Són - 01.01.2015, Blaðsíða 10

8
Frá ritstjórum
Til lesenda
Tímaritið Són heilsar lesendum sínum nú í þréttánda sinn, fjölbreytt að
efni að vanda. Að þessu sinni eru í heftinu þrjár ritrýndar greinar og sex
ritstýrðar óðflugur og umræðugreinar. Sem fyrr eru frumbirt í heftinu
nokkur ljóð og nú einnig ný ljóðaþýðing. Sónarskáld er Ragnar Ingi
Aðalsteinsson sem er lesendum Sónar að góðu kunnur en hann ritstýrði
Són um þriggja ára skeið og hefur auk þess ritað greinar um bragfræði í
tímaritið.
Við viljum þakka öllum greina- og ljóðahöfundum sem og ritrýnum
og yfirlesurum fyrir þeirra ólaunaða starf og mikilsverða framlag í þágu
Sónar. Ábendingum um efni, greinar og ljóð, má koma til ritstjóra.
Áskriftargjaldið er innheimt í heimabanka og við biðjum áskrifendur
að athuga að Óðfræðifélagið Boðn er skrifað fyrir reikningnum, en
félagið gefur út Són. Hægt er að fá eldri hefti Sónar við vægu verði og
nýir áskrifendur fá síðasta hefti sér að kostnaðarlausu.
Athygli lesenda er vakin á aðalfundi Boðnar þann 17. febrúar 2016 og
árlegu Boðnarþingi sem haldið verður 15. apríl 2016, sjá nánar hér aftar
í heftinu.
Anna Þorbjörg Ingólfsdóttir og Haukur Þorgeirsson, ritstjórar
Leiðrétting
Í síðasta hefti Sónar (12:2014) féllu brott við umbrot tveir stafir framan af
orðinu „hvörra“ í útgáfu Þórunnar Sigurðardóttur á ritgerðinni „Nú kemur
um skáldskapinn að tala“ (bls. 152, annarri línu). Setningin hljóðar svona:
Nú þó að drápur og flokkar, bæði gamalla og yngri skálda og fræði-
manna, hafi undir misjöfnum dómi og virðingu sumra hvörra …