Morgunblaðið - 22.08.2013, Blaðsíða 14

14 | MORGUNBLAÐIÐ
L
istahópurinn Vinnslan setur upp
Vinnsluna í sjötta skiptið núna á
Menningarnótt og fer hún fram á
gömlu Reykjavíkurbryggjunni, í
hvalaskoðunarbáti og í gömlu verbúð-
unum. „Þetta er svona listaviðburður þar sem
við bjóðum fleiri listamönnum að taka þátt með
okkur og sýna verk sín í vinnslu. Við hópurinn
setjum svo saman prógram þar sem öll verkin fá
að njóta sín, en mynda um leið eina heild,“ út-
skýrir Vala Ómarsdóttir en hún er meðal þeirra
listamanna sem standa að Vinnslunni.
Gengið inn í þykjustuveislu
„Að þessu sinni verður umgjörð Vinnslunnar
„performance“ þar sem þemað er veisla,“ segir
Vala. „Þessi þykjustuveisla tengir saman verkin
og erum við búin að kalla í fjölda leikara til þess
að taka þátt í þessu. Að auki sóttu margir lista-
menn um að fá að setja upp sín eigin verk sem
hluta af heildarviðburðinum. Færri komust að
en vildu.“ Áhorfendur munu því upplifa leik-
verk, gjörninga, tónleika, myndlist og þess hátt-
ar, sem er allt hluti af stærra verki. Það má því
segja að áhorfendur geti upplifað sig sem hluta
af sýningu, meðan þau horfa á sýningu. „Vinnsl-
an #6 er í raun þykjustuveisla sem áhorfendur
ganga inn í. Rúsínan í pylsuendanum verður svo
óvænt uppákoma í bát rétt upp úr hálf ellefu, en
við viljum ekki gefa of mikið upp fyrirfram,“
segir Vala leyndardómsfull á svip.
Listamenn úr ólíkum áttum
„Við erum sjö talsins í listahópnum Vinnslan,“
segir Vala aðspurð út í félagsskapinn. „Fimm af
okkur, Guðmundur Ingi Þorvaldsson, María
Kjartans, Biggi Hilmars, Harpa Fönn Sigur-
jónsdóttir og ég sjálf, sjáum um listræna stjórn
og semjum saman leikhúsverk, vídeóverk og
gjörninga. Með okkur eru svo Arnar Ingvars-
son, sem sér um húsnæðismál og tæknimál, og
Starri Hauksson, sem sér um veitingarekst-
urinn. Flest okkar kynntumst í London fyrir
nokkrum árum og við byrjuðum í framhaldinu
að vinna saman. Við erum öll listamenn úr ólík-
um listgreinum og njótum þess að prufa okkur
áfram í að skapa saman með mismunandi
áherslur. Við höfum til dæmis sett saman gjörn-
inga, vídeó- og leikhúsverk.“
Í London kynntist Vinnslan listahópnum
Shunt en ásamt því að setja saman sínar eigin
sýningar og gjörninga veita þau einnig vettvang
fyrir aðra listamenn til þess að skapa. „Þetta
fannst okkur spennandi og þörf fyrir á Íslandi.
Þegar við vorum svo öll flutt heim til Íslands
hófum við þetta batterí. Við sjáum fram á að
Vinnslan eigi eftir að dafna vel hér á landi enda
mikil eftirspurn frá bæði listamönnum sem vilja
taka þátt og frá áhorfendum sem segjast aldrei
hafa upplifað annað eins.“
Vinnslan #6 fer fram á ýmsum stöðum í
kringum höfnina og Vala segir það enga tilviljun
að hafnarsvæðið var valið sem vettvangur. „Út
af blómstrandi listalífi og grasrótarstarfsemi
sem teygist út á Granda. Einnig eru þar fjöl-
breytt og áhugaverð rými sem er krefjandi að
glíma við. Okkur finnst spennandi að vinna í
óhefðbundnum rýmum sem gefa innblástur.
Rýmið er þá jafnvel eins og nýr meðlimur í
hópnum – kemur með sitt eigið efni í kökuna
sem við erum að baka saman. Á síðustu fimm
Vinnslum höfum við nefnilega verið á Norð-
urpólnum úti á Seltjarnarnesi. Það var alveg
frábært enda var húsnæðið stórt og virkilega
skemmtilegt til þess að setja upp allskonar list.
Nú er Norðurpóllinn lokaður og við komin með
nýjan fókus; við viljum færa okkur miðsvæðis
og prófa okkur áfram í allskonar skemmtilegum
rýmum, áður en við finnum okkur nýtt heimili.
Þessi Vinnsla verður sem sé við gömlu Reykja-
víkurhöfnina, í hvalaskoðunarbát og í gömlu
verbúðunum. Það er því spennandi ný áskorun.“
Innblástur frá sjónum
Eins og Vala útskýrir í framhaldinu þá er það
ekki bara manngerða hafnarsvæðið sem heillar
heldur líka hafið sjálft. „Þér að segja þá erum
við held ég öll líka með einhverskonar „obsess-
ion“ fyrir sjónum. Hann er svo kraftmikill og
leyndardómsfullur. Við bjuggum flest lengi er-
lendis og töluðum öll um að við söknuðum þess
að búa við sjóinn. Finna fyrir víðáttunni og
kraftinum. Enda höfum við samið nokkur verk
sem eru innblásin af sjónum.“
En hvers vegna er þá eiginlega öll þessi dýna-
mík á hafnarsvæðinu í Reykjavík þessa dagana?
„Er þetta ekki bara sama og gerðist til dæmis
í Austur-London og Austur-Berlín? Sama sagan
endurtekur sig aftur og aftur. Fyrst flytja list-
menn í ódýr rými, þar skapast innblástur fyrir
fleiri til að skapa og framkvæma. Svo byrjar þar
í kjölfarið ýmis rekstur og fólk tekur til við að
fegra og bæta. Svo fylgja hinir eftir og mannlífið
blómstrar. Þá hækkar fasteignir með þessa
staðsetningu í verði og í kjölfarið gerist sama
sagan annars staðar – eða hvað?“
Einu gildir hver framtíð hafnarsvæðisins er,
gestir Menningarnætur hafa margt til að
hlakka til frá hendi Vinnslunnar.
„Við verðum með magadans í káetu, hljóð-
heim á bát, uppsprettu í stangveiðisal, vacuum-
pakkaðan þriggja fermetra minjagrip fyrir túr-
ista, ást og ekki-ást, fossagöngu, ferðalag um
lostafull rými, djamm performance, sögustund
skipstjóra, tónleika og leikhúsverk, og veislu
sem endar með ósköpum í mögnuðu lokaatriði
rétt fyrir flugeldasýninguna!“ upplýsir Vala, en
Vinnslan byrjar kl. 20.00 og endar kl. 23.00.
Frekari upplýsingar um hópinn er að finna á
www.vinnslan.is.
„Við vinnum verkefnið í samvinnu við Friend
in Iceland þar sem höfuðstöðvar okkar verða og
Reykjavik Sea Adventures sem veita okkur að-
stoð og bátinn Christínu. Einnig hefur Sjó-
stangaveiðifélag Reykjavíkur aðstoðað okkur
og veitt okkur sal fyrir sýningar og Sægreifinn
veitir okkur skemmtilegt og óvænt rými fyrir
áhorfendur,“ segir Vala en Menningarnæt-
urpottur Landsbankans styrkir verkefnið fjár-
hagslega.
„Þess ber í lokin að geta að við munum vera
með happdrætti þar sem heppnir áhorfendur
geta unnið sérstakan passa, þar sem þau fá að
upplifa sig sem VIP í mögnuðu lokaatriði í báti.
En nú segi ég ekki meir.“
jonagnar@mbl.is
Vinnslan „Við verðum með magadans í káetu, hljóðheim á bát, uppsprettu í stangveiðisal, vacuum-pakkaðan þriggja fermetra minjagrip fyrir túrista, ást og ekki-ást, fossagöngu, ferðalag um lostafull rými,
djamm performance, sögustund skipstjóra, tónleika og leikhúsverk, og veislu sem endar með ósköpum í mögnuðu lokaatriði rétt fyrir flugeldasýninguna!“ segir Vala Ómarsdóttir.
Þykjustuveisla við höfnina
Menningarnótt er viðburður þar sem maður er manns gaman og mikilvægt er að fá sem flesta til að taka þátt. Listahópurinn Vinnsl-
an vinnur út frá svipuðu sjónarmiði og býður fleiri listamönnum að taka þátt.