti miklu máli,
þegar hann svarar spurningunni
um hvað sé skemmtilegast við
vinnuna. „Það skemmtilegasta er
sennilega hvað þetta er fjölbreytt
vinna og hvað ég er að vinna með
skemmtilegu fólki.“ Aðspurður
hvað sé það erfiðasta við vinnuna,
segir hann: „Hoppvaktirnar eru
sennilega það erfiðasta.“ Með
hoppvakt á Bergur við þegar aðeins
átta tímar eru milli vakta sem gerist
tvisvar í hverri vaktalotu þegar
skipt er milli nætur- og kvöldvakta
annars vegar og kvöld- og dagvakta
hins vegar.
Tvíburabróðir á annarri
vakt
Á veturna stundar Bergur nám til
stúdentsprófs í Menntaskólanum
á Egilsstöðum. „Ég veit ekki alveg
hver framtíðaplönin eru,“ segir
hann, „en ég á eftir sennilega að
mennta mig eitthvað meira og
koma svo alltaf í álverið í á sumrin.“
Í sumar hefur hitinn á
Reyðarfirði oft farið upp fyrir 20
stig og þá getur vinnuumhverfið
orðið heitt. Bergur segist glíma
við hitaálagið með því að drekka
vatn mjög reglulega. Hann segir
stemninguna mjög góða á vaktinni
sinni. Aðspurður hvort hann eigi
fjölskyldumeðlim hjá Fjarðaáli
segir hann að tvíburabróðir
hans, Eysteinn Ágústsson, sé á
B-vaktinni í steypuskála. Að lokum
spyrjum við: Hvernig myndir þú
lýsa vinnustaðnum Alcoa Fjarðaáli?
„Ég myndi lýsa honum sem
skemmtilegum og fjölbreyttum
vinnustað,“ svarar hann.
Á hverju vori, þegar skólaárinu lýkur, fyllast kerskáli, steypuskáli og skautsmiðja Fjarðaáls, ásamt fleiri stöðum á
álverssvæðinu, af ungu fólki sem er komið til að vinna yfir sumarið á meðan fastir starfsmenn taka sér frí og góða hvíld.
Sumir þessara tímabundnu starfsmanna hafa snúið aftur ár eftir ár eins og farfuglar og jafnvel komið í fullt starf að loknu
stúdentsprófi eða háskólanámi. Við tókum tvo af núverandi sumarstarfsmönnum tali til að kynnast þeim, draumum
þeirra og væntingum. Annar þeirra er „farfugl“ en hinn er að vinna í fyrsta skipti hjá Fjarðaáli, annar er karlmaður og
hinn er kona. Þess má geta að hlutfall kvenna í hópi sumarstarfsmanna er yfirleitt mun hærri (eða um 50%) en í hópi
fastra starfsmanna þannig að líkurnar aukast á því að Fjarðaáli takist að ná því takmarki sínu að hafa hlutfallið jafnt milli
kynjanna.
Bríet, sem er lengst til vinstri á myndinni, með hópi vinnufélaga að gæða sér á kælandi
frostpinnum á góðvirðisdegi í sumar.
Bergur Ágústsson ætlar að vinna í álverinu
næstu sumrin.