Feykir - 27.03.2014, Blaðsíða 20

20 Feykir 12/2014
Ég heiti Guðrún Hanna
Halldórsdóttir og er búsett
á Helgustöðum í Austur
–Fljótum sem er „heimsins
besti staður“ eins og mágur
minn Símon Jónsson setti
fram í vísu.

Rúnakosti rita vé,
rakur lífsins vaður.
Helgustaðir held ég sé,
heimsins besti staður.
Nú er svo komið að ég get
farið að segja með sanni „í
gamla daga“. En þegar litið
er til baka finnst mér ekkert
svo langt síðan þegar ég 18
ára steig mitt gæfuspor og
flutti í Helgustaði þar sem
eiginmaður minn Þorsteinn
Jónsson er borinn og
barnfæddur. Þar höfum við
alið upp okkar sex elskulegu
börn meðfram búskapnum.
Þegar horft er fram á veg finnst
manni að hver tíu ár séu langt
burtu í fjarlægðinni og langur
tími til stefnu, en þegar litið er
til baka þá er sem tíu árin hafi
liðið með ofurhraða og maður
undrast, hvað... er þetta orðið
svona langt síðan?
Það er svo skrítið hvað tíminn
hefur flogið áfram og mér sem
finnst ég vera á besta aldri,
er orðin margföld amma fyrir
löngu og líka orðin langamma.
En það eru nú alveg sérstök
forréttindi og einstök gæfa að
fá að upplifa það að eiga sex
börn og tengdabörn, ellefu
ömmubörn og tvö langömmu-
börn að ógleymdum öllum
Sólgarðabörnunum mínum.
Ég veit ekkert yndislegra en
að fá fá að dekra við litlu krílin
og fá litlar hendur um háls
og risaknús frá þeim. Svo er
stundum hvíslað „amma áttu
ís“ og amma á að sjálfsögðu
ís í kistunni til að stinga að
litlum og stórum krökkum. Það
er líka yndislegt að vita að þau
sækja öll í að koma og vera
hjá okkur á Helgustöðum. „Þið
eigið alltaf að eiga heima í
sveitinni er oft sagt, það er svo
gaman að fara í fjárhúsin og
taka rúllu með afa.“
Það er alltaf gaman og gott
að fá stórfjölskylduna heim
um hátíðar og nú styttist í
páskana. Þá þarf amma að
vera búin að fá páskahérann
til þess að fela páskaeggin úti
í garði svo að árleg eggjaleit
geti farið fram. Það eru þessi
litlu málsháttar-egg sem leitað
er að og sett í körfu og svo fá
allir sem koma páskaegg með
málshætti, það er svo gaman
að málshættinum.
Ég ætla að láta fylgja hér smá
sögu. Þetta var þegar ekki var
auðvelt að ná í páskaegg og
ég var að gera heimatilbúin
súkkulaðipáskaegg. Ég
notaði uppblásnar blöðrur
og bráðið súkkulaði sem ég
hellti yfir blöðrurnar og ég
var að mér fannst orðin mjög
leikin í þessu. Svo var það
einn skírdag, ég var með
súkkulaðipottinn á eldavélinni,
blöðrurnar tilbúnar, ég mjög
örugg með mig búin að þekja
stóra blöðru með súkkulaði
þegar allt í einu bommm...
blaðran sprakk og ég fékk
súkkulaði sprengju yfir mig
og upp um allt eldhúsið.
Súkkulaðið var aðeins of heitt.
Eftir hreingerningu var aftur
hafist handa og nú átti að
passa hitastigið á súkkulaðinu
en bommm... allt fór aftur á
sömu leið.. En að lokum tókst
að búa til eggin og allir fengu
sitt páskaegg á páskadag og
undu glaðir við sitt þó ekki
væri Síríus merki á þeim.
En síðan eru liðin mörg ár.
Gleðilega páska.
- - - - -
Guðrún Hanna skorar á
dóttur sína, Elvu Hrönn
Þorsteinsdóttur, að taka
við pennanum.
Guðrún Hanna Halldórsdóttir á Helgustöðum í Fljótum skrifar
Tíminn er afstæður
ÁSKORENDAPENNINN
UMSJÓN kristin@feykir.is
Verð sátt við það sem ég fæ
Berglind Vala Valdimarsdóttir frá Sól-
heimum í Sæmundarhlíð í Skagafirði
verður fermd af sr. Gísla Gunnarssyni í
Glaumbæjarkirkju þann 25. maí. Foreldrar
hennar eru Guðrún Kristín Eiríksdóttir og
Valdimar Óskar Sigmarsson.
Hvers vegna valdir þú að fermast? Ég vil fermast til
að staðfesta skírn mína og trú mína á Guði.
Hefur þú velt trúmálum mikið fyrir þér? Nei, ekki neitt
sérstaklega mikið nema þá kristni í fermingarfræðslu.
Hvernig hefur fermingarundirbúningnum verið
háttað? Það fyrsta sem var gert var að finna
dagsetningu og sal. Síðan fórum við mæðgur til
Reykjavíkur í fermingarfataverslunarleiðangur. Svo
er líka búið að kaupa smá skraut og setja saman
gestalistann.
Hvar verður veislan haldin? Hún verður haldin á Löngumýri.
Er búið að ákveða hvað verður á matseðlinum? Svona næstum því . Er búin að ákveða hvað
verður í matinn en ekki meðlætið.
Er búið að finna fermingarfötin? Já, ég keypti fermingarkjólinn í Mótor og Mía og keypti
skóna í Next.
Hver er óska fermingargjöfin? Ætli það sé ekki fartölva en verð sátt við það sem ég fæ.
FERMINGIN MÍN / Berglind Vala Valdimarsdóttir
Ætlar ekki að vera
í jakkafötum
Kristófer Dagur Sigurjónsson frá Sauð-
árkróki verður fermdur af sr. Sigríði
Gunnarsdóttur í Sauðárkrókskirkju á
hvítasunnudag, þann 8. júní. Foreldrar
Kristófers eru þau Steinunn Svava
Fjólmundsdóttir og Sigurjón Karlsson.
Hvers vegna valdir þú að fermast? Ég er að
fermast af því ég ætla staðfesta skírnina mína,
hitta ættingja og góða vini.
Hefur þú velt trúmálum mikið fyrir þér? Nei,
ekki mikið.
Hvernig hefur fermingarundirbúningnum verið
háttað? Ég hef verið í fermingarfræðslu og mætt
í messur.
Hvar verður veislan haldin? Í Ljósheimum.
Er búið að ákveða hvað verður á matseðlinum? Það verður kaffiveisla.
Er búið að finna fermingarfötin? Nei, en ekki jakkaföt frekar annar flottur klæðnaður, haha.
Hver er óska fermingargjöfin? Fartölva eða rúm.
FERMINGIN MÍN / Kristófer Dagur Sigurjónsson
Guðrún Hanna (til vinstri) ásamt Þuríði Helgu dóttur sinni.