Feykir - 14.04.2011, Qupperneq 9

15/2011 Feykir 9
( TÖLVUPÓSTURINN )
Sameining leik- og grunnskóla er stórt mál en nú hefur
Húnavatnshreppur ákveðið að ráðast í sameiningu þessara stofnana
og hefur nú þegar verið auglýst eftir skólastjóra sameinaðrar
skólastofnunnar. Jens P Jensen sveitarstjóri svaraði fyrir hönd
hreppsins, þegar Feykir spurði frétta.
Lífið gengur sinn
vanagang í sveitinni
Sæll, hvað er nú helst að frétta úr
Húnavatnshreppi?
„Héðan er allt sæmilegt að frétta.
Lífið gengur sinn vanagang í
sveitinni þrátt fyrir Icesave og allt
stjórnmálavafstrið í þjóðfélaginu.
Við erum þó orðin langþreytt á
slæmu ástandi vega í sveitinni og
finnst undarlegt að ekki skuli vera
unnt að gera þá nokkurnveginn
ökufæra og leggja á þá bundið
slitlag, ef til eru peningar í 2ja til
3ja milljarða kr. framkvæmd við
hraðbraut um sveitarfélagið.“
En af þér sjálfum?
„Jú allt gott þakka þér fyrir. Ég kem
bara tiltölulega sprækur undan
vetri, enda notfært mér ótæpilega
þá frábæru líkamsræktaraðstöðu
sem nágrannar okkar á Blönduósi
hafa komið upp.
Þrátt fyrir allan bölmóð í
samfélaginu eftir efnahagslegt
hrun þess þá verðum við að líta
björtum augum til framtíðarinnar,
enda höfum við alla möguleika á
því að eflast og dafna, ef okkur
auðnast að standa saman um þá
framþróun sem þarf að eiga sér
stað í þjóðfélaginu.“
Nú eruð þið að sameina grunn-
og leikskólann hjá ykkur hvað
kom til?
„Í lögum um leik- og grunnskóla
frá 2008, er sveitarfélögum
heimilað að reka saman leik-
grunn- og tónlistarskóla undir
stjórn eins skólastjóra. Með
þessu er m.a.verið að koma til
móts við sveitarfélög, sér í lagi
fámenn sveitarfélög, þar sem
hagræðingarmöguleikar felast í
því að hafa einn stjórnanda yfir
skólunum.
Frá því að lögin tóku gildi
hafa mörg sveitarfélög séð sér
hag í því að taka upp samrekstur
skólastofnana, flest á leik- og
grunnskólasviði. Hreppsnefnd
Húnavatnshrepps hefur samþykkt
að leik- og grunnskólinn á
Húnavöllum verði sameinaðir í
eina stofnun, með eina yfirstjórn
frá og með 1. ágúst 2011.
Í skólunum er verið að vinna
gott og metnaðarfullt starf, hins
vegar stöndum við frammi fyrir þeirri
staðreynd að á umliðnum árum
hefur nemendum fækkað verulega,
við erum því í varnarbaráttu og
teljum að sameining muni styrkja
faglegt starf á báðum skólastigum
til hagsbóta fyrir nemendur og
starfsfólk. Jafnframt teljum við
að sameining skapi möguleika á
hagkvæmari rekstri.
Varðandi tónlistarnámið
má geta þess að árið 2008
stofn-uðu sveitarfélögin í Austur-
Húnavatnssýslu Byggðasamlag
um rekstur tónslistarskóla A-Hún.
Tónlistarskólinn hefur starfsstöðvar
á Skagaströnd, Blönduósi og
Húnavöllum og fer Húnavatns-
hreppur með daglegan rekstur
byggðasamlagsins. Að mínu áliti
hefur þetta form reynst vel og eru
nemendur nú um 130.“
Er almenn sátt um þá aðgerð?
„Á kynningarfundum um sameiningu
skólastofnana á Húnavöllum, bæði
með starfsfólki og einnig íbúum í
Húnavatnshreppi, hefur mér virst
vera mikil sátt um málið. Þær
athugasemdir sem þó hafa komið
fram varða þá helst undirbúning
sameiningar og kynningarferlið
sjálft.“
Kemur þetta til með að breyta
einhverju í daglegu skólahaldi?
„Nú verður það auðvitað hlutverk
skólastjórnanda, ásamt starfsfólki,
að leiða áfram faglegt starf í
sameinaðri stofnun. Einnig þarf
að móta almenna stefnu um leik-
og grunnskólahald í Húnavatns-
hreppi.“
Hvað ber annað hæst í sveitar-
stjórnarmálum eru einhverjar
framkvæmdir fyrirhugaðar í
sumar?
„Í fjárhagsáætlun Húnavatnshrepps
árið 2011 er gert ráð fyrir mikilli
tekjuskerðingu frá fyrra ári. Munar
þar mest um lækkun á framlögum
frá jöfnunarsjóði. Lækka þarf
verulega rekstrarkostnað á árinu
2011, hækka gjaldskrár og draga
úr framkvæmdum. Um leið er
mikilvægt að verja störfin eins og
kostur er, þó verður ekki undan því
vikist að lækka þarf launakostnað ef
nauðsynlegur sparnaður á að nást.
Gert er ráð fyrir að framkvæmdir
verði í lágmarki á árinu.“
Eitthvað að lokum?
„Ég óska fréttablaðinu Feyki til
hamingju með 30 ára afmælið.
Það er ómetanlegt að hafa öflugt
héraðsfréttablað sem flytur okkur
fréttir af svæðinu.“
Ræktaðu garðinn þinn í sumar
Jafnvel svalirnar
duga til
matjurtaræktunar
Í dýrtíðinni undanfarin ár
hefur matjurtarækt notið
aukinna vinsælda enda
grænmæti hollt og gott
en því miður oft á tíðum í
dýrara lagi. Leigureitir hafa
notið vinsælda og fólk sem
aldrei hefur talið sig hafa
græna fingur hefur rokið
af stað í ræktun. Feykir
kannaði málið og komst á
snoðir um að í raun duga
svalirnar eða pallurinn til
matjurtaræktunar. Það eina
sem stoppar er okkar eigið
framtaksleysi.
Á heimasíðunni verond.is má
t.d. sjá Gróðurpíramída sem
smíðaðir eru í þremur, fimm
og sjö hæðum. Henta þeir
einkar vel fyrir þá sem hafa
lítið pláss og eins fyrir eldra
fólk sem ekki treystir sér til að
borga niður við jörð.
Þarna er plássið sem vera
þarf til staðar ekki nema einn
fermetri en eins og sjá má á
myndinni er hægt að rækta
margar tegundir á einum
fermetra og ætti salatið að duga
fjölskyldunni allt sumarið.
Fyrir þá sem ekki vilja fara út
í stórar fjárfestingar getur verið
sniðugt að smíða kassa upp
frá pallettum og rækta á þeim,
en þá er hægt að setja kassann
hærra frá jörðu og á þann hátt
sleppa við að bogra yfir þeim,
auk þess sem grænmetið
ræktast mun hraðar og betur
en í jörðinni þar sem jarðkuldi
hægir á vexti plöntunnar.
Þeir sem eiga mandarínu-
kassa frá jólunum geta klætt
þá að innan með jarðvegsdúk
og ræktað eina tegund af salati
í hverjum kassa. Passar flott í
gluggann til þess að byrja með
og má síðan flytja út þegar
hlýnar í veðri. Séu kassarnir
málaðir í þeim lit sem passar
eru þeir hin mesta prýði.
Þá má sjá á veraldarvefnum
grænmeti ræktað í skúffum og
kommóðum sem hætt var að
þjóna síunum tilgangi. Smart
og óvenjuleg lausn.
Í blómabúðum má fá
mikið úrval matjurtafræja
og í raun tilvalið að fara að
sá fyrir grænmeti sumarsins.
Grænmetið má síðan setja út í
beð þar sem þau eru til staðar
eða í píramída, potta, kassa
eða ker eftir því sem pláss eða
hugmyndaflug leyfir. Passa
þarf að láta grænmetið vaxa í
köldum gluggum og ekki beint
ofan við ofn svo það vaxi ekki
of hratt og spretti í raun úr sér
áður en hægt er að dreifiplanta
því. Grænmetinu er síðan
dreifiplantað þegar á það eru
komin fjögur blöð.
Þá er hægt að forrækta
gulrætur inni í mjólkurfernum
skera síðan utan af þeim og
koma fyrir úti í beði eftir að
frost hefur farið úr jörðu.
Gulrótum má líka sá inn á milli
í blómaker.
Þá minnum við á að útsæði
er komið í búðirnar og í raun
tilvalið að fara að fjárfesta í
útsæði og koma því í spírun
svo hægt verði að setja niður
um leið og frost fer úr jörðu.
Kartöflurnar er tilfalið að láta
spíra í geymslunni, dreifa vel
úr þeim og passa að hafa ekki
of heitt á þeim.
Feykir óskar ykkur gleðilegs
ræktunarsumars.