Feykir - 12.01.2022, Blaðsíða 9

Fjársjóður í fólki
ÁSKORANDAPENNINN | palli@feykir.is
Þegar Hulda Jónasar,
Króksari og vinkona
mín, sendi mér
áskorandapennann
þá hugsaði ég: „Já
ég er Skagfirðingur,
ekki bara Króksari“.
Ræturnar liggja
nefnilega víða um
Skagafjörðinn.
Ég var svo heppin
að vera í sveit bæði
í Neðra-Ási hjá
föðurfjölskyldunni og
á Þrastarstöðum hjá
móðursystur minni
og hennar fólki. Þar
gekk lífið út á heyskap,
fanga fiðrildi, veiða
síli og fara í berjamó
og svo að hafa gaman
og hlæja heil ósköp. Í
Neðra-Ási var svo farið
á frjálsíþróttaæfingar
niður við Hjaltadalsá,
stórir sem smáir.
Þá má ekki gleyma
Róðhóli í Sléttuhlíð
þar sem amma og afi
bjuggu. Fátt er jafn
fallegt og að horfa á
sólarlagið við Málmey.
Svo er það auðvitað
Krókurinn með öllum
ævintýrum æskunnar.
Sjórinn og fjaran
heillaði sem og Nafirnar
og „Heita vatnið“.
Veiðidellan greip mig
svo hastarlega að ég
steingleymdi einu
sinni að mæta til að
passa hana Guðrúnu
frænku mína, enda var
ég líklega ekki nema
u.þ.b. 11 ára, en þá
hafði ég gleymt mér
með veiðistöngina niðri
í fjöru. Allt þetta og
svo miklu meira raðast
í minningabankann
og tengir mann
sterkum böndum við
heimahagana og fólkið
sem maður hefur átt
samleið með.
Kannski var ég
ekki áreiðanlegasta
barnapían í bænum,
en ég fékkst samt við
ýmislegt á unga aldri
á Króknum, mest við
verslunarstörf. Að vera
ráðin sem bensíntittur
á Ábæ, þrettán ára,
var mikil upphefð. Það
var mikið líf og fjör á
Ábæ enda lá rúnturinn
þar í kring; nánast eins
og félagsmiðstöð. Ég
mætti á mína fyrstu
vakt klukkan fjögur á
erilsömum föstudegi.
Planið fullt af bílum.
Eiki Hilmis var að klára
vaktina sína og sagði
mér að dæla á vörubíl
KS. Nú var úr vöndu að
ráða; hvort átti ég nú
að velja steinolíu eða
dísel? Dælurnar voru
hlið við hlið. Ég skaut á
steinolíuna og byrjaði
að dæla. Var örugglega
búin að dæla 40-50
lítrum þegar bílstjórinn,
Einar á Veðramóti, gekk
til mín og sá hvað var
í gangi. Hann leiðrétti
mig vingjarnlega og
sagði að reyndar hafi
hann ætlað að láta
setja dísel á bílinn, en
þetta væri allt í lagi.
Það væri nefnilega sett
smá steinolía á veturna.
Og ég slapp með
skrekkinn. Seinna lærði
ég allt um smurolíur
og bremsuvökva, að
mæla frostlög, fylla á
gaskúta o.fl. Ingimar
hafði gott lag á okkur
krökkunum; okkur var
treyst og fengum skýra
starfslýsingu, hvenær
átti að þurrka úr hillum,
þvo planið, fylla á vörur
o.s.frv.
Þegar árin færast yfir
áttar maður sig betur
á þeim fjársjóði sem
býr í samferðafólkinu.
Frumbyggjarnir á
Hólaveginum þar
sem ég var alin upp
til dæmis. Fólk sem
hjálpaðist að við að
byggja húsin sín,
fór á kvenfélagsböll
og þorrablót saman.
Á síðustu æviárum
foreldra minna var
dýrmætt að upplifa alla
þá umhyggju sem þetta
fólk sýndi hvert öðru,
og ekki síst foreldrum
mínum og okkur
systkinunum.
Ekki eru síður
dýrmætar mínar kæru
æskuvinkonur af
Króknum, árgangur
1963. Við höfum
nokkrar verið í
saumaklúbb í Reykjavík
frá árinu 1995 og þar
hafa myndast sterk
bönd okkar á milli og
við Skagafjörðinn. Það
er reyndar efni í sér
pistil.
Ekki gleyma því
góða fólki sem flyst á
Krókinn og eflir bæði
atvinnu- og mannlífið.
Ný-Skagfirðingum,
sem hafa komið með
kraft og ferska sýn inn
í samfélagið. Í starfi
mínu hjá Íslandsstofu
átti ég frábært samstarf
við tvo snillinga við að
kynna Skagafjörðinn
og Landsmótið 2016,
sem haldið var á
Hólum, úti í Herning í
Danmörku. Þetta voru
þau Áskell Heiðar,
sem enn stendur
vaktina á Króknum
með miklum glæsibrag,
og Laufey, sem nú
hefur flutt til Kóngsins
Kaupmannahafnar.
Við buðum upp á
skagfirska stemningu,
bökuðum pönnukökur
ofan í gesti og gangandi
og stóðum fyrir lifandi
tónlist og söng. Við
Laufey áttum áfram gott
samstarf eftir ævintýrið
í Herning við að kynna
fisk og fiskafurðir í
útlöndum.
Það er því vel við
hæfi að senda
áskorandapennann til
Kaupmannahafnar þar
sem hún Laufey Kristín
Skúladóttir býr nú og
starfar.
Guðný Káradóttir brottfluttur Skagfirðingur
Guðný Kára. MYND AÐSEND
FYRIRTÆKI Á
NORÐURLANDI VESTRA
Í FREMSTU RÖÐ!
Við erum stolt af því að vera í hópi
framúrskarandi fyrirtækja á Norðurlandi vestra
samkvæmt útnefningu Creditinfo.
2021
Blönduósi
www.isgel.is
S: 451-2727
Kæli - hita gelpokar
02/2022 9