Dagblaðið Vísir - DV - 19.05.2010, Blaðsíða 9

FRÉTTIR 19. maí 2010 MIÐVIKUDAGUR 9
Skiptastjórar danskra þrotabúa
sem tilheyrðu íslensku fasteigna-
samsteypunni Landic Property,
sem var í eigu Baugs og tengdra
aðila, hafa komist að því að stjórn-
endur félagsins séu skaðabóta-
skyldir vegna viðskipta sem áttu sér
stað hjá félögunum á árunum 2008
og 2009. Bréf hafa verið send til
stjórnenda félagsins þar sem þetta
kemur fram. Frá þessu er greint í
upplýsingabréfi frá dönsku skipta-
stjórunum þremur, sem starfa hjá
lögmannsstofunum Plesner, Bech-
Bruun og Kromann Reumert, sem
sent var til kröfuhafa dótturfélaga
danska hluta Landic síðastliðinn
mánudaginn.
Meðal þeirra sem hafa feng-
ið bréf eru fyrrverandi forstjórar
Landic, Skarphéðinn Berg Stein-
arsson og Viðar Þorkelsson, auk
fleiri aðila.
Í bréfinu er staðan á þrotabúi
félagsins, Landic Investment A/S,
rakin og er kröfuhöfunum greint frá
uppgjöri félagsins. Það varð gjald-
þrota í fyrrasumar. Þar kemur með-
al annars fram að enn liggi ekkert
fyrir um það hversu mikið kröfu-
hafar félagsins geta vænst að fá upp
í kröfur sínar á hendur félaginu.
Verið er að selja eignir félagsins, allt
frá smáum eignum til stórra.
Í skýrslu rannsóknarnefndar Al-
þingis er rætt nokkuð um Landic
Property og kemur þar fram að fé-
lagið var eitt stærsta fasteignafélag-
ið á Norðurlöndum, með starfsemi
á Íslandi, í Finnlandi, Danmörku og
Svíþjóð. Landic sérhæfði sig í um-
sýslu og leigu á atvinnuhúsnæði
til fyrirtækja og einstaklinga og
jukust umsvif félagsins eftir kaup
á fasteignafélaginu Keops í Dan-
mörku árið 2007. Það er þetta fé-
lag sem tekið hefur verið til gjald-
þrotaskipta þar í landi. Meðal eigna
Landic voru meðal annars stór-
verslanirnar Magasin du Nord og
Illum.
Í stefnu slitastjórnar Glitnis
gegn eigendum og stjórnendum
Glitnis er fjármögnun Landic vegna
kaupa á danska fasteignafélaginu
Keops gagnrýnd harkalega. Eink-
um hvernig félag í eigu Ingibjarg-
ar Pálmadóttur, eiginkonu Jóns Ás-
geirs Jóhannessonar, eignaðist 19
prósenta hlut í félaginu svo hægt
væri að lána þeim hjónum meiri
peninga út úr bankanum og snið-
ganga þannig reglur um hámarks-
áhættuskuldbindingar til tengdra
aðila.
Rannsókn á viðskiptum Landic
Í bréfinu til kröfuhafa Landic kem-
ur fram að skiptastjórarnir hafi ráð-
ið endurskoðendafyrirtækið Ernst
og Young til að rannsaka hvort ein-
hver viðskipti hafi átt sér stað hjá
Landic Property í Danmörku sem
séu riftanleg. Í bréfinu segir að
ástæðan fyrir því af hverju þetta
hafi verið gert sé sú að Landic-sam-
steypan í Danmörku sé svo flókin
að ráða hafi þurft endurskoðend-
ur til að greiða úr flækjunni. „Hinn
mikli fjöldi félaga og almennt séð
hversu samsteypan er flókin hefur
gert það að verkum að við höfum
orðið að ráða endurskoðendur til
að vinna úr rafrænum gögnum og
bókhaldi dönsku félaganna í Land-
ic samsteypunni.“ Rannsóknin nær
til allra viðskipta Landic frá 1. jan-
úar 2008 og kemur fram í bréfinu að
Landic í Danmörku eigi 136 dóttur-
félög. Vinnan við uppgjör félagsins
er því alls ekki auðveld.
Rannsóknin á viðskiptum fé-
lagsins er enn þá í fullum gangi
en nú þegar liggur fyrir að kröfur
verði gerðar á hendur stjórnendum
Landic vegna viðskipta sem áttu sér
stað í aðdraganda gjaldþrots félags-
ins. Í bréfinu segir: „Skiptastjórarn-
ir hafa rannsakað nokkur viðskipti
sem gerð voru í hinum ýmsu félög-
um Landic fyrir gjaldþrotið. Skipta-
stjórarnir eru enn þá að vinna að
þessu en nú þegar hafa verið gerðar
tilteknar kröfur gegn stjórnendum
Landic Property A/S á tímabilinu
fyrir gjaldþrotið.“
Í bréfinu segir jafnframt að
skiptastjórunum hafi verið tjáð að
stjórnendatryggingar hafi verið
teknar út á vegum Landic hf. á Ís-
landi og að þess vegna hafi skipta-
stjórarnir bent einstökum stjórnar-
mönnum á að láta tryggingafélög
sín vita af málunum. Þetta gerðist í
tilfelli Skarphéðins Bergs Steinars-
sonar og Viðars Þorkelssonar. Ekki
er tilgreint í bréfinu um hvaða við-
skipti Landic er að ræða.
Skarphéðinn Berg segir í sam-
tali við DV að hann hafi ekki heyrt
meira frá skiptastjórunum eftir
að hann fékk bréfið frá þeim fyrir
nokkru þar sem honum var greint
frá stjórnendatryggingunni.
Sala á eignum; óvíst með
endurheimtur
Í bréfinu eru rakin gjaldþrot ýmissa
dótturfélaga Landic í Danmörku
og Svíþjóð og víðar um lönd, með-
al annars í Tyrklandi og er greint
lauslega frá eignasöfnum þessara
félaga. Greint er frá sölu á ýmsum
fasteignum, skrifstofubúnaði og
einnig listaverkum upp á 500 þús-
und danskar krónur, um tíu millj-
ónir króna, sem voru í eigu Landic
í Danmörku. Ljóst er að vinnan við
uppgjör félaganna er á frumstigi.
Í bréfinu til kröfuhafanna er rak-
ið að skiptastjórarnir þrír telja sig
eiga kröfu á hendur Landic Pro-
perty hf. á Íslandi upp á rúmlega
60 milljarða króna, þrjár milljónir
danskar. Landic Property hf. á Ís-
landi var tekið til gjaldþrotaskipta
í upphafi ársins og er Ástráður
Haraldsson skiptastjóri félagsins.
Í bréfinu kemur fram að þrotabú
Landic á Íslandi sé ósammála kröf-
unni.
Í bréfinu til kröfuhafanna seg-
ir að það sé með öllu óvíst hversu
mikið þeir muni fá upp í kröfur sín-
ar á hendur félaginu þar sem vinn-
an við búið sé ekki komin nægilega
langt til þess að hægt sé að leggja
öruggt mat á það.
Bréfið frá skiptastjórunum
dönsku sýnir þá gríðarlega flóknu
slóð eignarhaldsfélaga og skulda
sem íslensk fyrirtæki og félög skilja
eftir sig víða um heim og sér alls
ekki fyrir endann á uppgjöri fé-
lagsins eða hversu mikið það muni
kosta. Á einungis nokkurra ára
tímabili fór Landic í Danmörku frá
því að vera eitt stærsta fasteigna-
félagið þar í landi sem hélt utan
um sögufrægar byggingar eins
og Magasin du Nord yfir til gjald-
þrota félags sem skilur eftir sig slóð
skulda um gervöll Norðurlöndin.
Vinna við uppgjör á dönskum dótturfélögum fasteignafélagsins Landic Property í Danmörku er stutt á veg
komin. Óvíst er hversu mikið kröfuhafar þessa Baugsfélags fá upp í kröfur sínar. Félagið átti meðal annars
Magasin du Nord í Kaupmannahöfn sem var eitt af flaggskipum útrásarinnar. Stjórnendur Landic hafa
verið krafðir um bætur vegna viðskipta félagsins.
KRAFÐIR UM BÆTUR
VEGNA VIÐSKIPTA LANDIC
INGI F. VILHJÁLMSSON
blaðamaður skrifar: ingi@dv.is
Bréfið frá skipta-stjórunum
dönsku sýnir þá gríðar-
lega flóknu slóð eignar-
haldsfélaga og skulda
sem íslensk fyrirtæki og
félög skilja eftir sig víða
um heim. Beðið um bætur Stjórnendur Landic, meðal annars Skarphéðinn Berg Steinarsson, hafa verið krafnir um bætur vegna viðskipta
Landic í Danmörku. Jón Ásgeir Jóhannesson og Hannes Smárason voru meðal eigenda Landic fyrir hrun.
Stórveldi Landic Property var stórveldi á fasteigna-
markaðnum í Danmörku á árunum fyrir hrunið og átti
félagið meðal annars stórverslunina Magasin du Nord
í Kaupmannahöfn. Félagið skilur eftir sig slíka slóð
skulda og eignarhaldsfélaga að skiptastjórarnir hafa
ekki náð almennilega utan um uppgjör félagsins.