Feykir - 10.06.2020, Blaðsíða 5

Tindastóll
Rafíþróttadeild formlega stofnuð
Þann 4. júní var haldinn stofnfundur
rafíþróttadeildar Tindastóls en öflug starfsemi
hefur verið í gangi í vetur. Það er Ingi Sigþór
Gunnarsson sem er formaður, Hjörtur Ragnar
Atlason, varaformaður og Gunnar Ásgrímsson,
gjaldkeri.
Ingi Sigþór og Hjörtur Ragnar sögðu í viðtali
við Feyki í vetur að þeim hafi fundist það góð
hugmynd að byrja að keppa undir nafni félagsins
sem fyrst og hvetja krakka sem og foreldra til að
fylgjast með og sjá hversu skemmtilegt þetta væri.
„Þetta er ekki bara leikur. Eftir að hafa séð að
íþróttafélög á höfuðborgarsvæðinu væru að
stofna rafíþróttadeildir, þá töldum við félagarnir,
sem sitja nú í stjórn deildarinnar, að Tindastóll
yrði að vera með í þessari skemmtilegu
uppbyggingu sem á sér stað akkúrat núna.“
Nú er fyrsta tímabili Tindastóls lokið en fjögur lið
hófu keppni, tvö í CS:GO og 2 í LoL.
Á Facebook-síðu deildarinnar kemur fram að
A-lið Tindastóls í LoL endaði í þriðja sæti í
Vodafone deildinni og fór svo alla leið í úrslitin á
stórmeistaramóti Vodafone deildarinnar og
tapaði þar fyrir Dusty Academy 3-1. Annað sæti
því niðurstaðan. B-lið Tindastóls í LoL endaði í
þriðja og síðasta sæti í fyrstu deild Vodafone
deildarinnar.
CS:GO:
A-lið Tindastóls í CS:GO hafnaði í fjórða sæti í
fyrstu deild Vodafone deildarinnar. A-liðið
byrjaði svo í opna mótinu í Vodafone Major
mótinu þar sem þeir unnu alla sína leiki og héldu
áfram í áskorendamótið þar sem þeir komu
heldur betur á óvart og unnu báða leikina sína og
komust því inn í stórmeistaramótið. Þeir spiluðu
þar í 8-liða úrslitum við KR.esports og stóðu sig
með prýði þrátt fyrir 0-2 tap.
B-lið Tindastóls í CS:GO hafnaði í fjórða sæti
í annarri deild Vodafone deildarinnar, B-liðið
byrjaði einnig í opna mótinu og vann fyrsta
leikinn sinn á móti Sóttkví en tapaði svo á móti
Dusty Academy.
„Tindastóll er einnig með Rocket League lið sem
er virkilega gott og verða þeir að keppa á
einhverjum mótum í sumar.
Frumraun okkar í þessari senu gekk miklu
betur en við áttum von á og förum við sáttir inn í
sumarið. Næstu verkefni hjá okkur eru að koma
rafíþróttastarfinu í gang og fer sumarið og haustið
í það,“ segir á Facebook-síðu rafíþróttadeildar
Tindastóls. /PF
Stjórn rafíþróttadeildar Tindastóls Gunnar Ásgrímsson,
gjaldkeri, Ingi Sigþór Gunnarsson, formaður og Hjörtur Ragnar
Atlason, varaformaður. Aðsend mynd.
ÍÞRÓTTAFRÉTTIR F
Mjólkurbikar karla
Stólarnir sterkari í grannaslagnum
Lið Tindastóls og Kormáks/Hvatar mættust á
Sauðárkróki sl. sunnudag og var spilað við
ágætar aðstæður. Þetta var fyrsti leikur beggja
liða frá því í vetur en gæði leiksins voru engu
að síður með ágætum og líkt og reikna mátti
með í grannaslagnum þá var hvergi gefið eftir.
Gestirnir vestan Vatnsskarðs voru 0-1 yfir í
hálfleik en Stólarnir svöruðu með tveimur
mörkum í síðari hálfleik og slógu því gestina út úr
Mjólkurbikarnum. Lokatölur 2-1 fyrir Tindastól.
Leikurinn fór fjörlega af stað og leikmenn skelltu
sér í kröftugar tæklingar hvar sem því varð við
komið. Og þó kapp væri í mönnum var samt
gaman að sjá og heyra að menn fóru ekki yfir
strikið. Lið Tindastóls sótti meira framan af en
gestirnir voru hættulegir í sóknaraðgerðum
sínum. Það var Hilmar Þór Kárason sem gerði
fyrsta mark leiksins á 18. mínútu eftir hornspyrnu.
Stólarnir reyndu að skerpa á sókninni og Benni
sendi aukaspyrnu í þverslána og tvívegis björguðu
varnarmenn gestanna á síðustu stundu þegar
jöfnunarmarkið virtist blasa við. Staðan 0-1 í
hálfleik.
Jafnræði var með liðunum fyrstu mínúturnar í
síðari hálfleik. Stólarnir settu boltann aftur í
þverslá en K/H fengu þrjú góð færi í sömu
sókninni til að bæta við forystuna en nú varði Atli
Dagur þrívegis af snilld og máttu heimamenn
þakka honum fyrir að lenda ekki í erfiðri stöðu.
Á 72. mínútu lyftist brúnin á Jay McDonough,
þjálfara Tindastóls, þegar Halldór Broddi fylgdi
vel eftir skoti Arnórs Guðjóns að marki gestanna
sem Óli Grétar í markinu náði ekki að fanga.
Staðan jöfn og aðeins fimm mínútum síðar létu
heimamenn kné fylgja kviði. Arnór var keyrður
klaufalega niður rétt utan teigs og Luke Rae, lipur
tvítugur strákur, skoraði laglegt mark beint úr
aukaspyrnunni.
Lið Tindastóls er því komið í 2. umferð
Mjólkurbikarsins sem verður spiluð um næstu
helgi en næstkomandi laugardag fá Stólarnir lið
Samherja úr Eyjafirði í heimsókn. /ÓAB
Hvergi gefið eftir í dag. MYNDIR: ÓAB
Hvað er heim? Ég hef nú flutt
oftar en einu sinni og oftar en
tvisvar og alltaf er ég að fara
heim. Þeir eru samt sterkir
hnútarnir sem æskustöðvarnar
hnýta. Heim hefur líka
alltaf verið í Fjörðinn fagra,
Skagafjörðinn. Þar eru ræturnar,
fjölskyldan, æskuvinirnir og
minningarnar.
Ég hef verið einstaklega
heppin, æskan og unglingsárin
eru bara gleði í minningunni.
Áföllin bönkuðu þó upp á hjá mér
líkt og öðrum bæði sem barn og
unglingur en ég hef lært að dvelja
ekki lengi við leiðindi og erfiðleika
heldur einblína á gleðina. Þessi
áföll hafa bara mótað mig og gert
mig að þeirri manneskju sem ég
er í dag. Minningin um æskuna
einkennist af leik og gleði. Ég
ólst upp í stórum systkinahóp
og á sumrin fylltust herbergi
hússins af sumardvalarbörnum.
Þá var leikið langt fram eftir
kvöldi, alltaf gott veður OG við
fengum kvöldkaffi. Mamma mín
var dugleg að baka ofan í okkur.
Þegar vetur gekk í garð breyttist
leikurinn en áfram var leikið úti.
Í minningunni var alltaf snjór á
veturna og þá var einnig farið á
skauta á vatninu heima í Ási.
Við vorum ekki mörg í
barnaskólanum í Nesinu en þar
var okkur skipt í yngri og eldri
deild. Um fermingaraldurinn
fórum við í Gagnfræðaskólann á
Króknum. Úff, það voru viðbrigði
og fjöldinn í skólanum mikill en
þar byrjaði fjörið. Þar kynntist
ég krökkum sem enn í dag eru
mínir dýrmætustu ferðafélagar
í lífinu. Bekkjarfélögum mínum
tengdist ég tryggðarböndum sem
vara, að ég held, til eilífðar og
mér þykir mikið vænt um þann
hóp. Við höldum enn sambandi
og höfum verið mjög dugleg að
hittast, enda með eindæmum
skemmtilegt fólk.
Oft er sagt að tímarnir breytist
og mennirnir með. Tímarnir hafa
svo sannarlega breyst þrátt fyrir
að sumt sé þó í sömu skorðum.
Ég man eftir mörgu sem yngri
kynslóðir vita jafnvel ekki að hafi
verið eins mikilvægur hlekkur og
reyndist vera. Kaffiterían í Skaffó
var þvílík bylting, Bílasalan var
eins og félagsmiðstöð stundum
og að fá inngöngu í partýin í Villa
Nova gjörbreytti stöðu manns í
samfélaginu, að eigin mati. Þá
varð maður fullorðinn. Böllin í
Bifröst, Miðgarði, Húnaveri og á
Blönduósi, svo ekki sé minnst á
Framsóknarböllin sem voru af allt
öðrum meiði. Þegar ég rifja þetta
upp og segi börnunum mínum frá
þessum tímum líður mér eins og
risaeðlu en mjög hamingjusamri
risaeðlu. Að ég tali nú ekki
um að ég man þegar fyrsti
pizzastaðurinn kom á Krókinn.
Ég vona svo innilega að börnin
mín eignist jafn ánægjulegar
minningar og ég á, kossar á bak
við Bifröst, rómantísk gönguferð
meðfram ánni við Húnaver og
vinkonupiss og trúnó á milli
trjáa við Miðgarð. Mér finnst
sorglegt að börnin mín upplifi
ekki sveitaballastemmninguna
en þau sennilega upplifa eitthvað
annað skemmtilegt.
Skagafjörðurinn á sérstakan
stað í hjarta mínu og þegar ég fer
þangað tala ég um að fara heim.
Heim í minningarnar. Fyrir 26
árum síðan flutti ég á Suðurlandið
og nú er það líka mitt heima. Ég
á tvö börn, Klöru Valgerði sem er
þrítug og það er hægt að finna
slatta af Skagafirðinum í henni.
Sonur minn, Sindri Snær sem er
16 ára er Sunnlendingur í húð og
hár. Þegar þau ná mínum aldri
verður Rangárvallasýslan heim í
þeirra augum. Tímarnir breytast
og óhjákvæmilega breytast
mennirnir með. Munum bara að
njóta tímans og hafa gaman.
Ég skora á partýljónið, Sólrúnu
Fjólu Káradóttur, sem næsta
penna.
ÁSKORANDAPENNINN | palli@feykir.is
Tímarnir breytast
Hrafnhildur Valgarðsdóttir
Brottfluttur Skagfirðingur
Leiðrétting
Hestar og menn
Í síðasta blaði urðu þau mistök að grein frá Sögusetri
íslenska hestsins var ekki rétt merkt. Var hún eingöngu
merkt Kristni Hugasyni, sem vissulega skrifaði greinina, en
vantaði að kenna hana Sögusetrinu sem Kristinn veitir
forstöðu. Beðist er velvirðingar á þessu. /PF

23/2020 5