Hafnarfjörður - Garðabær - 31.10.2014, Blaðsíða 6
31. Október 20146
menningin
Hildur
björgvinsdóttirÆvintýrin í Mússílandi
„Mussikids Academy er í raun vörulína af tölvuleikjum fyrir spjaldtölvur
sem kenna tónfræði, tónheyrn, tónlistarsögu og tónsmíðar og kynna um
leið góða tónlist fyrir börnum. Leikurinn gerist í Mússílandi þar sem
aðalpersónurnar eru fjórir karakterar sem kallast Mussikids eða Mússí-
krakkarnir. Þau drífa leikinn áfram og lenda í alls kyns ævintýrum; byggja
brú yfir fljótandi hraun, þræða sig í gegnum syngjandi fuglaskóg með
þyrnirósum og finna rétta lykla að dyrum völundarhúss svo ég nefni einhver
dæmi.“ segir Margrét Júlíana Sigurðardóttir, hugmyndasmiðurinn á bak
við leikinn Mussikids Academy. Áskoranirnar í leiknum segir hún allar
vera tónlistarlegs eðlis sem henti hverjum og einum þar sem hefðbundin
verðlaunakerfi virka hvetjandi á þann sem spilar.
Óraunhæfar kröfur til
tónmenntakennara
Margrét Júlíana hóf sjálf ung að leika
á hljóðfæri eftir eyranu, áður en hún
byrjaði í formlegu tónlistarnámi.
Þannig komst hún langt án þess að
tileinka sér almennilega nótnalestur
og fræðin á bak við tónlistina. 16 ára sat
hún hraðnámskeið í Tónlistarskólanum
í Reykjavík þar sem öll tónfræðin var
kennd á einu bretti og óskaði þess þá
að hún hefði fengið þessi nýju verkfæri
fyrr í hendurnar. Það sama segir hún
gilda um tónheyrn, hún sé eingöngu
þjálfun sem börn geti vel lært séu þau
hvött áfram. „Þetta er í raun eins og að
læra nýtt tungumál og ætti eiginlega að
vera kennt með sama hætti og tungu-
málin, þegar börnin eru ung og helst
þrisvar til fjórum sinnum í viku. Mér
finnst við til dæmis gera alveg fárán-
legar kröfur til tónmenntakennara að
ætla þeim að leggja inn einhvern grunn
með því að kenna þetta fag í 40 mín-
útna bekkjarkennslu einu sinni í viku.
Það þarf alveg kraftaverkafólk til þess
að það takist. Sömu sögu er að segja
með tónfræðina í tónlistarskólunum
enda hafa margir þeirra gefist upp á
að kenna yngstu nemendunum með
þessum hætti og taka tónfræðina í
staðinn inn í hljóðfæratímana sem eru
oftast einkatímar og það eru auðvitað
mjög dýrar mínútur.“
Margir hætt vegna
tónfræðinnar
Hugmyndina að leiknum segir Margrét
Júlíana hafa fæðst við komu spjaldtölv-
unnar á markaðinn. Hún hafi fljótlega
séð að hægt væri að nota tölvuna til
að kenna aukagreinar tónlistarinnar,
til dæmis sé hægt sé að setja nótu á
streng og með einni snertingu heyra
hvernig sú nóta eða laglína hljómar.
„Maður þekkir svo marga sem hafa
grátið það að hafa hætt í tónlistarnámi
vegna þess að þeim leiddist tónfræðin,
náðu kannski aldrei að skilja hana al-
mennilega og fóru þannig á mis við
mikil lífsgæði. Því að það að geta
notið tónlistar og ég tala ekki um að
geta spilað á hljóðfæri eða sungið og
jafnvel samið tónlist, þetta er auður
sem verður aldrei frá manni tekinn
og sem maður býr að alla ævi. Þannig
að það má kannski segja að þetta sé
mín tilraun til þess að bæta úr þessu,
með því að auðvelda aðgengi barnanna
að þessari þekkingu og auka skilning
þeirra á því sem er á bak við það sem
við heyrum.“
Ætlar sér stóra hluti
„Frá því að ég byrjaði að vinna með
þessa hugmynd fyrir þremur árum
hafa forritarar verið mjög vandfundnir,
sérstaklega fyrir mig sem kem úr allt
öðrum geira. Ég tek það reyndar fram
að ég hef ekki verið ein í þessu, bróðir
minn Snæbjörn Sigurðsson viðskipta-
fræðingurinn í fjölskyldunni hefur
verið með mér í þessu frá upphafi
og fjölmargir aðrir hafa stutt við mig
með ýmsum hætti.“ Margrét Júlíana
segir þau hafi fengið ítalskan tækni-
stjóra, Marco Bancale, sem búsettur
er á Íslandi, til samstarfs við sig við
hönnun á leiknum og í gegnum hann
hafi þau komist í samband við ítalska
fyrirtækið Studio Evil til að vinna ver-
kefnið áfram. Það hafi gengið ágætlega
en þeir hafi hinsvegar verið í mörgum
öðrum verkefnum og hönnunin hafi
því gengið hægar en ella. „Ég hef alltaf
ætlað mér stóra hluti með Mussikids
og þá verður maður að hafa fólk með
manni sem ætlar líka alla leið.“
Fyrsti leikurinn
að verða til
Fyrir um það bil tveimur mánuðum
fóru hjólin að snúast hratt. Fyrir til-
viljun komst Margrét Júlíana í samband
við Hilmar Þór Birgisson, rafmagns-
og tölvuverkfræðing, sem fékk nýlega
styrk frá Rannís fyrir meistaraverkefni
sínu í Háskóla Íslands. Verkefnið fólst
í að búa til forrit sem breytir söng eða
hljóðfæraleik í nótur og hafði Hilmar
Þór stofnað lítið fyrirtæki í kringum
það. „Pabbi Hilmars heyrði í mér í
útvarpinu og benti honum á að hafa
samband við mig sem hann og gerði
- og okkur hálfbrá báðum þegar við
áttuðum okkur á því að við værum í
raun að vinna að nákvæmlega sama
hlutnum. Nokkrum vikum síðar fórum
við svo að ræða um samstarf sem var
eiginlega alveg borðliggjandi, Hilmar
og félagar hans hafa allt sem mig vantar
og við höfum allt sem þá vantar. Við
byrjuðum svo að vinna saman fyrir
tveimur vikum síðan og nú algjörlega
flýgur þetta áfram. Með því að sam-
þætta allt það sem við höfum verið að
gera í sitt hvoru horninu er okkur að
takast að búa til prótótýpu að fyrsta
leiknum, Brúarleiknum í Mússílandi,
á aðeins örfáum vikum. Nokkuð sem
ég hafði gert ráð fyrir að myndi taka
marga mánuði til viðbótar. Og ég þori
varla að segja það en þetta er hrikalega
flott. Hilmar og félagar hans eru al-
gjörir snillingar á sínu sviði og þetta er
svo gaman að maður sofnar og vaknar
hlæjandi þessa dagana.“ Að fullbúa
tölvuleik og markaðssetja hann er
afar kostnaðarsamt að sögn Margrétar
Júlíönu. Samhliða gerð prótótýpunnar
er nú undirbúin fjáröflunarherferð í
gegnum vefinn Kickstarter auk þess
sem leitað er eftir fjárfestum í verk-
efnið.
Styrkur til rannsókna
Í sumar hlaut Mussikids Academy
stóran styrk frá Nordplus, ætluðum til
rannsókna á áhrifum leiksins á náms-
árangur barna í tónlistarnámi, bæði í
tónmennt í grunnskólum og tónfræði
í tónlistarskólum. Þá verður skoðað
hvernig nemendur og kennarar nýta
sér forritið. Rannsóknin mun fara fram
bæði í grunnskólum Garðabæjar og
Tónlistarskóla Garðabæjar og í fimm
grunnskólum í Eistlandi. „Um leið
fáum við góða innsýn inn í það hvað
er að virka og hvað ekki í leiknum. Eins
langar okkur að skoða hvort að þetta
hafi áhrif á færni í öðrum greinum til
dæmis stærðfræði. “
„Mér finnst við gera alveg fáránlegar kröfur til tónmenntakennara að ætla
þeim að leggja inn einhvern grunn með því að kenna þetta fag í 40 mínútna
bekkjarkennslu einu sinni í viku. Það þarf alveg kraftaverkafólk til þess að
það takist,“ segir Margrét Júlíana.
Skjámynd úr leiknum.
UltraGrip 8UltraGrip Ice+ UltraGrip 8 Performance Ultragrip Ice Arctic
Goodyear gæðadekk færðu hjá okkur
Klettagörðum 8-10 | 104 Reykjavík | Sími: 590 5100 | Suðurhrauni 2b | 210 Garðabær | Sími: 590 5290 | www.klettur.is
NÝTT DEKKJAV
ERKSTÆÐI
BJÓÐUM EINNIG: