Austurglugginn - 04.10.2013, Qupperneq 13

AUSTUR · GLUGGINN Föstudagur 4. október 13
Hákon er borinn og barnfæddur í
Neskaupstað en flutti endanlega aftur
heim með tilvonandi manni sínum,
Hafsteini, fyrir tveimur og hálfu ári
síðan. Hann segir þá hafa verið að
brasast í ferðaþjónustu í nokkur ár
og eftir að þeir fluttu austur byrjuðu
þeir á því að taka að sér eina og eina
veislu, sem hefur svo sannarlega undið
upp á sig.
„Við keyptum svo matartrukk,
gamlan amerískan hertrukk, sem
við förum með hvert sem er í veislur
og á mannamót. Trukkurinn okkar
kallast Fjallkonutrukkurinn þar sem
hún kemst á fjöll og er matarleg.
Hún gerði það gott í sumar þó svo
við höfum ekki farið á eins margar
útihátíðir og við vildum, en þar sem
við komum vöktum við lukku. Fólk
er hissa á því að fá gæðaskyndibita
sem er afgreiddur fljótt.
Fljótlega vantaði okkur almennilegt
húsnæði til að geta framleitt meira
magn af mat og þá datt Mjólkurstöðin
upp í hendurnar á okkur. Um er
að ræða gömlu mjólkurstöðina í
bænum, en hún tengist okkur töluvert.
Langafi stóð fyrir byggingu hússins
og var kaupfélagsstjóri. Pabbi vann í
Mjólkurstöðinni í mörg ár og flestir
í fjölskyldunni hafa unnið hjá kaup-
félaginu á einhverjum tímapunkti.
Húsið hafði staðið autt í 10 ár og beið
þess eiginlega ekkert nema vera rifið.
Við vildum endilega bjarga húsinu
og lögðum gríðarlega vinnu í að
koma því aftur í lag. Við enduðum
svo með allt of stórt eldhús og þótti
því tilvalið að endurvekja gömlu
mjólkurbúðina. Við vissum að hér
vantaði ferskvöru – byrjuðum bara
með kjöt og fisk og svo höfum við
verið að færa okkur í sælkeravöru,
tilbúna rétti og take away.
Fyrirtækið heitir Hildibrand, í höfuðið
á langafa mínum, Hildibrandi Guðröði
kaupfélagsstjóra, sem er elskaður og
dáður innan fjölskyldunnar. Það kom
þó aldrei til greina að Mjólkurstöðin
myndi ekki halda nafni sínu, hún
verður aldrei annað.“
Ódýrari en kjöt- og fiskbúðir í
Reykjavík
Hákon segir bakbein fyrirtækisins
þó vera veisluþjónustuna. „Þó svo að
fólk sé mjög ánægt með búðina og
nýti sér hana töluvert, þá er hún ekki
nóg til að halda uppi svona fyrirtæki.
Búðin gleður og lífgar helling upp á
mannlífið. Hún er líka skemmtileg
fyrir þær sakir að okkur leyfist að vera
í tilraunaeldamennsku, gera kannski
tvo rétti af hverju og sjá hvað selst.
Við erum mjög samkeppnishæf á
markaði og erum alls ekki dýr sem
sérvöruverslun. Ég veit að við erum
alveg töluvert ódýrari en kjöt- og
fiskbúðir í Reykjavík og aðkomufólk
verður dolfallið yfir úrvalinu og verðinu.
Við bendum þeim á að við búum
í sjávarplássi og við gætum aldrei
selt þorskinn á 2000 krónur kílóið
og heimamenn njóta góðs af því.“
Rekjanleiki hráefnisins mikilvægur
„Við viljum sjá veisluþjónustuna
vaxa og dafna enn frekar. Við búum
mjög vel að vera með svona stórt og
öflugt eldhús sem getur framleitt
mikið. Það er líka einstakt að vera
með eldhús á hjólum þannig að við
getum í rauninni farið með veislur
hvert sem við viljum - alveg sama
hver aðstaðan er, þess vegna uppá
hálendi. Verkefnin okkar eru alltaf
að stækka og við erum orðin vel
samkeppnishæf við stærri fyrirtæki
í sama geira. Stærsti munurinn á
okkur og flestum er að við vinnum
allt frá grunni, heila skrokka og fisk
með sporð. Þó svo að matseðilinn
sé svipaður kaupum við nær ekkert
frosið eða tilbúið. Til dæmis byrja
litlu kjötbollurnar okkar sem skrokkur
sem við fáum í hendurnar, sem við
úrbeinum, hökkum og handrúllum.
Svona viljum við vinna - að halda
okkur við rekjanleika hráefnis, auk
þess að nota eins mikið austfirskt og
hægt er. Þetta teljum við gefa okkur
ákveðið forskot, gestirnir okkar finna
að þeir eru að borða hreinar afurðir.“
Brakandi ferskt og fjölbreytt úrval
Það er ekki hægt annað en fá vatn
í munninn þegar Hákon talar um
framleiðsluna. „Við framleiðum
vörurnar okkar á staðnum. Við erum
svo alltaf með kjöt- og fiskrétti í
borðinu hjá okkur, tilbúna í bakka,
vel útilátna og á mjög viðráðanlegu
verði. Einnig erum við með salöt,
ýmiskonar meðlæti – bæði sósur og
salöt og tilbúið grænmeti í ofninn.
Við höfum getið okkur góðs orðs
með skyrkökunum sem við búum
til. Mikið af þessum vörum myndu
henta í verslanir í kringum okkur og
jafnvel sumar á landsvísu.“
Litríkur ferill
En, af hverju ætli Hákon hafi endað
í matvælaiðnaði? „Æji úff,“ segir
Hákon og hlær. „Ég er svona út um
allt – ef ég væri barn væri ég pottþétt
greindur ofvirkur.“
Hákon segist alltaf hafa haft áhuga
á matargerð, en hann er alinn upp
í sveit og fékk að vera með ömmu
sinni að brasa í eldhúsinu. „Menn
sáu kannski snemma hvert krókurinn
beygðist og ég slapp við útiverkin.
Ég fékk svo smám saman frjálsari
hendur í eldhúsinu og var farinn að
elda ofan í fjölskylduna á kvöldin
þegar ég var unglingur.“
Að grunnskóla loknum vann Hákon
á hóteli á Skógum í þrjú sumur. Hann
fór svo til Montreux í Sviss í háskóla
sem heitir HIM (Hotel institute de
Montreux), hótelskóla uppá gamla
mátann. Þaðan lá leiðin til Bandaríkjanna
í verklegt nám. „Skólinn sneri ekki
mikið að matargerð, meira að hótel-,
veitinga- og gæðastjórnun. Við vorum
reyndar látin borða gríðarlega mikið
af góðum mat og fengum gott vín til
að þekkja það,“ segir Hákon sáttur.
Hákon kom svo heim og kom að ýmsu
áður en hann opnaði Mjólkurstöðina.
Hann vann á Hilton í Reykjavík, rak
veitingastaðinn Frú Lúlú í Neskaupstað,
fór í hönnun í Listaháskólanum, var
skemmtikraftur og veislustjóri svo
fátt eitt sé nefnt.
„Ég hef alltaf haft gaman af því að
vera svolítið ögrandi og öðruvísi. Eftir
að ég kynntist Hafsteini Hafsteinssyni,
tilvonandi manninum mínum, sáum
við ekki fram á að geta framfleytt okkur
í Reykjavík og ákváðum að gefa því
séns að fara út á land. Hafsteinn er
heimsborgari en hafði aldrei komið
lengra út fyrir Reykjavík en í Þórsmörk.
Við komum hingað á þriggja mánaða
vertíð og getum nú hvergi annars
staðar hugsað okkur að vera.“
Vöntun á fjölbreyttari kvennastörfum
Hákon og Hafsteinn lífga heilmikið
upp á lífið í Neskaupstað. „Hafsteinn
hefur verið með námskeið fyrir krakka,
heldur sýningar og er með opna
vinnustofu í listasmiðjunni Þórsmörk
í Neskaupstað,“ segir Hákon og bætir
því við að það sé skemmtileg tilviljun
að hann vinni nú í Þórsmörk þar sem
hann hafði ekki komið lengra frá
Reykjavík en í Þórsmörk syðri áður.
„Við stefnum á að vera hér. Okkur
langar að ferðast og sjáum fram á að
geta það með því að búa hér – eigum
kannski einhvern afgang í lok mánaðar.
Við erum mjög hamingjusamir ef við
höfum nóg að gera og getum gert
eitthvað fyrir svæðið í kringum okkur.
Það er gríðarmikið starf framundan
varðandi ferðaþjónustu á svæðinu og
við sjáum því fram á næg verkefni.
Þó við séum aðallega núna að vinna
að matargerð, liggur stefnan alltaf
á aukin umsvif í ferðaþjónustunni.
Við ætlum okkur stóra hluti, við
viljum vera atvinnuskapandi og veita
fólki tækifæri. Við erum um átta manns
í kringum fyrirtækið, en aðeins tveir
starfsmenn í fullri vinnu. Hjá okkur
fær ungt fólk tækifæri, sérstaklega
konur. Á okkar svæði er vöntun á
fjölbreyttari kvennastörfum, hér tengjast
þau flest iðnaði og umönnun. Hér eru
hæfileikaríkar konur á öllum aldri á
hverju strái, sem ekki eru allar að vinna
þá vinnu sem þær vildu vera í. Ég
held að ferðaþjónusta í Neskaupstað
gæti skapað mjög fjölbreytt störf, ekki
bara fyrir þær heldur líka fyrir ungt
fólk og þá sem hafa áhuga á slíku.“
Áframhaldandi þróun framundan
Hákon segir að verkefnið framundan
sé meðal annars að koma framleiddum
vörum í áframhaldandi þróun,
neytendavænni umbúðir og aukna
dreifingu. „Við erum alltaf með Sushi
á föstudögum og það er alveg sama
hve mikið við gerum af því, það klárast
alltaf. Við fáum fjölmargar fyrirspurnir
hvort við getum sent það á aðra firði.
Við höfum að sjálfsögðu reynt að
koma til móts við þær óskir og sú
hugmynd hefur komið upp að breyta
almenningssamgöngum í Fjarðabyggð
í Sushi train á föstudögum.“
Jólahlaðborð og jólaglögg
Nú fer í hönd einn annasamasti tími
hjá öllum veisluþjónustum og þar er
Hildibrand engin undantekning. „Við
verðum bæði með jólahlaðborð og
jólaglögg í nóvember og desember.
Við ákváðum að endurlífga Félags-
lund á Reyðarfirði, við erum mjög
hrifnir af því sem veisluhúsi, bæði
er það miðsvæðis sem og gamaldags
og kósý. Við verðum með fimm
jólahlaðborð og fimm sinnum með
jólaglögg. Jólaglöggið er fyrst og fremst
hugsað fyrir fyrirtæki - snýst meira um
samveruna og skemmtunina, verðum
með lifandi tónlist og mikið um að
vera. Þar verður byrjað á vínsmökkun
og svo fá gestir bakka með fjöldanum
öllum af smáréttum á borðið, sem allir
innihalda þetta hefðbundna bragð af
jólunum í nýstárlegu formi.
Jólahlaðborðin verða klassísk í
bland við nýstárlegt. Bókanir eru
komnar vel af stað og ég ráðlegg fólki
að bóka í tíma til þess að komast að.“
Veisluþjónustan er bakbein fyrirtækisins (framhald af forsíðu)
Það er fátt betra en að borða eftir gott djamm á björtum sumarnóttum. Fjallkonan sá um
sína eftir sjómannadagsball í Neskaupstað í júní síðastliðnum.