Akureyri - 11.12.2014, Side 8

8 46. tölublað 4. árgangur 11. desember 2014
VILTU SEGJA SKOÐUN ÞÍNA?
Akureyri vikublað óskar eftir að komast í samband við bæjabúa sem
sjaldan eða aldrei hafa veitt viðtöl en væru til í að segja skoðun sína í
blaðinu eða veita stutt viðtöl. Vinsamlegast sendið okkur tölvu-
póst á bjorn@akureyrivikublad.is eða hringið í síma 862 0856.
LOF OG LAST VIKUNNAR
LAST vikunnar fær bílaverkstæði Hölds
á Akureyri, segir íbúi á Norðurlandi, Skúli,
sem sendi blaðinu bréf.
„Það brotnaði lítið plast stykki aftan á bíln-
um mínum sem sprautar rúðupissinu uppá
rúðuna. Það lét ég panta hjá umboðinu
og þeir skoðuðu bílinn. Sú afgreiðsla tók
rúmlega 6 mánuði og þegar ég kom að
sækja stykkið kom í ljós að það var aðeins
búið að panta litla hlíf ofan á stykkið sem
ég bað um að yrði pantað. Eftir tveggja
mánaða bið í viðbót (8 mánuðir alls)
hringdu þeir í mig og sögðu mér að koma
strax að sækja því þeir gætu ekki verið að
bíða með varahlut sem ekki væri búið að
greiða fyrir “það er eins gott að þú komir
við allra fyrsta tækifæri því annars látum
við hlutinn.” sagði fýldur maður í símann.
Þegar ég kom var mér gert að greiða
rúmar 5.000 kr. (þ.e. 1.600 fyrir stykkið og
rest fyrir ísetningu sem átti að taka innan
við mínútu). Ég neitaði að greiða fyrir
ísetninguna og borgaði stykkið. Stykkið
reyndist vitlaust og ætlað fyrir rúðupiss að
framan en ekki að aftan. Eftir þrjár vikur
hef ég ekki fengið endurgreiðslu fyrir
stykkinu sem ég skilaði um leið. Þeir kröfð-
ust nótu til þess að endurgreiða, en þeir
tóku nótuna sjálfir í upphafi án þess að
ég fengi hana nokkurntímann í hendur og
merktu hana með endurgreiðslu. Þegar ég
reyni að hringja og spyrjast eftir þessu er
fátt um svör og enginn virðist tilbúinn til
að aðstoða eða viðurkenna þessi mistök,“
skrifar Skúli meðal annars í löngu bréfi.
LOF fá Miðbæjarsamtökin og aðrir sem
tóku þátt í að skapa notalega stemmn-
ingu í bænum síðastliðið föstudagskvöld.
Svo mælir kona á Brekkunni sem hafði
samband við blaðið. „Kertastemmningin
var kózý og bara allt til fyrirmyndar. Það
þarf að gera meira til að fá fólk í miðbæ-
inn. Þar eigum við margir bæjarbúar okkar
bestu minningar um aðdraganda jólanna,“
segir konan.
LOF fær Rúvak fyrir að upplýsa
einkunnaskandalinn hjá Námsgagnastofn-
un. Aukið aðhald fjölmiðla stuðlar að
betra samfélagi.
AKUREYRI VIKUBLAÐ 46. TÖLUBLAÐ, 4. ÁRGANGUR 2014
ÚTGEFANDI Fótspor ehf. ÁBYRGÐARMAÐUR Ámundi Ámundason 824 2466, amundi @ fotspor.is.
FRAMKVÆMDASTJÓRI Ámundi Steinar Ámundason, as @ fotspor.is.
AUGLÝSINGASTJÓRI Ámundi Steinar Ámundason, as @ fotspor.is. 578-1193.
RITSTJÓRI Björn Þorláksson, bjorn @ akureyrivikublad.is, 862 0856 MYNDIR Björn Þorláksson, Völundur Jónsson og fleiri.
UMBROT Völundur Jónsson PRENTUN Ísafoldarprentsmiðja - Svansmerkt prentun. DREIFING
14.500 EINTÖK ÓKEYPIS – UM ALLT NORÐURLAND
Sannfæring
til sölu
Frétt birtist í síðustu viku um að sveitarfélögum á Suður-
landi stæði nú til boða að kaupa sig inn í þáttaröð þar
sem sjónvarpsstöðin N4 ætlar að fjalla um sveitarfélögin
á jákvæðan hátt. Vísir sagði frá. Markmið þáttanna er að
„stuðla að aukinni og jákvæðri umfjöllun um atvinnulíf
og mannlíf á svæðinu“. Fjögur sveitarfélög í uppsveitum
Árnessýslu hafi þegar ákveðið að að leggja að lágmarki
hálfa milljón króna hvert í þættina og tryggja þannig
jákvæða umfjöllun.
Það er frábært hve N4 hefur vegnað vel en það kvikna
ótal viðvörunarljós þegar fréttin er lesin. Fjölmiðlar hafa
nefnilega siðlegar skyldur. Þeim er ætlað mikið vægi í
lýðræðinu, þeim er m.a. ætlað að vera öryggisventlar,
sjálfstæðir öryggisventlar, sem hygla ekki einum hópi
um fram aðra. Peningar mega ekki ráða för, því þá fara
fjölmiðlar að bjaga lýðræðið enn frekar – fremur en að
berjast gegn frekari ójöfnuði, sem lýst hefur verið sem
mikilvægasta hlutverki fjölmiðla nú um stundir.
Nægilega margar rannsóknir hafa verið unnar hér
á landi til að hægt sé að staðhæfa að valdhafar í skjóli
auðs fái oft aðra og mýkri meðhöndlun en hinir sem ekki
búa yfir peningavaldi, þótt svona „gylliboð“ bætist ekki
ofan á. Ekki er hægt að skáka í því skjóli einu að N4 sé
ekkert í fréttum, bara í dagskrárgerð og hafi því engar
siðlegar skyldur. Ef eitt sveitarfélag hefur efni á að kaupa
og ritstýra jákvæðri umfjöllun (sem erfitt getur verið fyrir
áhorfandann þegar sýning innslagsins fer fram að sjá að
sé kostuð) situr annað sveitarfélag sem ekki hefur burði
til að taka þátt í svona leik ekki við sama borð. Ef úthýsa
á dagskrárvaldi fjölmiðla (agenda setting) þarf í öllu falli
skýrar reglur um það. Og hvað með jafnræðisregluna?
Lýðræðisleg skylda fjölmiðlamanns er sú ein að halda
trúnað við almannahagsmuni. Ekki hagsmuni hinna betur
stæðu, þvert á móti er bundið í siðareglur víða um heim
að blaða- og fréttamenn skuli beita sér fyrir því að ljá
hinum raddlausu rödd, þeim sem hafa oft úr minnstu að
spila og ráða ekki skilgreiningarvaldinu hverju sinni.
Ég vona að N4 haldi áfram að blómstra en ef svona
stefna verður ráðandi án þess að hún sæti þaulskoðun
og gagnrýni gæti þótt freistandi fyrir fleiri fjölmiðla
að hætta hokrinu sem fylgir sjálfstæðri og þá ekki síst
gagnrýninni ritstjórnarstefnu, því mikilvægar fréttir
taka tíma og eru ekki ábatasamar í veraldegum skilningi
þótt bjargi heilu samfélögunum þegar best lætur. Skref
N4 má ekki verða til þess að fleiri fjölmiðlar sem áður
fluttu fréttir fari að líta á blaðamennsku og fjölmiðla-
rekstur sem hvern annan bissness. Fjölmiðlar eru ekki
nein venjuleg fyrirtæki.
Daginn sem markaðshagsmunir einir ráða för fjöl-
miðla og öll umfjöllun gengur út á keyptar glansmyndir
og glimmer er tímabært að jarðsyngja áður göfugt hlut-
verk fjölmiðla. Þurrka út hugtakið fjórða valdið og detta
bara í það. Allt verður þá til sölu. Líka sannfæring og
siðferði. Hver býður best?
Björn Þorláksson
Varar við einkavæð-
ingu skíðasvæðisins
Úlfar Hauksson, sjómaður, stjórnmála-
fræðingur og kennari á Akureyri segist
hafa töluverðar efasemdir um að rétt
sé að einkavæða skíðasvæðið í Hlíðar-
fjalli.
„Ég tek undir þær raddir sem
telja að ef af svona útvistun verður
þá muni verðlag hækka,
reynslan kennir mönnum
það. Þegar fram í sækir
gæti farið svo að skíðaiðk-
un yrði ekki lengur almennt
fjölskyldusport. Þeir sem
myndu taka að sér svona
rekstur gera það ekki með
félags- og samfélagshugs-
un að baki. Ef menn eru í
alvöru að spá í svona þá þarf
að markmiðssetja og skil-
yrða slíkan samning afar vel
og að ígrunduðu máli. Það
þarf líka að geirnegla rétt-
arstöðu starfsmanna sem
yrðu þá ekki lengur á ábyrgð bæjarins,“
segir Úlfar.
Raddir hafa komið fram í Akureyri
Vikublaði sem sýna að áhugi er fyrir
hendi um að einkavæða skíðasvæðið.
Eftir því sem næst verður komist hefur
engin alvarleg pólitísk umræða verið
tekin um það innan bæjarstjórnar en
viðskiptamenn hafa sett sig í samband
við bæjarstjóra og sýnt breytingum
áhuga að sögn Eiríks Björns Björg-
vinssonar bæjarstjóra. Haldið hefur
verið fram að einkavæðing gæti lengt
opnunartíma og í einhverjum tilvik-
um bætt þjónustu. Úlfar Hauksson
spyr hins vegar: „Hver á að
taka skellinn þegar og ef
við fáum erfiða vetur, hvort
heldur sem er vegna snjó-
leysis og tíðarfars sem gerði
sjóframleiðslu erfiða, eða
vegna annara veðurskilyrða
sem fækka myndi opnunar-
dögum? Hafa menn hugs-
að útí það? Ef rekstaraðili
færi nú bara á hausinn um
mánaðarmótin janúar-febr-
úar og myndi bara segja:
“Því miður opnum við ekki í
vetur vegna slæmrar stöðu....
? Það er í mörg horn að líta
þegar menn velta upp svona hugmynd.“
Beinn rekstur skíðasvæðisins hefur
sumpart verið Akureyrarbæ þungur
en afleidd áhrif, gestakomur og þau
umsvif sem þeim fylgja, auk lýðheilsu-
sjónarmiða verða á móti seint metin til
fjár. „Ekki efa ég að því fylgir kostn-
aður að reka skíðasvæðið. En þá kom-
um við að þeirri spurningu hvernig
samfélag viljum við hafa á Akureyri
og hverju fjallið skilar í raun af sér í
bæjarsjóð þegar upp er staðið? Fjallið,
ásamt öðrum útivistarmöguleikum og
fjölbreyttu menningarstarfi og dægrar-
dvöl, laðar fólk að bæði til búsetu og
fólk sem vill heimsækja bæinn til að
njóta þess sem boðið er upp á. Um
þetta mætti hafa mörg orð bæði hvað
varðar hina samfélagslegu vídd og hina
hagfræðilegu. Nú efa ég ekki að einka-
aðilar gætu gert góða hluti við rekstur
skíðasvæðisins. Hins vegar hafa allir
innviðir sem þar eru til staðar verið
byggðir upp af almenningi á Akureyri
og því ber að stíga varlega til jarðar
áður en tekin verður ákvörðun um að
útvista rekstrinum. Þetta er nefnilega
töluvert flókið og mikilvægt mál sem
snertir samfélagið á Akureyri í heild
sinni. Vel má vera að einhverskon-
ar einkarekstur tengdur svokallaðri
fjallaskíðamennsku, þ.e. utanbrautar-
skíðamennsku þar sem farið er á tinda
utan alfarleiðar, geti rúmast á svæðinu
samhliða hefðbundinni skíðamennsku.
Það eru ýmsar hliðar á þessu máli og
margir möguleikar í boði í fjallinu sem
er paradís okkar Akureyringa,“ segir
Úlfar Hauksson. a
Úlfar Hauksson
Að mörgu er að hyggja fyrir jólin. Þessir karlar láta öryggi göngufólks sig varða. Völundur