Dagblaðið Vísir - DV - 03.04.2013, Blaðsíða 16

16 Umræða 3. apríl 2013 Miðvikudagur
Helgi Hrafn Gunnarsson, oddviti Pírata í Reykjavík
norður, svaraði spurningum lesenda á Beinni línu.
Thorlaug Agustsdottir Hver er helsta
sérstaða Pírata miðað við aðra flokka
sem bjóða núna fram til Alþingis?
 Helgi Hrafn Gunnarsson Sérstaða Pírata
felst í því að vera í fyrsta lagi nútímamiðaður
og í öðru lagi alþjóðamiðaður flokkur. Það er
þess vegna sem við tönnlumst stanslaust
á internetinu í flestum okkar málflutningi,
það er vegna þess að hinir flokkarnir hafa
ekki náð að fylgja þróun síðustu ára í
upplýsingatækni, þrátt fyrir að sú þróun hafi
í reynd gjörbreytt öllu sem við gerum. Við
viljum nútímalega nálgun á svo gott sem öll
málefni. Þar koma inn klassísk málefni eins
og tjáningarfrelsi og auðvitað lýðræðið, í
nútímaljósi.
Kristinn Briem Gætu hugmyndir Pírata
ekki valdið glundroða ef þær yrðu settar
í framkvæmd?
 Helgi Hrafn Gunnarsson Ég sé ekki alveg
hvernig það ætti að gerast, nei. Með fullri
virðingu eru alltaf uppi raddir um að þetta
eða hitt „setji allt á annan endann“ eða að
ef þetta eða hitt, þá „fari allt til fjandans“ en
ég hef aldrei séð það rætast … þvert á móti
eingöngu þegar enginn virðast búast við því,
svo sem í hruninu 2008. Frekari áhyggjur hef
ég af „glundroða“ ef stjórnvöld fara ekki að
taka þátt í heiminum sem við búum við núna,
frekar en stanslaust að reyna að stjórna í
heimi sem er liðinn.
Haukur Ísleifsson Eru einhverjir flokkar
sem Píratar væru ekki tilbúnir að vinna
með í stjórnarsamstarfi eftir kosningar?
 Helgi Hrafn Gunnarsson Nei, það eru engir
slíkir flokkar. Aðferðafræði okkar gagnvart
öðrum flokkum endurspeglast af IMMI-
þingsályktuninni sem Birgitta Jónsdóttir
lagði fram og Alþingi samþykkti einróma.
– Þessi málefni eru ekki jafn umdeild og
maður myndi halda, heldur fyrst og fremst
hunsuð. Við lítum á það sem verksvið okkar
að fá hlutina í gegn í samvinnu við alla aðra
flokka. Sú aðferðafræði hefur sannað sig að
virki fyrir Pírata, bæði í IMMI-þingsályktunar-
tillögunni og vissulega á Evrópuþinginu. Við
sigrum með því að sannfæra. Við erum ekki
hrædd við lýðræðið.
Rúnar Sigurjónsson Hvert er mat þitt á
félagslega kerfinu og kerfisfræðingum
sem notfæra sér það? Er það hugsun
Pírata að endurskoða og jafnvel í raun stokka
það kerfi upp á nýtt til að koma í veg fyrir
misnotkun á félagslega kerfinu?
 Helgi Hrafn Gunnarsson Það sem stórvant-
ar í allri stjórnsýslunni er aukið gegnsæi. Það
er enginn sjáanlegur ágreiningur um að 1) við
þurfum sterkt félagslegt kerfi, 2) við ættum
að minnka misnotkun á því eftir bestu getu.
– Með stórauknu gegnsæi, skýrari reglum
og meiri nýtingu upplýsingatækninnar má
auka til muna skilvirkni félagslega kerfisins
og reyna að skerpa línurnar milli þeirra
sem þurfa á hjálp að halda og þeirra sem
misnota kerfið. Að því sögðu er mikilvægt
að stjórnmálamenn taki ekki ákvarðanir um
hver þurfi raunverulega hjálp og hver ekki,
heldur sérfræðingar á sínu sviði, svo sem
læknar, geðlæknar og sálfræðingar. Þetta er
akkúrat málefni sem stjórnmálamenn eiga
sem minnst að vasast mest í heldur útbýta
verkefnum á rétta aðila.
Héðinn Björnsson Hversu stóran hluta
af þjóðarframleiðslu finnst þér að hið
opinbera ætti að ráðstafa? Meira en
núna, minna en núna eða nokkurn veginn
núverandi samneyslustig?
 Helgi Hrafn Gunnarsson Það fer algerlega
eftir aðstæðum. Til lengri tíma er auðvitað
betra að kerfið sé sem minnst að því gefnu
að ríkið uppfylli skyldur sínar en í þeim
aðstæðum sem við erum núna, þ.e. enn að
rétta úr kútnum eftir hrunið 2008, þá er ekki
tímabært að hið opinbera ráðstafi minna. En
þetta fer mjög mikið eftir aðstæðum hverju
sinni. Það styttist í að það verði svigrúm til
þess að minnka samneysluna en það er ekki
tímabært ennþá … reyndar er heilbrigðis-
þjónusta sérstaklega illa stödd núna.
Bjarki Grönfeldt Er netið algjörlega
heilagt? Má ekki undir neinum
kringumstæðum snerta við því?
 Helgi Hrafn Gunnarsson Það væri hægt
að skrifa heila bók sem svar við þessari
spurningu. Í stuttu máli, nei, netið er ekki
„algjörlega heilagt“, hvað sem er átt við
með því, og auðvitað má snerta við því. – En
það sem má ekki gerast, er að það komist
undir stjórn ríkisstjórnar eða fyrirtækis.
Internetið er í grundvallaratriðum bara
samskipti. Stjórn yfir internetinu þýðir stjórn
yfir samskiptum. Yfirvöld nútímans skilja
ekki afleiðingar gjörða sinna, svo sem þegar
það á að fara að ritskoða netið, og átta sig
ekki á hættunum. Það er ýmislegt sem þarf
að gera, til dæmis skerpa reglur um friðhelgi
einkalífsins. En þær aðferðir þurfa bæði að
vera raunhæfar, þær þurfa að virka gegn
þeim vanda sem stefnt er að því að leysa og
þær verða að virka án gerræðis og tortímingu
internetsins. Ritskoðun er ekki bara slæm
þegar „vont efni“ er ritskoðað, heldur er
ritskoðun í eðli sínu andlýðræðislegt tæki.
Að gefa yfirvöldum stjórn yfir internetinu er
að gefa þeim stjórn yfir því sem við hugsum,
heyrum, sjáum og segjum. Það má aldrei
gerast.
Guðfinna Kristinsdóttir Hafið þið
áhuga á að skoða aðra gjaldmiðla en
íslensku krónuna, ef svo, hverja?, ef ekki,
af hverju ekki?
 Helgi Hrafn Gunnarsson Algerlega!
Persónulega tel ég kanadíska dollarann vera
rétta valið en það er alveg sjálfsagt að skoða
aðrar leiðir líka, svo sem bindingu við aðra
gjaldmiðla. En alveg sama hvað gerist, þá
þarf tvennt að koma til 1) Viðræðum við ESB
þarf að ljúka með skýrri niðurstöðu. 2) Stór-
auka þarf erlent fjármagn á Íslandi. – Þaðan
kemur stefna okkar um netvænt Ísland, því
internetið er verulega vannýtt til að hala inn
erlendan gjaldeyri, sem gæti gefið okkur fleiri
valmöguleika. Það sem er mikilvægt að skilja
varðandi krónuna er að hún sveiflast til í
alþjóðlegu samhengi. Ellegar hefði ekki verið
verðbólguskot í kjölfar kreppunnar og ellegar
væri ekki túrisminn að blómstra svona
mikið. Gjörvallur efnahagur okkar byggist á
alþjóðlegu samhengi og það er kominn tími
til að tala meira um það. En stjórnmálamenn
vilja frekar lofa ókeypis peningum en díla við
það erfiða mál. – Allt kemur til greina í gjald-
eyrismálum en fyrst þarf sá málaflokkur að
fá verðskuldaða athygli.
Robert Gudmundsson Hvernig ætlið
þið að bregðast við síaukinni
fíkniefnaneyslu landsmanna?
 Helgi Hrafn Gunnarsson Með þeim
aðferðum sem hafa sannað sig, nefnilega
hinni svokölluðu „portúgölsku aðferð“ sem
miðar að því að í staðinn fyrir að refsa fólki
fyrir að eiga kannski við vandamál að stríða,
bjóða því hjálp og aðstoð sem er við hæfi. –
Fyrir 10 árum var fíkniefnaneysla aðalmálið í
Portúgal. Núna kemst hún ekki inn á lista yfir
það sem kjósendur hafa áhuga á, vegna þess
að stefnan hefur virkað svo stórkostlega.
Lausnin er að líta á fíkn sem heilbrigðismál,
ekki lögreglumál, og afglæpavæða fíkni-
efnaneyslu.
Árni Sigurðsson Þið talið fyrir
portúgölsku leiðinni í vímuefnamálum.
Hvar stendur flokkurinn gagnvart
lögleiðingu kannabisefna og skattlagningu sölu
þeirra eins og áfengi? (nb skv. nýlegri frétt væri
eingöngu VSK af núverandi kannabisneyslu á
Íslandi um milljarður á ári).
 Helgi Hrafn Gunnarsson Við höfum ekki
tekið það fyrir sérstaklega vegna þess að
það er ekki tímabært að okkar mati að fara
út í það á meðan fíklar eru skilgreindir sem
glæpamenn. Þegar afglæpavæðingin hefur
sannað sig verður kannski pólitískt raunhæft
að lögleiða kannabisefni en þeim sem vilja
lögleiða kannabisefni segi ég eftirfarandi;
óréttlætið í dag er meira en svo að ykkur sé
sagt hvað þið megið gera við eigin skrokk
og huga; við erum að refsa þeim sem eiga
miklu meira bágt en mestu hasshausarnir.
Það vandamál þarf að leysa strax í gær. En
það æðislega við portúgölsku aðferðina
sem við aðhyllumst, er að hún virkar í reynd
til að draga úr vandanum. Allir, burtséð frá
viðhorfum til kannabisefna, ættu að taka
undir portúgölsku aðferðina. En umræðan
um kannabisefni fjallar oftast um að þau
séu ekki nógu skaðleg til að bann sé við
hæfi, en fyrst þarf að athuga, að það ber
að afglæpavæða fíkniefnaneyslu vegna
þess að hún er skaðleg, ekki vegna þess að
hún er örugg. Vonandi verður tímabært að
ræða lögleiðingu kannabisefna alvarlega
fyrir næstu kosningar. En akkúrat núna
þarf að forgangsraða rétt; hætta að refsa
fórnarlömbunum.
Ástasigrún Magnúsdóttir Hver eru
áhersluatriði Pírata í velferðarmálum?
 Helgi Hrafn Gunnarsson Aðaláhersluatriðið
er fíkniefnastefnan vegna þess að þar er svo
gott tækifæri til að gera svo mikið gott við
svo alvarlegu vandamáli sem engum flokki
á Íslandi virðist hafa dottið í hug að taka
alvarlega. – En við sjáum ekki miklar deilur
um velferðarmálin, aðallega vannýtingu á
úrræðum og lélegar aðferðir, til dæmis við að
greina alvöru vandamál frá sýndarvanda-
málum. Lykilinn að góðu velferðarkerfi er
skilvirkni og góðar upplýsingar sem gera
okkur kleift að takast rétt á við hluti.
Gyrðir Egilsson Hvar standa Píratar
þegar kemur að verðtryggingu ?
 Helgi Hrafn Gunnarsson Þetta er tvíþætt
spurning, annars vegar hvað sé hægt að gera
fyrir fólk í skuldavanda í dag, og hins vegar
hvernig kerfið eigi að virka til frambúðar.
Fyrir fólk í vandræðum í dag viljum við hjálpa
því að sækja rétt sinn fyrir dómstólum og
aðstoða eftir fremsta megni fólk við að
skuldbreyta yfir í óverðtryggð lán ef það vill
þau. – En þau eru ekkert ókeypis heldur, vext-
ir geta orðið mjög háir þannig að það fer eftir
aðstæðum hvers og eins hvort þeirra henti
betur. En það þarf að setja á lyklalög þannig
að lántakendur geti í framtíðinni keypt sér
húsnæði með húsnæðið sem veð. Það væri
líka heilbrigðara að bankarnir lánuðu fé út
frá þeirri áhættu að ef lántakandi geti ekki
greitt lánið þá fái bankinn bara húsið, ekki
líka bílinn og GSM símann. – Sumsé, við erum
hlynnt lyklalögum, en eins og fólk veit, þá
er ekki hægt að beita þeim fyrir þá sem eru
þegar með verðtryggt lán vegna samnings-
og eignarréttar.
Ólafur Ólafsson Er hægt að berjast
fyrir frelsi á internetinu ásamt því að
verja höfundarrétt á áður útgefnu efni á
sama tíma? Hvar stendur Pírataflokkurinn
gagnvart CISPA /SOPA?
 Helgi Hrafn Gunnarsson Takk fyrir þessa
spurningu því hún veður beint í mikilvægi
höfundarréttar. Við erum algerlega í einu og
öllu gjörsamlega og ófrávíkjanlega á móti
hryllingi á borð við SOPA, PIPA, ACTA og
CISPA. – Þarna er um að ræða löggjöf sem
lýsir því best hvað internetið og frjáls sam-
skipti eru í mikilli hættu sökum höfundar-
réttar og því mikilvægi þess að endurskoða
hann. – Við erum ekki á móti höfundarrétti
samt, heldur viljum uppfæra hann þannig
að ekki þurfi svona aðgerðir til þess að
framfylgja lögum. Klassískar hugmyndir
um höfundarrétt eru ekki samhæfðar við
upplýsingaöldina og í staðinn fyrir að taka til
baka bestu tækniframför mannkyns finnst
okkur eðlilegra að uppfæra lögin í samræmi
við nútímann. Þetta er skólabókardæmi um
mikilvægi höfundarréttar og kemur einmitt
inn á að viðhorf okkar snúast ekkert um að
fá að niðurhala höfundarréttarvörðu efni
ókeypis. Það snýst um tjáningarfrelsið,
friðhelgi einkalífsins og réttinn til samskipta
án eftirlits og samþykkis sérhagsmuna. Það
augljósasta sem hægt er að gera til að laga
höfundarrétt að nútímanum án þess að
ganga of hart nærri hagsmunum listamanna
og hugbúnaðargerðar er að lögleiða dreifingu
til einkanota. Það þarf ekki gerræði til að
framfylgja höfundarrétti þegar dreifing er í
gróðaskyni, en þegar kemur að einstakling-
um til einstaklinga, þá blasir við að það ætti
hreinlega að vera löglegt. Allavega frekar en
að tortíma frjálsum samskiptum. Síðast en
ekki síst er það svolítið á ábyrgð okkar sem
búum til hugbúnað og tónlist að finna út úr
bisnessplani sem virkar í nútímanum. Það er
ekki ábyrgð þín sem neytanda og þú átt ekki
að borga launin mín með frelsi þínu.
Thorir Celin Styðjið þið fleiri virkjanir og
meiri stóriðju?
 Helgi Hrafn Gunnarsson Helst
ekki, þótt það geti „meikað sens“ í sumum
tilfellum … það er auðvitað ekki hægt að
segja af eða á alfarið við þeim – en við
aðhyllumst mun frekar smáiðju sem gerir
út á netið. Þannig fáum við gjaldeyrinn inn
í landið og getum byggt upp stöðugan
efnahag fyrir alla landsmenn. Einnig er netið
mjög vannýtt á landsbyggðinni og þar eru
mikil sóknartækifæri. Margir vita ekki að
yfirþyrmandi meirihluti starfa á Íslandi er í
örfyrirtækjum og smáfyrirtækjum.
Sema Serdar Ert þú hlynntur eða
andvígur inngöngu Íslands í
Evrópusambandið?
 Helgi Hrafn Gunnarsson Það er ekki
ákvörðun stjórnmálamanna að ganga
eða ganga ekki í Evrópusambandið heldur
ákvörðun þjóðarinnar í bindandi þjóðar-
atkvæðagreiðslu. – Við teljum að það beri
að mynda stefnu sem miðar að báðum
möguleikum. Ef þjóðin vill fara í ESB, þá
viljum við að Ísland verði eitt kjördæmi í
Evrópuþingskosningum. Ef þjóðin vill ekki
fara í ESB þarf að endurskoða EES-samn-
inginn, sérstaklega ef Noregur fer að sýna
tilburði til þess að annað hvort ganga í ESB
eða endurskoða EES. Persónulega verð ég
að segja að ég er algerlega á báðum áttum
og vil sjá hvað kemur úr þessum samninga-
viðræðum áður en ég mynda mér endanlega
skoðun. En lykilatriði er að það verði bindandi
þjóðaratkvæðagreiðsla, og að svar þjóðar-
innar gildi.
Hálfdán HelgaogÁgústuson Hver er
stefna Pírata í skattamálum?
 Helgi Hrafn Gunnarsson Í stuttu
máli eru skattar ill nauðsyn. Það er auðvitað
almennt betra að hafa þá lága (og vonandi
er það orðið óumdeilt núna) en að sama
skapi þarf að fjármagna ríkisreksturinn með
skattheimtu. Til lengri tíma ber að lækka
skatta, en ríkissjóður er ennþá að jafna
sig eftir hrunið svo það er ekki endilega
tímabært að lækka skatta mikið akkúrat
núna … það væri kannski nærri lagi að
einfalda skattkerfið til muna, sérstaklega
virðisaukaskattskerfið. Því einfaldara sem
þetta er, því betra.
Stefán Ólafsson Hversu sammála eða
ósammála ertu eftirfarandi fullyrðingu
„Stjórnkerfi þjóða eins og Íslands verður
ekki umbylt með því að koma nýju fólki í stóla,
t.d. á Alþingi. Þegar nýtt fólk er kosið til starfa,
líkt og gerðist með Jón Gnarr í Reykjavík, er
aðallega verið að kjósa ný viðhorf, viðleitni og
nálgun til verka frekar en nákvæmar úrlausnir á
einstökum atriðum sem stjórnsýslan þarf að eiga
við hverju sinni.“
 Helgi Hrafn Gunnarsson Því verður auðvit-
að ekki „umbylt“ án byltingar, samkvæmt
skilgreiningu. – Til þess þarf meira en nýtt
fólk, það er rétt. En það er hægt að kjósa inn
fólk sem vill breyta kerfinu þannig að það
sé auðveldara að breyta því til betri vegar,
og erfiðara að breyta því til verri vegar. Fólk
er hrifið af byltingum og skyndibreytingum
en það er sá galli á þeim að það er engin
leið að tryggja, án lýðræðis og tilheyrandi
umstangs, að nokkuð betra komi í stað
þess sem var umbylt. Kerfi þróast eftir
tilhneigingum sínum samkvæmt eðli sínu, og
við viljum breyta eðli kerfisins þannig að það
þróist í átt til batnaðar. Þaðan kemur viðhorf
okkar til gagnsæis sem er ekki nógu mikil
áhersla á. Þegar hlutirnir eru gagnsæir er
mun auðveldara fyrir almenning, fræðimenn,
lögfræðinga og allt heila klabbið að koma
auga á vankanta og laga þá. – En kerfinu
þarf að breyta innan frá til að heimila því að
breytast til betri vegar.
Ástasigrún Magnúsdóttir Þú talar um
sýndarvandamál velferðarkerfisins og
raunveruleg vandamál þess. Getur þú
nefnt dæmi um slíkt?
 Helgi Hrafn Gunnarsson Já, kannski klaufa-
lega orðað hjá mér, afsakaðu það, en ég var
að meina aðgreiningu á þeim sem virkilega
þurfa á hjálp að halda, svo sem fatlaðir, og
þá sem þurfa lausnir sem veita þeim tæki-
færi til að láta ljós sitt skína. Þunglyndis-
sjúklingur til dæmis þarf ekki að liggja á
kerfinu alla ævi ef hann fær viðunandi hjálp
til að sigrast á þunglyndinu. Sömu sögu er
ekki að segja um alla geðkvilla, en ég ítreka
núna að þetta er spurning sem stjórnmála-
menn eiga ekki að þykjast vita of mikið um.
En úrræðin eiga að mótast af því að gefa
fólki tækifæri til að gera það sem það vill. –
Úrræðin eiga ekki að miðast einvörðungu við
að skófla peningum í vandamálið heldur að
ráðast rétt á vandamálið.
Andri Harðarson Hvað yrði það fyrsta
sem Píratar mundu gera á þingi ef þið
náið manni inn?
 Helgi Hrafn Gunnarsson Ú, núna viltu
loforð án þess að ég viti fyrirfram hvað
nákvæmlega gerist á næstu mánuðum! –
Það lítur allavega út fyrir að það verði að
setja fram frumvarp um nýja stjórnarskrá.
Það er mjög mikið í nýju stjórnarskránni sem
við hefðum viljað sjá, svo sem eflingu ýmissa
borgararéttinda eins og tjáningarfrelsis, sem
eru hreinlega í molum á Íslandi þótt margir
virðist ekki átta sig á því.
Börkur Sigurðsson Hvernig er staðan á
Íslandi í dag í sambandi við upplýsinga-
tækni í skólum, sérðu fyrir þér einhverjar
breytingar þar?
 Helgi Hrafn Gunnarsson Já, heldur betur.
Internetið (enn og aftur) hefur gjörbreytt
því hvernig fólk almennt lærir og skólakerfið
er eitt af þeim kerfum sem þarf að uppfæra
með hliðsjón af því. Ég læri sjálfur kóranska
arabísku, landafræði, tel mig vita hvers
vegna heimurinn lítur út fyrir að vera minna
en 14 milljarða ára gamall, ég kann einhvern
örsmæðarreikning, en ekkert af þessu lærði
ég í skóla. Ekki neitt af því. Ég lærði ekki
forritun eða tónsmíð í skóla heldur. Það var
sú tíð að þetta þótti eitthvað sérstakt, að
vera sjálflærður, en tilfellið er að það er að
verða mjög normal. – Skólastarfið þarf að
uppfæra í samræmi við það. Menntun og
upplýsingadreifing hefur gjörbreyst. Þá er ég
alls ekki að segja að skólar séu óþarfir, heldur
bara að þeir þurfa að taka inn í myndina
breytt lærdómsmynstur ungs fólks og barna.
Ólafur Ólafsson Hvar standa Píratar
varðandi einkavæðingu á auðlindum
landsmanna á Íslandi? Þar standa 3 stór
mál mjög ofarlega; 1) Fiskurinn sem er eign allra
landsmanna, 2) framtíðarplön/hugmynd
landsvirkjunar um orkuútflutning með sæstreng
til Evrópu, 3) Framtíðarolíuævintýri Íslands, eign
landsmanna eða einkarekinna fyrirtækja?
 Helgi Hrafn Gunnarsson 1) Fiskurinn er
vissulega eign allra landsmanna eða öllu
heldur veiðiheimildir. Lögfræðingar hafa átt
erfitt með að skilja það hugtak, en sjálfum
sýnist mér það þýða ríkiseign og skil ekki
hvers vegna fólk er feimið við að kalla það
það. Síðan þarf að ráðstafa þeim réttindum
til einkaaðila til nýtingar, en veiðiheimildir í
grundvallaratriðum, sem og náttúruauðlindir
almennt, eiga að vera í eigu þjóðarinnar …
sem lögtæknilega þýðir í eigu ríkisins. Nýting
má svo vera í einkahöndum. 2) Ég hef ekki
kynnt mér hugmyndirnar nógu vel, en ég ótt-
ast að með sæstreng fari Ísland líka að flytja
inn rafmagn sem er þá búið til með kolum
og olíu. Það gengur gegn því að Ísland verði
grænasta land í heimi, sem væri sorglegt. En
ég ítreka að ég hef ekki kynnt mér áætlan-
irnar nógu vel til að svara þessu efnislega. 3)
Ég hef sömu áhyggjur og af lið 2, að við förum
að stóla á óendurnýjanlega orkuframleiðslu
þegar við höfum nú tækifæri til að vera
grænasta land í heimi. Metanbyltingin er að
eiga sér stað sem er dásamleg þróun og ég
óttast að hún snúist við. – Að því sögðu hef
ég ekki kynnt mér málið nógu vel né rætt það
við mér fróðari menn innan flokksins (það
eru eflaust 4–5 spekúlantar hjá okkur með
miklu skemmtilegri skoðanir).
Árni Árnason Sæll meistari. Hver er
stefna Pírata í dýraverndarmálum,
einkum verksmiðjubúskap með dýr? –
Finn það ekki í stefnuskránni.
 Helgi Hrafn Gunnarsson Það er frekar
nýlega komið til umræðu hjá okkur og því
get ég ekki sagt þér frá fullmótaðri stefnu í
dýraverndunarmálum, en þau samtöl sem
ég hef tekið þátt í hingað til lýsa áhyggjum
af verksmiðjubúskap, sem margir telja ekki
vera til staðar á Íslandi. Flestir virðast líta svo
á að verksmiðjubúskapur sé bara vandamál
erlendis, en hér erum við sífellt að heyra
hærri raddir um að hérlendis finnist mikil
misnotkun á dýrum. Stefnan er hins vegar
ennþá í mótun. Að því sögðu, þá eru dýra-
verndunarlög á Íslandi, og ef þau eru ekki
nógu sterk, eða þeim ekki framfylgt nógu vel,
þá er sjálfsagt að taka á því. Viltu ekki bara
mæta á málefnafund hjá okkur og segja okk-
ur hvernig þetta eigi að vera? ) – Við hikum
ekki í eina sekúndu við að afrita hugmyndir
annarra ef okkur finnst þær góðar.
„Ekki hrædd við lýðræðið“
Nafn: Helgi Hrafn Gunnarsson
Aldur: 32 ára
Menntun: Google
Starf: Forritari