Pilsaþytur: málgagn Kvennalistans í Vestfjarðakjördæmi - 01.04.1987, Blaðsíða 2

2
PILSAÞYTUR
Forystugrein
Fyrir rúmum 15 árum var til hreyfing, sem hét Rauðsokkur. Þetta var
kvennahreyfing, sem barðist fyrir frelsi kvenna, gegn kúgun karla, kröftug
hreyfing, sem hafði umtalsverð áhrif á samtíð sína. Rauðsokkur hreyfðu
við ýmsum málefnum kvenna, sem áður hafði verið lítill eða enginn
gaumur gefinn. En mörgum þóttu þær öfgakenndar og allt of baráttu-
glaðar. Kannski einmitt þess vegna náðu þær aldrei til nema takmarkaðs
hóps kvenna. Rauðsokkur störfuðu í nokkur ár, en síðan lögðust samtök
þeirra alveg niður.
í kjölfar þess varð mikil lægð í allri baráttu kvenna fyrir bættum og
breyttum kjörum sínum. í þessi ár voru konur svo til óvirkt afl í íslensku
stjórnmálalífi. En að því kom, að konur risu upp aftur, en með aðra
hugmyndafræði á bak við sig. Nú vildu konur hafa áhrif á íslenskt sam-
félag, þar sem ákvarðanir eru teknar, sem snerta líf okkar allra. Var því
ákveðið að bjóða fram sérstakan lista í bæjar- og borgarstjórnarkosning-
um. Framhaldið þekkjum við öll. Fyrir fjórum árum var síðan boðinn
fram sérstakur kvennalisti til Alþingis í þremur kjördæmum, Reykjavík,
Reykjanesi og Norðurlandi eystra. Og nú býður Kvennalistinn fram í
öllum kjördæmum.
Konur hafa gert sér grein fyrir, að til þess að þær geti haft áhrif verða
þær sjálfar að berjast fyrir málefnum sínum. Þær leggja til grundvallar
sínar eigin hugmyndir, sem markast af lífi þeirra sjálfra.
Enginn stjórnmálaflokkur hefur hugmyndafræði kvenna að leiðarljósi í
leit að fegurra og betra mannlífi. Þess vegna hafa konur stofnað sín eigin
samtök, þar sem aðaláherslan er lögð á, að lífssýn og reynsla þeirra sjálfra
sitji í fyrirrúmi.
Það er ríkt í okkur konum að vilja vernda og hlúa að öllu lífi. Við viljum
horfa til framtíðarinnar með þá von í brjósti, að börn okkar geti lifað
hamingjusöm í betri heimi.
Nýtt stjómmálaafl eins og Kvennalistinn verður ekki til út af engu.
Hann varð til vegna þess að þörf var á breytingum. Sérstakur kvennalisti
er eina lausnin, sem við sjáum núna. Það er kominn tími til að viðhorf og
reynsla kvenna fái meiru ráðið um líf okkar allra.
Nú spyrja sjálfsagt margir: „Hvers vegna styðjið þið þá ekki frekar við
bakið á konum, sem starfa innan hinna stjórnmálaflokkanna?“ Svarið er
einfalt. Þær konur eru bundnar stjórnmálaafli, sem hefur annan grunn að
hugmyndafræði sinni en lífssýn og reynslu kvenna.
Uppbygging og starfshættir Kvennalistans miða að því, að hver kona
hafi hlutverki að gegna og geti haft áhrif á stefnu og markmið Kvenna-
listans.
Við konur viljum starfa eftir eigin leikreglum, sem eru sniðnar að okkar
þörfum.
Við viljum fara mjúkum höndum um okkar harða samfélag.
Við viljum gera menningu kvenna að stefnumótandi afli í samfélaginu
ekki síður en reynslu, menningu og viðhorf karla. áslaug
Feikifríður segir
— hér kem ég.
Útgefandi:
Kvennalistinn í
Vestfjarðakjördœmi
Ritnefnd:
Áslaug Jóhannsdóttir
Helga Konráðsdóttir
Ragna Finnsdóttir
Sigríður Ragnarsdóttir
Svava O. Ásgeirsdóttir
Ljósmyndir:
Bára Snæfeld og fleiri
Útlit:
Friðgerður
Þorsteinsdóttir
Ábyrgð:
Áslaug Jóhannsdóttir
Auglýsingar:
Hrönn Benónýsdóttir
Lilja G. Steinsdóttir
Prentun:
Prentstofan ísrún h.f.