Austurglugginn - 25.11.2021, Side 4

4 Fimmtudagur 25. nóvember AUSTUR · GLUGGINN
Austurglugginn - Fréttablað Austurlands // Miðvangur 2-4, 700 Egilsstaðir // S: 477-1750
• Ritstjórn: Gunnar Gunnarsson ritstjóri og áb.m: gunnar@austurfrett.is • Albert Örn Eyþórsson, blaðamaður : frett@austurglugginn.is
• Auglýsingar: Anna Dóra Helgadóttir: auglysing@austurglugginn.is • Áskriftir: Anna Dóra Helgadóttir: askrift@austurglugginn.is
• Útgefandi: Útgáfufélag Austurlands ehf. • Umbrot og prentun: Héraðsprent
Leiðari
Sameign þjóðarinnar
Fræg er setning Halldórs Laxness
um að sú hafi verið tíðin að íslenska
þjóðin átti aðeins eina sameign,
klukku. Síðan hefur íslenska
þjóðin eignast fleiri sameignir.
Þær hafa verið byggðar upp með
einingu þjóðarinnar, sátt um
nýtingu skattfjár og forgangsröðun
í framfaramálum sem á endanum
nýtast landsmönnum öllum.
Íslenska ríkið byggði á sínum
tíma upp síma- og póstþjónustu
um allt land. Á sínum tíma var
þetta eitt félag, Póstur og sími, sem
síðar var skipt upp í tvö. Svo fór að
lokum sumarið 2005 að síminn var
seldur. Áður en það gerðist fór fram
mikil umræða um hvort rétt væri
að halda eftir landsdreifikerfinu.
Stjórnarliðar mótmæltu því á þeim
forsendum að það myndi lækka
verulega söluverðið, í öðru lagi
stæðist það vart samkeppnislög og í
þriðja lagi að tæknilega ómögulegt
væri að skilja þar í sundur.
Of seint er að ræða yfir höfuð
skynsemi sölunnar, fyrst verðmæti
viðskipta Símans, var ekki meira.
En eins og frægt er orðið var
tæknilegi ómöguleikinn ekki
meiri en svo að grunnetið var sett í
sérstakt félag, Mílu, strax árið 2007.
Það hefur síðan fylgt Símanum en
brátt skilur á milli með sölu þess til
erlends fjárfestingarsjóðs.
Mögulega er hægt að færa
fyrir því rök að einkavæðing
og markaðslegar forsendur hafi
hraðað uppbyggingu dreifikerfis í
þéttbýli. Á móti er það staðreynd
að íslenskir skattgreiðendur hafa
undanfarin ár fjármagnað, bæði
í gegnum ríki og sveitarfélög,
ljósleiðaravæðingu í dreifbýli.
Míla er eitt þeirra fyrirtækja sem
byggt hafa upp fjarskiptakerfi með
slíkum styrkjum, auk annarrar
þjónustu sem seld hefur verið
ríkinu. Eigendur Mílu eru nú að
innleysa ágóðann meðal annars af
þessum styrkjum.
Fjarskiptakerfi er ekki bara
nauðsynlegt upp á lífsgæði, að
geta unnið eða notið afþreyingar
í gegnum háhraðanet, heldur til
að tryggja öryggi fólks. Til þess að
fjarskiptakerfi virki eins og til er
ætlast þarf að endurnýja þau og
sinna viðhaldi. Þessar forsendur
hafa legið til grundvallar styrkjum
skattgreiðenda. Viðbúið er að
erfiðra verði að fylgja slíkum
kröfum eftir þegar eignarhaldið er
komið úr landi. Eins væri fróðlegt
að sjá hvort gleðin með söluna
væri sú sama ef kaupandinn væri
rússneskur eða kínverskur. Nægur
hefur taugatitringurinn verið út af
aðkomu Huawei að uppbyggingu
5G kerfa.
Þjóðaröryggisráð hefur söluna
til skoðunar. Erfitt er að sjá fyrir
sér að gripið verði inn í, svo hár
er verðmiðinn. Þar með munu
yfirráð yfir lykilstoð samfélagsins
færast úr landi. En eftir verður
að standa lærdómur um
nauðsynlegustu innviði landsins.
Hverjir eiga þeir að vera? Hverjir
eiga að eiga þá? Hver eiga að
vera skilyrðin fyrir fjármögnun
ríkis á slíkri uppbyggingu? Er
rétt að skattgreiðendur fjármagni
uppbyggingu án eignarhalds?
GG
Við bjóðum nýja félagsmenn
velkomna í hópinn
KJÖLUR stéttarfélag starfsmanna
í almannaþjónustu og
Starfsmannafélag Fjarðabyggðar
hafa nú sameinast
Hvað er Kjölur?
• Kjölur er stéttarfélag starfsmanna sveitarfélaga,
ríkisstofnana og sjálfstætt starfandi stofnana.
• Kjölur er stéttarfélag um 2000 félagsmanna á
landsbyggðinni og er annað stærsta aðildarfélag
BSRB.
• Félagssvæði Kjalar nær frá frá Borgarfirði í vestri,
vestur og norður um til Austurlands.
• Aðalskrifstofa Kjalar er á Akureyri og skrifstofur á
Ísafirði og í Grundarfirði.
• Kjölur stéttarfélag stendur vörð um hagsmuni
og réttindi félagsmanna sinna, annast gerð
kjarasamninga, vinnur að starfsmenntamálum
og úthlutar styrkjum vegna heilsueflingar,
forvarna og fræðsluverkefna.
• Kjölur býður félagsmönnum sínum fjölbreytta
orlofsvalkosti víða um land.