Margt smátt - 01.08.2024, Blaðsíða 5

5
Vilborg segir að frístund barna eigi að vera gjaldfrjáls,
enda hluti af skólastarfinu. Aðstoð við heimanám og slíkt í
frístundinni. Þetta sé bara hluti af því að vera í skóla.
„Varðandi frístundastyrkinn – það eru mjög margir foreldrar
sem nýta hann til að greiða fyrir frístundina í skólanum.
Þeim börnum stendur því ekki til boða að taka þátt í
íþrótta- eða tómstundastarfi, tónlistarskóla eða dansi eftir
skólatíma, þegar búið er að nota styrkinn í frístundina. Ég
hef reynt að koma því á framfæri hvernig ég sé þetta. Það er
að börn á Íslandi fái eina tómstund að eigin vali fría. Þá er ég
að tala um æfingagjöldin, það sem kostar að fara í ferðirnar
og annað. Velji foreldrar að börnin fái fleiri en eina tómstund
þá borga þau það úr eigin vasa. Þetta er lýðheilsumál,
forvarnamál og myndi jafna stöðu barna til mikilla muna.“
Vilborg sagðist telja eðlilegt að ríkið ætti að koma að
verkefninu með sveitarfélögunum. Íþróttafélögin ættu líka
að hætta að merkja íþróttaföt með nöfnum barnanna, svo
hægt sé að endurnýta þau.
„Á hverju vori, hausti og janúar ættu íþróttafélögin að vera
með skiptimarkað. Börnin geta svo vel klæðst notuðum
fötum og ef fyrirtæki vilja selja auglýsingar þá má koma
því svo við að hægt sé að taka auglýsingarnar af og setja
nýjar í þeirra stað. Við þurfum að hugsa þetta heildstætt
því þetta er orðið það dýrt að mörg börn sitja eftir og geta
ekki tekið þátt. Við viljum ekki að sum börn þurfi að standa
á hliðarlínunni og þurfi að beita fyrir sig afsökunum til að
útskýra af hverju þau taka ekki þátt.“
Vilborg segir erfitt að meta hvort frekari aukning verði á
umsóknum þetta haustið. Ekkert bendi þó til annars en að
þörfin sé mikil enda sé ár liðið þar sem efnahagsástandið
hafi lítið lagast og húsnæðiskostnaður heimilanna er
viðvarandi vandamál. Draga megi þá ályktun að mörg
fjölskyldan kvíði haustinu.
Við viljum ekki að sum börn
þurfi að standa á hliðarlínunni
og þurfi að beita fyrir sig
afsökunum til að útskýra af
hverju þau taka ekki þátt.
Mikilvægt er að tryggja að börn og ungmenni
flosni ekki upp úr skóla vegna fjárhagslegrar
stöðu fjölskyldunnar.
Börn mega ekki einangrast
Markmið Hjálparstarfsins með sérstakri aðstoð í skóla-
byrjun ár hvert er að börn einangrist ekki vegna bágs
efnahags fjölskyldunnar. Þekkt er að börn sem búa við
fátækt eru útsett fyrir félagslegri einangrun sem getur
valdið þeim sársauka og haft langvarandi félagslegar og
heilsufarslegar afleiðingar.
„Ef þú ert ekki með skólatöskuna og það sem þú þarft í
skólann getur það valdið barni hugarangri. Það er afar
mikilvægt fyrir barn að geta mætt í skólann jafnfætis
skólasystkinum sínum. Svona smáatriði geta endað með
því að vera kornið sem fyllir mælinn og niðurstaðan er
skólaforðun – að barnið vill ekki fara í skólann og foreldrar
þess láta undan þeim þrýstingi. Þetta getur síðar valdið
barninu miklum vandræðum og það flosnar upp úr
skólastarfi og á aldrei afturkvæmt. Niðurstaðan er félagsleg
einangrun og oft vítahringur fátæktar,“ segir Vilborg.
„Stundum þarf svo lítið til. Áföll sem í margra augum eru
smávægileg geta haft alvarlegar afleiðingar á þessum
viðkvæma tíma í lífi hvers barns. Þess vegna er afar
mikilvægt að lágmarka hættuna á því að börnin sjái skólann
í neikvæðu ljósi í upphafi skólagöngu. Það getur haft mikil
áhrif síðar á ævinni,“ segir Vilborg.