Tímarit lögfræðinga - 01.09.1990, Blaðsíða 3

TÍMARIT § tb
LÖGFRÆÐINGA
2. HEFTI 40. ÁRGANGUR ! SEPTEMBER 1990
ÍSLENSKIR LÖGFRÆÐINGAR OG UMHEIMURINN
Lögfræðingar hafa nokkra sérstöðu á meðal íslenskra háskólamanna að því
leyti að lögfræðimenntunin veitir takmarkaða möguleika til starfa í öðrum
löndum. ólíkt því sem gegnir um flesta aðra íslenska háskólamenntun að
fengnum tilskildum leyfum sem víðast er krafist.
Þetta gerir það að verkum að íslenskir lögfræðingar hafa í tiltölulega fáum
tilvikum möguleika á að afla sér starfsreynslu erlendis sem kemur að beinum
notum við lögfræðistörf hér á landi. íslenskir dómarar geta t.d. ekki fengið
stöður við dómstóla í öðrum löndum og íslenskir lögmenn geta ekki stundað þar
almenn lögmannsstörf. Þó kann að vera samkvæmt núgildandi samnorrænum
samningum að fyrir hendi séu möguleikar til handa lögmönnum að stunda
lögmannsstörf í einhverjum mæli á Norðurlöndum. Þess ber að geta að í
undirbúningi er norrænn samningur um sameiginlegan vinnumarkað þeirra sem
lokið hafa a.m.k. þriggja ára æðra námi er veiti tiltekin starfsréttindi, en slíkur
samningur hefði í för með sér umtalsverða möguleika íslenskra lögfræðinga til
starfa annars staðar á Norðurlöndum.
Af þessum sökum m.a. er lögfræðingum brýn nauðsyn á að reyna að fylgjast
sem best með þeirri þróun sem sífellt á sér stað í lögfræði ekki síst í nágranna-
löndum okkar. Það er hægt að gera með ýmsu móti. Bækur og tímarit gera ætíð
sitt gagn en því er samt ekki að neita að bókakostur í lögfræði er af skornum
skammti hér á landi og þyrfti að gera stórátak til þess að auka hann.
Þýðingarmikið er að lögfræðingum gefist kostur á að stunda framhaldsnám
erlendis um lengri eða skemmri tíma. Það hefur raunar alltaf nokkuð tíðkast en
verið ýmsum tilviljunum háð hver háttur hefur verið á því og hvort til þess hefur
fengist nægilegt fjármagn. Að því er dómara varðar þyrfti að koma fastara
skipulagi á endurmenntun þeirra og mætti þar hafa til hliðsjónar það fyrirkomu-
lag sem háskólakennarar búa við. Hér er um að ræða mjög þýðingarmikið
verkefni.
81