Feykir - 28.07.2011, Blaðsíða 9

28/2011 Feykir 9
Árleg ferð söngfugla á Eyvindarstaðaheiði
Árlega fer hópur fólks sem hefur
gaman af því að ferðast til fjalla
upp á Eyvindarstaðarheiði, gista í
Ströngukvíslarskála, syngja, borða,
syngja, spjalla og syngja og ... syngja
meira. Farið er upp um hádegi á
laugardegi og komið niður sólarhring
síðar með lungun full af fjallalofti
og sönginn ómandi í höfðinu.
Hópurinn er kallaður Lífsblómið og
að sjálfsögðu er það vökvað í leiðinni
enda ekki gott ef lífsblómið skrælnar.
Lífsblómið hefur verið til í 24 ár og voru
stofnendur þess, Guðmann Tóbíasson
og Massí kona hans, Hafsteinn og Soffía
í Vallholti, Kristján Jósepsson og Anna
Kristjáns og tvíburarnir Kolli og Leifur
Konráðssynir ásamt konum sínum
Lindu og Önnu Maríu.
Það hefur verið ákveðinn kjarni
sem heldur hópnum saman en ýmsir
góðir söngfjallamenn fá leyfi til þess
að bætast í hópinn og þannig var
það laugardaginn 16. júlí s.l. en þá fór
tuttugu manna hópur í ferðina. Flestir
fengu far með kálfinum hjá Einari Val
enda algjör óþarfi að flytja Lífsblómið á
mörgum bílum.
Komið var við í Galtarárskála
þar sem Gísli Árna og Gurra Ingólfs
eru skálaverðir en þau sjá einnig um
skálana við Ströngukvísl og Buga. Þar
fá menn sér kaffi og meðlæti, syngja
og tralla áður en haldið er lengra, en
reynt er að komast á áfangastað fyrir
klukkan fjögur en þá hefst lestur og
söngur upp úr Skólaljóðunum undir
styrkri stjórn Guðmanns sem hefur haft
það hlutverk frá upphafi. Er þeim kafla
lýkur segja þeir Hafsteinn og Leifur að
tekið sé til við að syngja meira og oft
hafi harmonikkuleikarar verið með í för
og áður fyrr var einn slíkur skálavörður
starfandi á Eyvindarstaðarheiði sem
spilaði mikið en er nú fallinn frá. Það
var hann Sigfús Guðmundsson. Í þetta
sinnið hljómaði harmonikkan ekki,
heldur annað hljóðfæri þar sem Arnar
Halldórsson var vopnaður gítar og lék
undir. Hljómaði söngurinn óvenju
mikið og lengi að þessu sinni án þess
að nokkrar skýringar séu til hvers
vegna og fengu fuglar heiðanna að
vakna við mannasöng undir morgun.
Stemningunni er kannski best lýst með
kveðskap Þorleifs Konráðssonar í tilefni
20 ára afmælis Lífsblómsins.
Sumarkvöld í sólaryl
syngjum einum rómi
í heiðarsalnum háa til
heiðurs voru blómi.
Til að kveikja söng í sál
sæmir vinum öllum
að lyfta saman landaskál
Lífsblómsins á fjöllum.
Óður blómsins berast má
blítt í himintómið.
Það mun enginn þreytast á
því að vökva blómið.
Skálarnir á Eyvindarstaðarheiði
eru vinsælir til hinna ýmsu athafna
en hægt er að fá þá leigða í heilu lagi
undir veislur og mannfagnaði sem og
til næturgistingar fyrir einstaklinga
og er það mikil upplifun fyrir þá sem
heiðarnar gista.
Til upplýsinga fyrir fólk skal það upplýst að sími
skálavarða er 8954408 og formanns upprekstrarfélags
Eyvindarstaðarheiðar sem er rekstraraðili skálanna
8988156.
Lífsblómið vökvað
MYNDIR HJALTI ÁRNA