Austurglugginn - 10.04.2015, Síða 2

2 Föstudagur 10. apríl AUSTUR · GLUGGINN
Sveitarfélagið Fljótsdalshérað stendur
frammi fyrir að ákveða næstu skref í
uppbyggingu netsambands í dreifbýli.
Forsvarsmenn bæjarstjórnar segja
flókið að velja rétta leið og víst sé
að ekki verði allir sammála um for-
gangsröðunina.
„Bæjarfulltrúum er orðið vel ljóst
hversu mikil þörf er á að byggja upp
netsamband í sveitarfélaginu, það
virðist eins nauðsynlegt og vegakerfið,
rafmagnið og gamli sveitasíminn var.
Kröfur um sambandið eru eðlilegar
og hafa í vaxandi mæli komið inn á
borð okkar,“ sagði Gunnar Jónsson,
formaður bæjarráðs á íbúafundi um
fjarskiptasamband á Fljótsdalshéraði
fyrir skemmstu.
„Við efum ekkert að þetta er grund-
vallaratriði og nauðsynlegt fyrir at-
vinnulífið í dreifðu sveitarfélagi. Fólk
sættir sig ekki lengur við að hafa ekki
fullboðlegt netsamband.“
„Því minna vitum við“
Fyrirtækið Tengir hefur unnið áætl-
un um lagningu ljósleiðara um allt
sveitarfélagið en áætlað er að það taki
fimm ár og kosti alls rúman hálfan
milljarð króna. Hluti þess kostnaðar
verði greiddur af notendum, eiganda
leiðarans og ríki en reiknað er með að
um 170 milljónir standi út af. Önnur
lausn sem kynnt var á fundinum var
að koma upp þráðlausu kerfi. Það sé
mun ódýrara, fljótlegra í uppsetn-
ingu og þótt það veiti hvorki sama
stöðugleika né hraða og ljósleiðarinn
eigi það að fullnægja flestum kröfum
notenda og geti flutt sjónvarpsmerki.
„Við höfum fundið og fengið til
okkar margt mætra einstaklinga til
að greina ástandið en því fleiri sér-
fræðinga sem við hittum því minna
höfum við það á hreinu hvernig bregð-
ast eigi við,“ sagði Gunnar og bætti
við að eftir stæðu stórar spurningar
um forgangsröðun, hversu langa bið
menn þoli, hvað sé að gerast í nýjustu
tækni og hvað aðrir aðilar, svo sem
ríkið, ætli að gera. „Þetta er eitthvað
sem við viljum virkilega taka á svo
framarlega sem við mögulega getum.“
Íbúarnir leiksoppar
fjarskiptafyrirtækjanna
Sigrún Blöndal, forseti bæjarstjórnar,
sagði ekki víst að allir yrðu sáttir við
forgangsröðunina en einhvers staðar
yrði að byrja. Hún sagði einnig að fara
yrði eftir þeim reglum sem ríkið er
að móta um styrki við uppbyggingu
ljósleiðaratengingar því annars gæti
svo farið að styrkurinn yrði skertur.
Stefán Bogi Sveinsson, oddviti
framsóknarmanna í bæjarstjórninni,
sagði á fundinum að nauðsynlegt
væri að forsvarsmenn sveitarfélagsins
tækju málin í sínar hendur og sæju
mögulega um rekstur kerfisins. „Það
er þreytandi fyrir íbúa að upplifa sig
leiksoppa fjarskiptafyrirtækja.“
Hann gagnrýndi sérstaklega 365
miðla sem í dag reka kerfi eMax sem
á sumum svæðum sveitarfélagins veitir
einu raunhæfu nettenginguna. Fyrir-
tækið hefur lýst búnað sinn úreltan
og ekki viljað endurnýja hann af þeim
sökum. Sveitarfélagið hefur ekki viljað
standa undir þeim kostnaði og síðast
boðaði félagið að slökkt yrði á búnað-
inum. Af því myndu notendur fá að
vita með 30 daga fyrirvara.
„Mér finnst ótrúlegt að menn hafi
ekki heykst á að skrifa að slökkt yrði
á kerfinu með 30 daga fyrirvara. Það
sýnir kannski hvers vegna við höfðum
ekki mikla lyst á að eiga mikil við-
skipti við þetta fyrirtæki.“
GG
Fjarskiptamál
Netsambandið orðið jafn mikilvægt og vegirnir
Gunnar Jónsson: „Því fleiri sérfræðinga sem
við hittum því minna höfum við það á hreinu
hvernig bregðast eigi við.“ Mynd: GG
Alþýðusamband Íslands hefur stefnt
sveitarfélaginu Fjarðabyggð fyrir
félagsdóm fyrir hönd tveggja stuðn-
ingsfulltrúa með iðnmeistarapróf sem
fást ekki metin til launa til jafns við
stúdentspróf. Bæjarfulltrúar minni-
hlutans kalla eftir að sveitarfélagið
hafi frumkvæði að því að jafna mun-
inn og ná sáttum áður en dómur
verður kveðinn upp.
„Þarna er um að ræða túlkunaratriði
á efni kjarasamninga og við teljum
mikilvægt að fá úr þessu skorið.
Réttindi iðnmeistara í ákveðnum
greinum eru ekki metin inn í launa-
kjör í almennri línu og mér finnst
slæmt að línurnar séu skýrar. Iðn-
meistaranám er engu minna nám
en stúdentspróf en einhvern veginn
hafa samninganefndir heykst á að
skýra þessa túlkun,“ sagði Jón Björn
Hákonarson, forseti bæjarstjórnar
þegar hann fylgdi málinu úr hlaði
á síðasta fundi.
Elvar Jónsson, oddviti Fjarðalistans
og skólameistari Verkmenntaskóla
Austurlands, spurði hvað sveitarfélagið
myndi gera ef dómurinn kæmist að
þeirri „dapurlegu“ niðurstöðu að ekki
bæri að meta iðnmeistararéttindi og
stúdentsprófið jafnt í umræddu máli
og kallaði eftir að það tæki þá for-
ustu um að jafna muninn. Fulltrúar
Fjarðalistans bentu á að sveitarfélagið
hefði haft forustu um eflingu verk-
náms sem skipti miklu máli fyrir at-
vinnulíf sveitarfélagsins. Eins ætti það
að geta haft áhrif á þá sem semji um
kjaramál fyrir hönd íslenskra sveitar-
félaga. „Við erum ekki leikandi sem
getur ekki haft áhrif. Við erum stórt
og öflugt sveitarfélag sem getur haft
áhrif á gerð kjarasamninga með því
að tala skýrt,“ sagði Elvar.
Ákvæði sem dagað hefur
uppi
Einar Már Sigurðsson, annar fulltrúi
Fjarðalistans og skólastjóri Nesskóla,
sagði að þarna væri ákvæði í kjara-
samningi sem „dagað hefði uppi“ og
taldi „grátlegt“ að ekki hefði verið
úr því bætt. „Orðalag eins og þetta
er fornmál sem ætti að vera löngu,
löngu horfið. Viðhorf fulltrúa okkar
eru þannig að ég kannast ekki við
að hafa nokkurn tímann verið svo
illa innréttaður að mér dytti í hug
þessi túlkun að koma iðnmeistara-
prófi undir stúdentsprófið í mati.
Reynið allt sem þið getið til að leysa
þetta með sáttum áður en kemur til
úrskurðar félagsdóms.“
Þriðji fulltrúinn, Hjördís Seljan,
lýsti ótta sínum yfir því að ákvæðið
væri angi af því að bóknám væri
metið æðra verknámi hérlendis.
„Umræðan er oft á þá leið að milli
þessara tveggja leiða sé stórt og
mikið bil og metingur um hvort sé
mikilvægara og eftirsóknarverðara.
Þar finnst mér í umræðunni halla á
verknámið.“
Ekki hægt að túlka einn
kjarasamning umfram
aðra
Páll Björgvin Guðmundsson, bæjar-
stjóri, sagði sveitarfélagið leggja áherslu
á að fara ítarlega eftir kjarasamn-
ingum, meðal annars til að tryggja
jöfn laun kynjanna. Sveitarfélagið
væri með nokkra kjarasamninga og
ekki væri hægt að taka einn þeirra út
sérstaklega til túlkunar. „Þótt menn
vildu gera það þá þyrfti að taka svo
margt annað upp en þennan eina
samning.“
Undir það tók Ragnar Sigurðsson,
fulltrúi Sjálfstæðisflokksins og for-
maður Félags opinberra starfsmanna
á Austurlandi. „Kjarasamningar eru
mismunandi og stéttarfélög eiga í
samkeppni um félagsmenn. Ef bæjar-
félagið fer að taka einn kjarasamning-
inn og túlka hann umfram það sem
í honum stendur er spurning hvort
önnur félög rísi ekki upp á aftur-
lappirnar og heimti að sama verði
gert gagnvart þeirra samningum.“
GG
Kjaramál
Fornmál sem á að vera löngu horfið
Elvar Jónsson: „Við erum stórt og öflugt sveitarfélag sem getur haft áhrif á gerð kjarasamninga
með því að tala skýrt.“ Mynd: GG