Feykir - 19.07.2012, Blaðsíða 8

8 Feykir 28/2012
Heimilisiðnaðarsafnið
á Blönduósi ætlar að
bjóða upp á óhefðbundna
tískusýningu á Húna-
vöku en þar munu
sýningastúlkur sýna
glæsilegt samansafn af
þjóðbúningum. Mun
þetta vera annað árið sem
haldin er tískusýning á
Heimilisiðnarsafninu á
Húnavöku en þar sem afar
vel til tókst í fyrra verður
þráðurinn tekinn upp að
nýju í ár.
Elín S. Sigurðardóttir forstöðu-
kona Heimilisiðnaðarsafnsins
segir hugmyndina að því að
halda tískusýningu fyrst hafa
kviknað þegar verið var að setja
upp Sumarsýningu safnsins í
fyrra sem var yfirlitssýning á
verkum veflistarkonunnar
Guðrúnar Vigfúsdóttur sem
bar heitið „Úr smiðju vefarans
mikla“. „Ég komst að því að í
fórum aðstandenda Guðrúnar
var til mikið af allskyns fatnaði
og fengum við Eyrún Gísla-
dóttir, dóttir listakonunnar, þá
hugdettu að bjóða uppá tísku-
sýningu á Húnavöku. Í stuttu
máli verður að segjast að
sýningin sló í gegn, stúlkurnar
og konurnar sem sýndu stóðu
sig með stakri prýði, eins og
þær hefðu aldrei gert annað en
að sýna föt,“ segir Elín og
brosir.
Hugmyndin að halda tísku-
sýningu þjóðbúningana segir
Elín hafa nokkuð lengi verið að
þróast í kollinum á henni en
ekki orðið af framkvæmdum.
Menningarráð Norðurlands
vestra veitti nú svolítinn styrk
til verkefnisins og þá hafði Elín
samband við Heimilisiðnaðar-
félag Íslands en tískusýningin
er unnin í samstarfi við félagið.
„Það var líka auðsótt mál að
leita til þessara ágætu kvenna
hjá Heimilisiðnaðarfélagi Ís-
lands sem munu koma með
nokkra búninga og aðstoða
okkur,“ segir hún. Oddný
Kristjánsdóttir, klæðskeri og
kennari í þjóðbúningasaum
hjá Heimilisiðnaðarfélagi
Íslands, kynnir búningana og
stjórnar sýningunni.
„Á tískusýningunni munu
konur uppáklæddar í faldbún-
ing með krókfaldi og spaða-
faldi, í 19. og 20. aldar peysu-
fötum og upphlutum, í
skautbúningi og kyrtli spranga
um safnið. Þá munu telpur og
drengir sýna 19. og 20. aldar
búninga og 19. aldar karl-
búningur verður líka sýndur,“
útskýrir Elín og hvetur fólk
sem á búning í hvaða mynd
sem er, að klæða sig upp í tilefni
dagsins. „Ég held að þetta geti
verið mjög skemmtilegt en
Heimilisiðnaðarsafnið á marga
afar fallega búninga sem eru til
sýnis en þeir eru flestir frá
upphafi 19. aldar og er því
gaman að sjá búninga sem
konur eru að nota í dag. Margar
þeirra hafa lagt mikla vinnu í
gerð þeirra og þá sérstaklega í
saum á faldbúningum sem eru
mjög skrautlegir með sérlega
fallegu bróderíi,“ segir Elín.
Sýningin mun fara fram á
síðasta degi Húnavöku, sunnu-
daginn 22. júlí og hefst kl.
15.00. „Að sjálfsögðu verðum
við með heitt á könnunni og
kleinur til að narta í og verður
þetta allt innifalið í aðgangs-
eyri,“ bætir hún við.
Gimbað, knipplað
og orkerað
Yfir sumarmánuðina er jafnan
mikið um að vera á Heimilis-
iðnaðarsafninu og margt
skemmtilegt að skoða og sjá
þar innanhúss. Á Húnavöku og
Íslenska safnadeginum hefur
safnið ævinlega verið með
sérstaka dagskrá þar sem
konur hafa sýnt ýmiss konar
vinnubrögð við meðferð ullar
og búið til þráð en það er
einmitt þráðurinn sem er
upphaf og endir allrar klæða-
gerðar. Konurnar hafa sýnt
hvernig tekið var ofan af,
kembt, spunnið og prjónað en
líka slegið í vef. Þá hefur verið
hægt að sjá hvernig marg-
víslegur útsaumur er gerður,
hvernig er heklað og gimbað,
einnig stundum knipplað og
orkerað. Gestum hefur þá
gefist kostur á að spreyta sig á
viðkomandi vinnubrögðum og
að sögn Elínar hefur oft verið
skemmtileg og góð þátttaka.
„Við höfðum þessa dagskrá á
Íslenska safnadeginum 8. júlí
sl. en sleppum henni núna í
fyrsta sinn á Húnavöku og
einbeitum okkur að bjóða upp
á þessa glæsilega þjóðbúninga-
sýningu,“ segir Elín.
Þá var Sumarsýning safns-
ins „Bútar úr fortíð“ opnuð um
Hvítasunnuhelgina sem Elín er
afar ánægð með og segir mjög
skemmtilega. „Það er hún Íris
Ólöf Sigurjónsdóttir, textílfor-
vörður og textíllistakona með
meiru sem gefur okkur dálitla
innsýn í sinn hugarheim,“ segir
Elín. Sýningin er opin á
opnunartíma safnsins sem er
alla daga frá kl. 10 til 17 út
ágústmánuð. „Endilega kíkið
inn - safngestir segja gjarnan
við okkur að þetta safn sé fyrir
alla aldurshópa og ég minni á
að ekki er tekin aðgangseyrir
fyrir 16 ára og yngri,“ segir Elín
að endingu. /BÞ
Þjóðleg tískusýning
á Húnavöku
Heimilisiðnaðarsafnið á Blönduósi
Unnið hörðum höndum við að undirbúa þátt Heimilisiðnaðarsafnsins í sameiginlegum gjörning
sem fer fram í Hrútey á Húnavöku.
Að neðan: Hér má sjá hluta af þeirri fjölskrúðugu flóru þjóðbúninga sem Heimilisiðnaðarfélag
Íslands býr yfir. Ljósmynd: Heimir Hoffritz.