Feykir - 11.04.2013, Page 10

10 Feykir 14/2013
Hvað ertu með á prjónunum?
María Guðmundsdóttir frá Kringlumýri í Skagafirði
Heilluð af möguleikunum
sem þæfingin býður upp á
UMSJÓN
berglindth@feykir.is
María Guðmundsdóttir svarar spurningunni um hvað hún er með á prjónunum þessa
dagana en hún skorar á Önnu Pálu Þorsteindóttur á Sauðárkróki að taka við keflinu.
- Ég er að þæfa sjöl, og var að klára að prjóna ungbarnasett á væntanlegt barnabarn, og bútasaumsteppi
handa því næstelsta. Það er þannig með handverk og handavinnu að einu verki er varla lokið fyrr en það
er vöknuð hugmynd að því næsta, sem er svo skemmtilegt.
Hvaða handverk sem þú
hefur gert ertu ánægðust
með?
- Sennilega veggteppi sem ég
gerði fyrir vinkonu mína,
þæft út íslenskri ull.
Hve lengi hefur þú
stundað hannyrðir?
- Fyrstu minningarnar eru
tengdar ömmu minni sem
var alltaf með eitthvað í
höndunum en hún prjónaði,
heklaði, saumaði út og
saumaði á okkur. Hún
eignaðist nýja saumavél
þegar hennar börn voru öll
komin að heiman og mér
fannst svo gaman að fylgjast
með henni þegar hún dró
upp myndir úr litabókum og
teiknaði og klippti út úr
allskonar efnum. Svo voru
myndirnar komnar á náttföt,
dúka og allt mögulegt - mér
fannst þetta galdri líkast. Ég
lærði að prjóna og sauma út
hjá henni en saumavélin var
nánast heilög og ekki fyrir
börn.
Ég var svo heppin að
kynnast frábæri handverks-
konu henni Önnu Kristins.
sem kenndi mér fyrstu
handtökin við þæfingu og
þar með var ekki aftur snúið,
síðan hef ég sótt nokkur
námskeið og er alveg heilluð
af þeim möguleikum sem
þæfingin býður upp á.
Eitthvað sem þú vilt bæta
við ?
- Mér finnst gaman að sjá
hvað það er mikil gróska í
handverki og hönnun -
fjölbreytni og frumleiki.
Áhugi á handverki hefur
vaxið mikið, sem er
hvetjandi fyrir alla sem það
stunda. Vonandi halda
konur áfram að prjóna og
hekla dúka og milliverk og
finna spennuna þegar byrjað
er á einhverju nýju og
gleðina þegar góðu verki er
lokið.
Ungbarnasett á væntanlegt barnabarn.
Ull þæfð utan um lampa.
Sjöl þar sem Merino ull er þæfð á silkisiffon.