Morgunblaðið - 16.04.2002, Blaðsíða 12
HÖFUÐBORGARSVÆÐIÐ
12 ÞRIÐJUDAGUR 16. APRÍL 2002 MORGUNBLAÐIÐ
STEFNT er að því að auglýsa
deiliskipulagstillögu norður-
svæðis Vatnsenda formlega í
vikunni. Á svæðinu mun rísa
blönduð íbúðarbyggð fyrir um
1.500 íbúa í tæplega 500 íbúð-
um. Áætlað er að uppbygging
svæðisins geti hafist á næsta
ári.
Norðursvæði Vatnsenda er í
austurhlíðum Vatnsenda-
hvarfs. Það afmarkast af at-
hafnasvæði og Vatnsenda-
hvarfi til norðurs og vesturs,
núverandi byggð við Dimmu
og fyrirhugaðri íbúðarbyggð á
svokölluðum F-reit og hverf-
inu „Milli vatns og vegar“ til
suðurs og austurs, en skipulag
þessara tveggja reita hefur
verið umdeilt meðal íbúa
Vatnsendasvæðisins.
Í greinargerð með skipu-
lagstillögunni segir að skipu-
lagssvæðið sé 41 hektari að
flatarmáli en þar af sé íbúðar-
svæðið um 30 hektarar.
Gert er ráð fyrir um 480 nýj-
um íbúðum á svæðinu og segir
í greinargerðinni að leitast hafi
verið við að byggðin fái að
stórum hluta yfirbragð sér-
býlishúsabyggðar, falli vel að
umhverfi svæðisins og núver-
andi byggð þó að einnig sé gert
ráð fyrir fjölbýlishúsum á
svæðinu. Fyrirhugað bygging-
arsvæði liggur í landhalla og
frá því er mikið og fagurt út-
sýni yfir Elliðavatn og Heið-
mörk og allt að Hengilssvæð-
inu, Vífilfelli og Bláfjöllum, að
því er segir í greinargerðinni.
Húsin ein til þrjár hæðir
Deiliskipulagið er fellt að tíu
einbýlishúsum og einum sum-
arbústað sem fyrir eru á svæð-
inu en aðrar byggingar verða
fjarlægðar. Áætlaður íbúa-
fjöldi er tæplega 1.500 íbúar sé
miðað við þrjá í íbúð. Fjölbýlis-
húsin verða tveggja og þriggja
hæða auk kjallara en sérbýlis-
húsin ein til tvær hæðir. Gert
er ráð fyrir 68 nýjum einbýlis-
húsum, 20 íbúðum í tvíbýli, 30
íbúðum í raðhúsum, 65 íbúðum
í klasahúsum, 297 íbúðum í
fjölbýli og einu sambýli fyrir
fatlaða. Þá má byggja hesthús
ásamt gerði á tilteknum lóðum
en gert er ráð fyrir að núver-
andi hesthús á tveimur lóðum
verði færð og endurbyggð.
Tvö bílastæði eru ráðgerð
innan lóðar fyrir hverja íbúð í
fjölbýli og í klasahúsum og
skal helmingur þeirra vera í
stakstæðri bílageymslu eða
bílakjallara. Á einbýlishúsa-
lóðum er miðað við þrjú bíla-
stæði innan lóðar en tvö í tví-
býli, parhúsum og raðhúsum.
Heildstæður grunnskóli og
tveir leikskólar verða á svæð-
inu samkvæmt skipulaginu
auk fyrrnefnds sambýlis fyrir
fatlaða. Þá er hverfisverslun
fyrirhuguð austan gatnamóta
Vatnsendavegar og Elliða-
hvammsvegar en svæðið er
hluti stærri skipulagsheildar í
Vatnsenda og verður ýmis
þjónusta sameiginleg með
henni.
Aðkoma um Vatnsenda-
hvarf fyrst um sinn
Í tillögunni er aðkoma að
byggðinni sýnd um Vatns-
endaveg sem tengist í norðri
við Arnarnesveg og Vatns-
endahvarf sem tengist Breið-
holtsbraut í norður. „Vatns-
endahvarf miðlar í byrjun allri
umferð að og frá svæðinu en
kemur til með, er gatnakerfið
verður að fullu mótað, að taka
aðeins við umferð sem kemur
úr vestri eftir Breiðholtsbraut
og hleypa einungis umferð inn
á Breiðholtsbraut til austurs,“
segir í greinargerðinni.
Mislæg gatnamót við Arnar-
nesveg og Breiðholtsbraut
munu í seinni áfanga tengja
íbúðarsvæðið um Vatnsenda-
veg en í suður og vestur teng-
ist deiliskipulagssvæðið
Garðabæ og Salahverfi. Þá
verður núverandi aksturs-
tenging Vatnsendavegar og
Breiðholtsbrautar við Skyggni
lögð niður. Loks er gert ráð
fyrir að almenningsvagnar aki
um Vatnsendaveg.
Á svæðinu verða gönguleið-
ir þar sem gert er ráð fyrir æf-
ingastöðvum eða leiktækjum á
völdum stöðum en við jaðar
svæðisins munu liggja reiðleið-
ir.
Hvað varðar opin svæði
liggur svæðið að stóru opnu
svæði til vesturs í Vatnsenda-
hvarfi auk þess sem inni í
hverfinu verða græn svæði
sem nýtast fyrir göngu- og
reiðleiðir, leiksvæði og trjá-
rækt. Loks verða opin svæði til
leikja og útiveru innan deili-
skipulagsins, þ.e. grenndar-
vellir og trjáræktarsvæði,
ásamt leikskóla og grunn-
skóla.
Hönnun skipulagsins var í
höndum Smára Smárasonar
arkitekts auk starfsmanna
Bæjarskipulags Kópavogs. Að
sögn Birgis Sigurðssonar,
skipulagsstjóra í Kópavogi, er
ráðgert að uppbygging svæð-
isins geti hafist á næsta ári en
tillagan verður auglýst lög-
formlega á næstu dögum.
Hægt verður að kynna sér til-
löguna á bæjarskipulagi Kópa-
vogs, Fannborg 6, eftir að hún
hefur verið auglýst og er aug-
lýsingatíminn fjórar vikur.
Eftir það hefur fólk tvær vikur
til að gera athugasemdir ef
einhverjar eru.
Deiliskipulagstillaga 1.500 manna íbúðarbyggðar á norðursvæðinu auglýst á næstu dögum
Uppbygging hefj-
ist á næsta ári
Vatnsendi
ÚRSKURÐARNEFND
skipulags- og byggingamála
hefur ógilt þá ákvörðun borg-
arráðs að fella útbyggingar-
reit fyrir vinnustofu á Laug-
arnestanga 65 þar sem hús
Hrafns Gunnlaugssonar
kvikmyndagerðarmanns
stendur. Segir í úrskurðinum
að með því hafi réttur Hrafns
verið skertur verulega um-
fram það sem þörf var til að
ná fram lögmætum markmið-
um og að ekki hafi verið gætt
sem skyldi jafnræðis gagn-
vart eigendum nágrannalóð-
anna.
Forsaga málsins er sú að
árið 1990 var unnin deili-
skipulagstillaga fyrir Laug-
arnestanga þar sem gert var
ráð fyrir um 100 fermetra
vinnustofu á lóð Hrafns norð-
an við hús hans og tveimur
100 fermetra vinnustofum við
húsið númer 62. Borgarráð
ákvað að auglýsa þessa til-
lögu en ekki kom til sam-
þykktar hennar.
Í mars árið 1991 staðfesti
borgarráð lóðarafmörkun og
viðbyggingu vinnustofu við
húsið númer 62 og á afstöðu-
mynd vegna þeirrar viðbygg-
ingar var sýndur byggingar-
reitur fyrir vinnustofu
norðan við hús Hrafns.
Sömuleiðis er byggingarreit-
urinn sýndur á teikningum
vegna viðbyggingar og sól-
skála við hús hans, en þær
teikningar voru staðfestar í
borgarráði í júlí árið 1991.
Tillaga að lóðarmörkum lóð-
arinnar var samþykkt og síð-
ar staðfest af borgarráði í
ágúst sama ár og var um-
ræddur byggingarreitur
sýndur á þeim uppdrætti.
Lóðarmörk færð
vegna fornminja
Í janúar 1993 sótti Hrafn
um að fá að byggja vinnu-
stofuna eftir að hann hafði
látið teikna hana. Í kjölfarið
kom í ljós að fornminjar voru
á byggingarreitnum og því
var gerð tillaga að breyttum
lóðarmörkum þannig að
spildan með fornminjunum
yrði utan þeirra en í staðinn
kæmi spilda að sunnanverðu.
Hrafn lét teikna breytingarn-
ar og var hin nýja afmörkun
lóðarinnar samþykkt á fundi
skipulagsnefndar í nóvember
1993 þar sem gert var ráð
fyrir vinnustofu á suðurhluta
lóðarinnar. Sú samþykkt var
ekki staðfest af borgarráði.
Í maí og júlí 1996 barst
Hrafni uppdráttur frá Borg-
arskipulagi að afmörkun lóð-
ar hans þar sem ekki var
gert ráð fyrir byggingareitn-
um undir vinnustofuna. Þrátt
fyrir að hann gerði athuga-
semdir við þetta voru ný
mörk lóðarinnar samþykkt
og staðfest af borgarráði síð-
ar sama ár.
Í nýju deiliskipulagi, sem
samþykkt var í borgarráði í
september árið 2000 er ekki
gert ráð fyrir umræddum
byggingarreit. Gerði Hrafn
athugasemdir við þetta með-
an á lögformlegu auglýsing-
ar- og athugasemdatímabili
stóð.
Segir í bókun fulltrúa R-
lista á skipulagsnefndarfundi
í september 2000 að í stefnu-
mótun um svæðið sé lögð
áhersla á mikilvægi þess sem
almenns útivistarsvæðis með
góðu aðgengi almennings og
því komi tillögur um aukið
byggingarmagn á kostnað al-
menns útivistarsvæðis ekki
til greina.
Í kjölfar samþykktarinnar
skaut Hrafn málinu til úr-
skurðarnefndar skipulags- og
byggingarmála þar sem farið
var fram á að samþykktin
yrði felld úr gildi að því er
varðar niðurfellingu á bygg-
ingarreitnum á lóð hans.
Nýtingarhlutfall lægra
en hjá nágrönnum
Í niðurstöðu úrskurðar-
nefndarinnar segir að fallist
sé á það með Reykjavíkur-
borg að engin ákvörðun um
byggingarreitinn eða leyfi til
byggingar vinnustofu á lóð
kæranda hafi verið staðfest
af borgarráði eða borgar-
stjórn eins og áskilið er sam-
kvæmt skipulags- og bygg-
ingarlögum. Því hafi Hrafn
ekki átt lögvarinn rétt til
byggingar vinnustofunnar.
Hins vegar er á það bent að
nýtingarhlutfall tveggja ná-
grannalóða Hrafns sé 0,3 en
á lóð hans sé það um helm-
ingi lægra eða um 1,5 sem sé
undir þeim mörkum Aðal-
skipulag Reykjavíkur gerir
ráð fyrir á umræddu svæði.
Þá segir að ekki verði séð
að sú staðreynd, að svæðið sé
skilgreint sem almennt úti-
vistarsvæði, réttlæti um-
rædda skerðingu. Sömuleiðis
hafi þau sjónarmið ekki verið
ráðandi við skipulagsgerð á
umræddu svæði. Ekki verði
séð að þörf hafi verið fyrir
þessa takmörkun á nýtingar-
rétti Hrafns til að ná fram
lögmætum markmiðum um
útivistarsvæði og umferð al-
mennings um svæðið, „sér-
staklega þegar til þess er lit-
ið að takmörkun þessi gekk
þvert á það sem kærandi
mátti vænta miðað við for-
sögu málsins,“ segir í úr-
skurðinum.
Er það því niðurstaða
nefndarinnar að ógilda sam-
þykkt deiliskipulag fyrir
Laugarnes, að því er varðar
lóðina númer 65 á Laugar-
nestanga.
Morgunblaðið/Golli
Í deiliskipulagi frá árinu 2000 var ekki gert ráð fyrir byggingarrétti fyrir vinnustofu á lóð
Hrafns og hefur úrskurðarnefnd skipulags- og byggingarmála ógilt þá ákvörðun.
Deiliskipulag ógilt
varðandi lóð Hrafns
Gunnlaugssonar
Laugarnes
103 UMSÓKNIR bárust
um 26 einbýlishúsalóðir
á Völlum í Hafnarfirði en
það er nýtt íbúðahverfi
sunnan við íþróttamið-
stöð Hauka á Ásvöllum.
Þá bárust fjölmargar
umsóknir frá verktökum
um lóðir undir rað- og
fjölbýlishús og er þar um
að ræða allt að 200 íbúðir
í slíkum húsum.
Það er fyrsti áfangi
íbúðasvæðisins sem um-
sóknirnar taka til þar
sem alls er gert ráð fyrir
á þriðja hundrað íbúðum
að því er fram kemur í
fréttatilkynningu frá
Hafnarfjarðarbæ. Þar
segir að framvinda máls-
ins verði sú að dregið
verði úr innkomnum um-
sóknum 18. apríl næst-
komandi samkvæmt út-
hlutunarreglum sem
bæjarráð hefur sam-
þykkt.
„Hinn 1. maí næst-
komandi er síðan gert
ráð fyrir að þeir sem
uppfylla skilyrði sam-
kvæmt úthlutunar-
reglum dragi númer sem
segir til um hvar þeir eru
í röðinni við að velja sér.
Þá fá lóðarhafar viku til
að kynna sér staðhætti
og eiginlegt lóðarval
þeirra fer síðan fram 8.
maí,“ segir í tilkynning-
unni.
Fjórir um
hverja
einbýlis-
húsalóð
á Völlum
Hafnarfjörður