Morgunblaðið - 20.01.2003, Blaðsíða 3
HM Í PORTÚGAL
MORGUNBLAÐIÐ MÁNUDAGUR 20. JANÚAR 2003 B 3
Ástralana, þeir eru tiltölulega
óþekkt stærð. Samt reiknar maður
ekki með miklu af þeim og því tel
ég okkur eiga að vinna þá, enda
verðum við að gera það ef við ætl-
um okkur einhverja hluti í þessari
keppni,“ segir Patrekur og snýr
tali sínu að portúgalska liðinu sem
Íslendingar hafa meiri reynslu af
að glíma við en fyrrgreindar þrjár
þjóðir.
Portúgalska liðið
er vel skipað
„Við höfum margoft leikið við
Portúgala og gengið misjafnlega á
móti þeim. Þeir eru gestgjafar
mótsins og hafa lagt mikla vinnu í
þetta lið sem þeir tefla fram. Það
verður því afar fróðlegt að sjá
hvaða áhrif heimavöllurinn hefur á
þá, hvort hann verður þeim til góðs
eða fjötur um fót. Portúgalska liðið
er skipað mörgum góðum leik-
mönnum sem leika flestallir með
félagsliðum í heimalandinu. Þjálf-
ari liðsins, Javier Garcia Cuesta, er
mjög fær á sínu sviði auk þess sem
hann hefur Svíann Mats Olsson sér
til halds og trausts. Á Evrópu-
mótinu í Svíþjóð í fyrra léku Portú-
galar ágætlega á stundum og töp-
uðu leikjum sínum ekki með
miklum mun. Þá hefur á stundum
vantað herslumuninn upp á að ná
árangri.
Í mínum huga er enginn vafi á
að Portúgalar eru með gott lið sem
verður að taka mjög alvarlega. Síð-
ast þegar við mættum þeim léku
þeir framiggjandi vörn, 3/2/1 minn-
ir mig frekar en 5/1, og jafnvel
geta þeir „dottið niður“ í 6/0 vörn.
Við eigum að þekkja flesta af þess-
um bestu leikmönnum Portúgal-
anna, þannig að það á ekkert að
geta komið okkur sérstaklega á
óvart í leik þeirra,“ segir Patrekur
sem telur hiklaust að íslenska liðið
eigi að vinna það portúgalska, en
það sé sýnd veiði en ekki gefin.
„Til þess að vinna verðum við að
eiga góðan leik, takist það, tel ég
sigurlíkurnar vera okkar megin.“
„Fyrirfram tel ég nokkuð víst að
það verðum við, Þjóðverjar og
Portúgalar sem komum til með að
kljást um efsta sætið í riðlinum.
Flestir veðja eflaust á að Þjóð-
verjar verði í efsta sæti þegar upp
verður staðið en ég er viss um að
við höfum alla burði til þess að
hreppa efsta sætið. Það er samt
nokkuð jafnt á komið með þessum
þremur þjóðum og sennilega má
segja að líklegasta röðin verði sú
að Þjóðverjar verði efstir, við í
öðru sæti og Portúgal í þriðja.
Okkar markmið er hins vegar
skýrt, það er að vinna báðar þessar
þjóðir eins og aðra leiki í riðlinum.
Við getum unnið Þjóðverja, það
höfum við gert í undanförnum
leikjum. Þýska liðið varð fyrir
áfalli á dögunum þegar sterkasti
maður þess, Daniel Stephan,
meiddist og tekur ekki þátt í
keppninni. Fjarvera Stephans veik-
ir þýska liðið verulega, á því er
enginn vafi, þótt alltaf sé talað um
að maður komi í manns stað.
Stephan er mikilvægur hlekkur í
vörn Þjóðverja og hraðaupphlaup-
um liðsins þannig að án hans er
það ekki eins sterkt og ella. Við
sýndum það á EM í Svíþjóð í fyrra,
þar sem hann var með, að við get-
um vel unnið Þjóðverja og því ætt-
um við ekki að geta endurtekið
leikinn að þessu sinni?“ spyr Pat-
rekur sem þekkir vel til þýska
landsliðsins eftir að hafa leikið í
þýsku deildinni í sjö ár. Talað hef-
ur verið um á síðustu dögum og
vikum að Þjóðverjar eigi í vand-
ræðum um þessar mundir, mikið sé
um meiðsli hjá sterkum leikmönn-
um auk þess sem ljóst sé að Steph-
an og rétthenta skyttan, Frank von
Behren, komi ekkert við sögu
vegna alvarlegra meiðsla. Jafn-
framt eru mikilar kröfur gerðar til
leikmanna og þjálfara vegna vax-
andi vinsælda handknattleiks í
Þýskalandi og síðast en ekki síst
voru Þjóðverjar hársbreidd frá
sigri á EM í fyrra, töpuðu fyrir
Svíum á vafasaman hátt í marg-
framlengdum leik. Patrekur segir
að vissulega sé mikil krafa gerð til
þýska liðsins enda sé það sterkt og
því ekkert óeðlilegt við að það auki
á kröfurnar.
Pressa á Þjóðverjum
„Þjóðverjar vilja gera betur en á
EM í fyrra og til þess verður að
vinna gullverðlaunin. Segja má að
svipað sé uppi á teningnum hjá
okkur eftir fjórða sætið á EM, þar
með vilja allir gera betur. En það
er engin launung á að þýska liðið
leikur undir gífurlegri pressu í
mótinu. Margir leikmenn liðsins
eru lítillega meiddir sem er ekkert
skrýtið því mikið álag hefur verið á
menn í deildarkeppninni auk þess
sem flestir hafa einnig verið í eld-
línunni í Evrópukeppni með sínum
félagsliðum. Það verður því einkar
fróðlegt að sjá hvaða áhrif þetta
hefur á þýska liðið þegar á hólminn
verður komið,“ segir Patrekur og
bendir á að styrkleiki þýska lands-
liðsins felist fyrst og fremst í góðri
vörn og frábærum markvörðum.
„Sóknarleikur Þjóðverja hefur á
tíðum ekki verið sá besti, en vörn,
markvarsla og hraðaupphlaup gera
gott betur en vega sóknarleikinn
upp. Það má ef til vill segja að
þessi atriði hafi einnig verið okkar
aðal á EM í Svíþjóð í fyrra. Það er
einfaldlega svo að það er ekkert
nýtt undir sólinni í handknattleik,
staðreyndin er sú að vörn og mark-
varsla verða að vera í lagi til þess
að lið geti náð árangri þegar út í
alvöruna er komið. Þetta eru þau
atriði sem leikir vinnast á. Ég hef
haft nokkra þjálfara á mínum ferli
og þótt þeir hafi verið hver öðrum
ólíkari hefur alltaf verið sama við-
kvæðið hjá þeim, sterk vörn og góð
markvarsla skilur kjarnann frá
hisminu. Leikir vinnast sjaldnast
eingöngu á sóknarleik hvað þá
heilu mótin. Þjóðverjar eru sterkir
þegar kemur að varnarleik og
markvörslu enda ekkert skrýtið
því þar í landi er höfuðáherslan á
þessi atriði,“ segir Patrekur Jó-
hannesson, leikmaður íslenska
landsliðsins, og horfir fram á veg-
inn á heimsmeistaramótinu hvergi
banginn og telur ekkert óeðlilegt
að gera þá kröfu að Ísland vinni
sinn riðil, a.m.k. að það hafni í öðru
sæti og komist með tvö stig áfram í
milliriðla.
sigur í sínum riðli á heimsmeistaramótinu í handknattleik í Portúgal
Morgunblaðið/Sverrir
’ „Þjóðverjar vilja gera betur en á EM ífyrra og til þess verður að vinna gullverð-
launin. Segja má að svipað sé uppi á ten-
ingnum hjá okkur eftir fjórða sætið á EM,
þar með vilja allir gera betur. En það er
engin launung á að þýska liðið leikur undir
gífurlegri pressu í mótinu.“ ‘
ÁSTRALAR taka nú þátt í
sínu þriðja stórmóti í hand-
knattleik. Þeirra frumraun var
í lokakeppni HM í Egyptalandi
árið 1999 og síðan voru þeir
með, sem gestgjafar, á Ólymp-
íuleikunum í Sydney árið eftir.
Ástralir léku samtals 11 leiki
í þessum tveimur mótum og
töpuðu þeim öllum stórt, nema
gegn Kína 1999 og síðan leikn-
um um 11.–12. sæti í Sydney.
Þá töpuðu þeir naumlega fyrir
Kúbumönnum, 26:24.
Úrslit leikja Ástrala í þess-
um tveimur mótum:
HM í Egyptalandi:
Ástralía – Frakkland 15:32
Ástralía – Júgóslavía 22:40
Ástralía – Svíþjóð 17:49
Ástralía – Kína 29:33
Ástralía – Suður-Kórea 18:38
ÓL í Sydney:
Ástralía – Svíþjóð 23:44
Ástralía – Spánn 23:39
Ástralía – Slóvenía 20:33
Ástralía – Túnis 24:34
Ástralía – Frakkland 16:28
Ástralía – Kúba 24:26
Ástralar
með ekk-
ert stig á
stórmóti
iben@mbl.is
GUÐMUNDUR Hrafnkelsson, markvörður íslenska landsliðsins, tekur þátt í sinni
sjöttu heimsmeistarakeppni í Portúgal. Guðmundur, sem hóf að verja mark Íslands
strax eftir HM í Sviss 1986 – þá sem markvörður Breiðabliks – var með á HM í
Tékkóslóvakíu 1990, sem varamarkvörður Einars Þorvarðarsonar, aðstoðarlands-
liðsþjálfara. Leifur Dagfinnsson, KR, var þá þriðji markvörðurinn og lék ekkert.
Guðmundur var orðinn liðsmaður Vals er hann varði markið á HM í Svíþjóð
1993, ásamt Bergsveini Bergsveinssyni, FH, og Sigmari Þresti Óskarssyni, KA.
Á HM á Íslandi 1995 á Íslandi vörðu þeir Guðmundur, Bergsveinn og Sigmar
Þröstur einnig mark Íslands.
Guðmundur og Bergsveinn vörðu markið á HM í Kumamoto í Japan 1997 og
Reynir Þ. Reynisson, Fram, tók þátt í einum leik, er Bergsveinn meiddist í upp-
hitun.
Guðmundur var markvörður þýska liðsins Nordhorn á HM í Frakklandi 2001 og
honum til trausts og halds var Birkir Ívar Guðmundsson, Stjörnunni. Þriðji mark-
vörðurinn, Sebastian Alexandersson, Fram, var á Íslandi, tilbúinn að fara til
Frakklands ef eitthvað kæmi uppá, en af óskiljanlegum ástæðum fór Þorbjörn
Jensson landsliðsþjálfari þá aðeins með fimmtán leikmenn á HM.
Guðmundur, sem er nú markvörður hjá ítalska liðinu Pallamano Conversano,
ver markið á HM í Portúgal ásamt Roland Vali Eradze, markverði Vals, sem varð
íslenskur ríkisborgari á dögunum. Hann hefur leikið sex leiki fyrir Ísland, en lék
80 landsleiki fyrir Georgíu.
Guðmundur í sjöttu HM
PORTÚGAL vann Sádi-Arabíu í síðasta æf-
ingaleik sínum áður en heimsmeistarakeppn-
in hefst, 32:24. Leikið var í Viseu þar sem
leikir B-riðilsins fara fram þar sem Íslend-
ingar og heimamenn leika m.a. Portúgalar
voru með örugga forystu allan leikinn gegn
Asíumeisturunum, þar á meðal 16:12 í hálf-
leik. Mörk Portúgals í leiknum skoruðu; Rui
Rocha 5, Victor Tchikoulaev 5, Filipe Cruz 4,
Álvaro Martins 4, Luís Gomes 4, Ricardo
Costa 3, Carlos Resende 2, David Tavares 2,
Carlos Galambas 1, Eduardo Coelho 1, Rui
Silva 1.
Portúgal mætir Grænlandi í fyrstu við-
ureign sinn á HM í dag, en áður eigast við Ís-
lendingar og Ástralar annars vegar og Þjóð-
verjar og Katar hins vegar. Íslendingar mæta
Portúgal í Viseu siðdegis á fimmtudaginn.
Portúgalar
fögnuðu sigri