Kristilegt skólablað - 01.09.1975, Qupperneq 11

Gídeonfélagið er alþjóðleg samtök kristinna
kaupsýslumanna og sérmenntaðra manna úr flest-
um evangeliskum kirkjudeildum heims, með höf-
uðstöðvar í Nashville, Tennessee, Bandaríkjunum.
Gídeonfélagið var stofnað í Bandaríkjum Amer-
íku 1. júlí 1899 af þrem kristnum sölumönnum.
Tildrög að stofnun félagsins voru þau að haustið
1898 kom sölumaður að nafni John H. Nicholson
frá Janesville, Wisconsin til borgarinnar Boscobel
og baðst gistingar á Hótel Central. Að þessu sinni
var gistihúsið fullskipað næturgestum. Það rættist
þó úr þessu vandamáli og hann fékk að vera í
herbereá með öðrum sölumanni, sem hét Samuel
E. Hill.
26 árum áður en þetta bar við hafði John þá 13
ára gamall gefið deyjandi móður sinni það loforð
að lesa dag hvern í Biblíunni. Þegar hann nú var
kominn upp í herbergið og hugðist leggjast til
hvíldar sagði hann við Samuel um leið og hann
tók Biblíuna sína upp úr ferðatöskunni: ,,Ég er
kristinn og það er venja mín að lesa í Heilagri
Ritningu og biðja áður en ég fer að sofa“. Það
gleður mig að heyra svaraði þá Samuel, því ég er
einnig kristinn og þetta er einnig mín venja. Nú
ákváðu þeir að eiga sameiginlega guðræknistund.
Meðan þeir báðu saman fæddist með þeim sú
hugsjón er síðar varð að hinum blessunarríka
veruleika í Gídeonfélaginu sem nú breiðir sig út
um öll lönd og náð hefur fótfestu í 107 þjóðlönd-
um með sívaxandi áhrifum til blessunar þjóðum
og einstaklingum. Þegar þeir skildu morgunin
eftir ákváðu þeir að hittast síðar, sem þeir og
gerðu og stofnuðu Gídeonfélagið ásamt þriðja
sölumanninum, William J. Knight, 1. júlí 1899.
Þeir áttu úr vöndu að ráða hvað viðkom
nafngift félagsins. Vandann lögðu þeir fram fyrir
Guð í bæn. Er þeir höfðu beðið um stund reis
Knight á fætur og sagði: Við skulum kalla okkur
,,The Gideons“, (Gídeonítar.) Síðan opnaði hann
Biblíuna sína og las 6. og 7. kapítula Dómarabók-
arinnar, þar sem segír frá hinum unga Gídeon,
hinni hraustu hetju Guðs.
Brátt breiddist félagið út um öll Bandaríkin.
Árið 1911 var svo félag stofnað í Kanada og síðan
áfram í fleiri löndum heims.
Fyrsta Gídeonfélagið, sem stofnað var utan
Bandaríkjanna og Kanada var Gídeonfélagið á
fslandi, og átti það sér stað 30. ágúst 1945 og er
félagið því 30 ára á þessu ári. Tildrögin að stofnun
félagsins hér á landi eru það merkileg að það er
saga út af fyrir sig sem ekki verður sögð í stuttri
grein sem þessari. Þó er ekki úr vegi að geta þess
að nokkru hér, því til sönnunar, að vegir Guðs eru
órannsakanlegir.
Maður hét Kristinn Guðnason, fæddur austur í
Flóa 1884 og dáinn í California 1958. Kristinn
hafði alist upp sem tökubarn við sult og seyru,
eins og hann sjálfur hefur sagt frá. 16 ára gamall
komst hann með norsku síldveiðiskipi til Noregs.
Um tvítugt ákvað hann að freista gæfunnar í
Ameríku. Meðan hann beið í Kaupmannahöfn
eftir fari til Ameríku kom hann kvöld eitt inn á
hótelið þar sem hann bjó, nokkuð undir áhrifum
víns. Afgreiðslumaður hótelsins ávarpar hann og
segir um leið og augu þeirra mætast: ,,Ungi
maður, þú þarft að gerast kristinn“. Kristinn hélt
svo sannarlega að hann væri það, bæði skírður og
fermdur og þar að auki safnaðarmeðlimur. Þá
rétti maðurinn honum Biblíu og bað hann að lesa
53.kap.Jesaja. Þegar hann svo kom upp í herberg-
ið sitt fór hann að Iesa Biblíuna. Hann las um
þann sem hafði þjáðst vegna synda mannana.
Hann fór aftur niður og bað hótelþjóninn um að
útskýra fyrir sér það sem hann hafði verið að lesa,
sem hann og gerði. Síðan fór hann aftur upp í
herbergið og reyndi að sofna, en gat það ekki fyrir
þeirri hugsun sem á hann sótti, að allt þetta hafði
frclsarinn gjört fyrir hann. Nú fór hann fram úr
rúminu, kraup við það og úthellti hjarta sínu fyrir
Guði, og við það færðist ólýsanlegur friður yfir
hann.
11