Morgunblaðið - 29.08.2005, Page 4

4 MÁNUDAGUR 29. ÁGÚST 2005 MORGUNBLAÐIÐ
FRÉTTIR
Frábært tilboð til Benidorm í sumar á frábærum tíma. Nú getur þú notið
fegursta tíma ársins á þessum vinsæla áfangastað. Þú bókar og tryggir
þér sæti og 4 dögum fyrir brottför færðu að vita hvar þú býrð.
Skógarhlíð 18 • sími 595 1000 • www.heimsferdir.is
Stökktu til
Benidorm
31. ágúst eða 7. sept.
frá kr. 24.995
Verð kr. 24.995 í viku 31. ág.
Verð kr.29.990 í viku 7. sept.
M.v. hjón með 2 börn, 2-11 ára. Flug, gisting,
skattar og íslensk fararstjórn. Netverð á mann.
Aukavika kr. 10.000 á mann.
Munið Mastercard
ferðaávísunina
Verð kr. 29.990 í viku 31. ág.
Verð kr.39.990 í viku 7. sept.
M.v. 2 í stúdíó/íbúð. Flug, gisting, skattar og
íslensk fararstjórn. Netverð á mann. Aukavika
kr. 10.000 á mann.
LAUNAKÖNNUN meðal versl-
unarfólks bendir til að laun þess hafi
hækkað umfram almenna launaþró-
un. Víða vantar afgreiðslufólk til
starfa, nú þegar skólafólk snýr aftur
til náms.
Ný launakönnun meðal versl-
unarfólks fyrir tímabilið milli febr-
úar 2004 og febrúar 2005 verður birt
15. september næstkomandi. Gunn-
ar Páll Pálsson, formaður Versl-
unarmannafélags Reykjavíkur,
sagði að af launatölum mætti ráða að
launin hafi hækkað um 10% frá fyrra
ári. Launavísitala Hagstofunnar var
6,7% fyrir sama tímabil og laun
verslunarfólksins hækkuðu um 10%.
Gunnar Páll sagði starfsfólk VR
hafa á tilfinningunni að launin hafi
haldið áfram að hækka frá því í febr-
úar, án þess að hafa neinar tölulegar
sannanir fyrir því. „Við höfum sjald-
an upplifað jafn rólegt sumar og nú
hvað varðar deilumál og kvartanir,“
sagði Gunnar Páll og taldi það benda
til þess að verslunarfólk væri al-
mennt ánægt í vinnunni.
Dregið hefur úr atvinnuleysi með-
al félagsmanna VR, engu að síður
voru um 900 þeirra á atvinnuleys-
isskrá og atvinnuleysisbótum í júlí
síðastliðnum, að sögn Gunnars Páls.
Hann sagði atvinnuástand versl-
unarfólks hafa reynst vera árs-
tíðabundið. Atvinnuleysi væri venju-
lega mest í maí og júní, en síðan
drægi úr því eftir því sem nær drægi
jólum.
Samkvæmt heimildum Morgun-
blaðsins gætir þess í ýmsum versl-
unum nú að skortur sé á starfsfólki.
Nefnd voru dæmi um að í verslunum
væri auglýst eftir starfsfólki og eins
þar sem viðskiptavinir væru beðnir
afsökunar á dræmri þjónustu sem
stafaði af starfsmannaeklu. Af því
tilefni var hringt af handahófi í tvö
fyrirtæki.
Guðrún Helga Jónsdóttir, verk-
efnisstjóri í starfsmannadeild 10–11-
verslananna, sagði að á þessum árs-
tíma væru alltaf miklar hræringar í
starfsmannamálum. Skólafólk, sem
gegnt hefði fullu starfi að sumrinu,
væri nú ýmist að hætta eða að fara í
hlutastörf hjá fyrirtækinu. Ástandið
nú taldi hún ekki frábrugðið því sem
áður hefði gerst í lok sumars. Að-
spurð sagði Guðrún Helga að þokka-
lega vel hafi gengið að manna lausar
stöður.
Mikil breyting varð þegar
skólaárinu var breytt
Sigurbjörg R. Sigþórsdóttir,
starfsmannastjóri Bakarameist-
arans, sem rekur fimm verslanir,
sagði að nú ríkti tímabundið ástand
þegar erfitt væri að manna allar
stöður í fyrirtækinu. „Eftir að upp-
haf skólaársins var fært fram í ágúst
fór að verða erfiðara að manna síð-
ustu vikuna í ágúst og byrjun sept-
ember. Ég hef fengist við manna-
ráðningar í um 20 ár og fann mikinn
mun þegar skólaárinu var breytt,“
sagði Sigurbjörg. Hún nefndi einnig
að nú virtist vera næga atvinnu að
hafa fyrir afgreiðslufólk og að í ár
hafi reynst venju fremur erfitt að fá
nýtt fólk til starfa. Greinilegt væri
að umsækjendur um störf færu víða
og könnuðu launamál, aðbúnað og
hver biði best.
Laun verslunarfólks hækkuðu um 10% milli ára samkvæmt nýrri launakönnun
Morgunblaðið/Halldór Kolbeins
Í Bakarameistaranum er skilti þar sem beðist er afsökunar á töfum sem kunna að verða vegna skorts á starfsfólki.
Skortur er á fólki til afgreiðslustarfa
Eftir Guðna Einarsson
gudni@mbl.is
ÆTLA má að enn eitt árið hafi
metfjöldi fjallgöngumanna klifið
Hvannadalshnúk, hæsta tind
landsins, á þessu sumri, eða a.m.k.
vel á sjötta hundrað manns. Þar af
fóru 410 með Íslenskum fjallaleið-
sögumönnum, sem halda úti reglu-
legum ferðum frá Skaftafelli. Þó
ber þess að geta að 35 þeirra
komust ekki alla leið upp á tind-
inn.
Að sögn Elínar Sigurðardóttur,
framkvæmdastjóra ÍFLM, gekk
fólki vel að komast á fjallið fram-
an af sumri en eftir versl-
unarmannahelgi versnuðu að-
stæður vegna jökulsprungna. Af
þeim sökum hættu ÍFLM að bjóða
upp á ferðir um óákveðinn tíma. Á
mánudag bárust hins vegar þær
fréttir að kólnað hefði aftur og
snjóað og var þá ráðgert að kanna
aðstæður og telur Elín líklegt að
ferðirnar verði aftur í boði innan
skamms.
Nota þarf ísöxi, fjallalínur
og mannbrodda
Af þeim 410 sem fóru með
ÍFLM á Hnúkinn í sumar voru um
280 Íslendingar.
Auk þessa fjölda fóru um 100
manns með Ferðafélagi Íslands á
tindinn um hvítasunnuna og náðu
allir markmiði sínu nema einn og
var ferðin langstærsta Hnúksferð
sem FÍ hefur staðið fyrir. Þá fóru
28 með Útivist um sömu helgi.
Fyrir utan þennan fjölda fer nokk-
ur fjöldi manns á eigin vegum á
Hnúkinn.
Ljóst er að Hnúksferðir eru
orðnar gríðarvinsælar en um er
að ræða mjög langa fjallgöngu þar
sem nota þarf ísöxi, fjallalínur og
mannbrodda.
Talað hefur verið um að fjall-
ganga á Hnúkinn sé ein allra
lengsta fjalladagleið í Evrópu, en
þess má geta að óvíða er hæð-
arhækkun á einum degi jafnmikil
eða tvö þúsund metrar. Gangan
tekur um 15 klukkustundir fram
og til baka.
Fjölmennir hópar hafa gengið á Hnúkinn. Þessi mynd er frá ferð FÍ þangað síðastliðna hvítasunnu.
Metfjöldi hefur gengið á
Hvannadalshnúk í ár
ENGAR aðgerðir eru fyrirhugaðar
hér á landi vegna efnisins akrýlamíð í
matvælum, en í frétt sem birtist í
Morgunblaðinu í gær segir frá því að í
Kalíforníu verði hugsanlega sérstök
viðvörun látin fylgja frönskum kart-
öflum og kartöfluflögum vegna efnis-
ins, sem talið er að sé krabbameins-
valdandi.
Elín Guðmundsdóttir, formaður
matvælasviðs Umhverfisstofnunar,
segir að umræðan um akrýlamíð hafi
komið upp fyrir tveimur árum þegar
sænsk rannsókn sýndi fram á að efnið
gæti verið krabbameinsvaldandi. Hún
segir að nauðsynlegt sé að fá meiri
upplýsingar um skaðsemi efnisins áð-
ur en gripið væri til frekari aðgerða,
en í frétt Morgunblaðsins kemur fram
að rannsóknum beri ekki saman um
skaðsemi þess. Akrýlamíð er vatns-
leysanlegt efni (C3H5NO) sem er
fyrst og fremst notað við framleiðslu á
pólýakrýlamíði, en efnið skaðar erfða-
efnið í líkamanum og eykur þar með
hættuna á þróun krabbameins. Það
myndast í mat sem er eldaður við hátt
hitastig og er talið á kolvetni umbreyt-
ist þá í akrýlamíð. Dæmi um matvæli
sem mikið af akrýlamíð hefur mælst í
er kartöfluflögur, steiktar kartöflur,
djúpsteiktar kartöflur, hrökkbrauð,
kex og smákökur.
Það eru til einfaldar aðferðir til að
minnka inntöku á akrýlamíði. Ráðlagt
er að forðist mikla steikingu, brennd-
an mat, mikinn bakstur, mikið (dökk)
ristaðan mat, en almennt er sagt að
betra sé að sjóða matinn en að steikja,
ofnbaka, djúpsteikja og grilla.
Akrýlamíð í matvælum
Ekki er talin
þörf á aðgerðum