Morgunblaðið - 24.09.2003, Blaðsíða 6

6 B MIÐVIKUDAGUR 24. SEPTEMBER 2003 MORGUNBLAÐIÐ
bílar
ÞÁ er hann kominn loksins með dís-
ilvél, Suzuki XL-7; sjö manna jepp-
inn sem byggður er á sjálfstæða
grind og er með háu og lágu drifi.
Frá því bíllinn kom á markað fyrst
árið 2001 hefur hann einvörðungu
verið boðinn með V6-bensínvél.
Fyrr á þessu ári kom hann með
nýjum innréttingum. Breytingarnar
voru ekki stórvægilegar en þó má
minnast á viðarskreytingu, ný inn-
byggð hljómtæki og almennt minni
plastkeim yfir mælaborðinu. Nú hef-
ur verið bætt um betur og komin
fjarstýring fyrir hljómtækin í stýrið,
þrjú þriggja punkta belti og hnakka-
púðar í miðjusæti auk þess sem XL-7
hefur fengið dálitla breytingu að ut-
an að framanverðu. Munar þar mest
um nýjar lugtir, grill og stuðara og
hefur bíllinn lengst um eina sjö cm
vegna stuðarans. Dísilbíllinn er með
loftinntaki á vélarhlífinni. Enn vant-
ar þó ýmislegt í bílinn til að hann geti
talist fullbúinn; eins og t.a.m. ljós í
speglum í sólskyggni, aðdrátt í stýri,
hraðastilli, loftkælingu og rafstýr-
ingu á ökumannssæti. Annar búnað-
ur er þó yfirleitt til staðar. XL-7 er
því miklu frekar nytjabíll en lúxus-
bíll og á góðu verði í kaupbæti.
Aðgreindur frá Grand Vitara
Umboðið hefur ákveðið að að-
greina sjö sæta jeppann frá fimm
manna Grand Vitara-jeppanum með
því að kalla bílinn eingöngu Suzuki
XL-7 og útlitsbreytingin hjálpar enn
frekar til við þá aðgreiningu. Auk
þess er bíllinn 4,76 metrar á lengd,
eða rúmum hálfum metra lengri en
Grand Vitara.
XL-7 er fremur hefðbundinn í út-
liti og lætur í raun lítið yfir sér.
Hurðir eru stórar með sterklegum
og stórum hurðaropnurum og aftur-
hlerinn með varadekkinu opnast til
hliðar. Rými er gott í bílnum fyrir
ökumann og fjóra fullorðna farþega
og aðgengi að þriðju sætaröðinni er
þægilegt fyrir minnstu farþegana.
Ókostur er þó að miðjusæti renna
ekki sjálfkrafa í upprunalega still-
ingu eftir að þeim hefur verið rennt
fram til að hleypa farþegum aftast í
bílinn. Aftursætin eru tvískipt, 60/40,
og bæði á sleðum svo hægt er að
renna þeim fram á við til að auka
fótarými farþega í þriðju sætaröð
eða aftur á bak til að auka fótarými
aftursætisfarþeganna. Farangurs-
rýmið er æði lítið þegar þriðja sæta-
röðin er í notkun og rétt hægt að
koma þar fyrir nokkrum innkaupa-
pokum. Einfalt er hins vegar að fella
sætisbökin niður til þess að auka far-
angursrýmið.
Lítil en furðuspræk dísilvél
Suzuki XL-7 fæst núna bæði með
V6-vélinni, 170 hestafla og kostar þá
frá um 3.090.000 króna sjálfskiptur
sem er óvenju hagstætt verð fyrir
jeppa af þessari stærð. Með dísilvél-
inni fæst hann eingöngu með fimm
gíra handskiptingu. Í fyrstu leist
undirrituðum ekki nema rétt mátu-
lega á það þegar í ljós kom að bíllinn
fengi tveggja lítra dísilvél, reyndar
með forþjöppu og millikæli. Þetta er
lítið slagrými og að óreyndu hefði
mátt telja að togkraftur svo lítillar
vélar yrði ekki nægur fyrir þetta
stóran bíl. Reyndin er hins vegar sú
að vélin kemur verulega á óvart fyrir
mikla vinnslu. Þetta er fjögurra
strokka, 16 ventla vél, smíðuð af
Peugeot sem skilar um 107 hestöfl-
um og togar að hámarki 270 Nm við
1.750 snúninga á mínútu. Hún er
vissulega nokkuð hávær en aflið er
viðunandi og gott betur þegar tekið
er af stað og í lausagangi en hávað-
inn fjarar út í þjóðvegaakstri. Þar
fyrir utan er vélin sparneytin sem er
umtalsverður kostur, ekki síst ef það
verður að veruleika að olíugjald
verði lagt á og þungaskattur felldur
niður með þeim afleiðingum að verð
á dísillítra verði í takt við verð á
bensínlítranum. Í blönduðum akstri
er uppgefin eyðsla 8 lítrar en um 10,3
lítrar í borgarakstri.
Hagstætt verð
XL-7 með dísilvélinni er á verði
sem keppinautarnir geta ekki keppt
við. Verðið er 3.050.000 krónur fyrir
sjö sæta jeppa. Bíllinn kemur á um
28 tomma dekkjum og láta margir
setja undir hann stærri dekk, 30
tommur, sem felur líka í sér að settir
eru klossar undir gormana svo veg-
hæðin minnkar um 4 cm. Slík breyt-
ing kostar 145.000 kr. og er þá verðið
komið upp í 3.195.000 kr. sem ennþá
telst afar hagstætt. Keppinautarnir,
þ.e. sjö sæta dísiljeppar í þessum
stærðarflokki, eru helstir Toyota
Land Cruiser 90, Nissan Terrano II,
Mitsubishi Pajero Sport og Daewoo
Rexton.
Morgunblaðið/Ásdís
Suzuki XL-7 er sjö manna jeppi á hagstæðu verði.
Suzuki
XL-7 loks
með dísilvél
Morgunblaðið/Ásdís
Varadekkið er á afturhleranum sem opnast til hliðar.
Morgunblaðið/Ásdís
Lagleg umgjörð er í kringum ökumann en lítill munaður.
Morgunblaðið/Ásdís
Ef tveir ferðast í miðjusæti er hægt að fella niður armpúða í miðjunni.
REYNSLUAKSTUR
Suzuki XL-7 2,0 dísil
Guðjón Guðmundsson
Morgunblaðið/Ásdís
Farangursrýmið er takmarkað ef
þriðja sætaröðin er í notkun.
Vél: Fjórir strokkar, 16
ventlar, forþjappa, milli-
kælir.
Afl: 107 hestöfl við 4.000
snúninga á mínútu.
Tog: 270 Nm við 1.750
snúninga á mínútu.
Drifkerfi: Afturdrifinn með
tengjanlegt fjórhjóladrif,
hátt og lágt drif.
Sætafjöldi: 7 sæti.
Hröðun: 15,2 sekúndur úr
kyrrstöðu í 100 km/klst.
Hámarkshraði: 155 km
klst.
Eyðsla: 8 lítrar í blönd-
uðum akstri, 10,3 lítrar í
borgarakstri.
Hemlar: Kældir diskar að
framan, skálar að aftan,
ABS.
Fjöðrun: Gormar.
Farangursrými: 121/353/
584 lítrar.
Eigin þyngd: 1.735 kg.
Lengd: 4.760 mm.
Breidd: 1.780 mm.
Hæð: 1.740 mm.
Veghæð: 18,3 cm.
Verð: 3.050.000 kr.
Umboð: Suzuki bílar hf.
Suzuki XL-7
gugu@mbl.is