Fréttablaðið - 23.11.2007, Blaðsíða 70

38 23. nóvember 2007 FÖSTUDAGUR
tonlist@frettabladid.is
TÓNNINN GEFINN
Steinþór Helgi Arnsteinsson
Hljómsveitin Hjaltalín gefur út frumraun sína á
næstunni, Sleepdrunk Seasons, á vegum plötufyrir-
tækisins Kimi Records frá Akureyri. Níu meðlimir
eru í Hjaltalín og spila þeir á „óvenjuleg“ hljóðfæri á
borð við fagott, klarinett, fiðlu og selló, auk hefð-
bundinna hljóðfæra.
„Við lögðum upp með það í byrjun að reyna að hafa
hljóminn svolítið sérstakan,“ segir Guðmundur Óskar
Guðmundsson úr Hjaltalín. „Við vorum fimm manna
band með hefðbundinni uppstillingu en svo fannst
okkur við ekki geta búið til skemmtilega einstakt
„sánd“ bara við fimm.“
Að sögn Guðmundar bættist í hópinn fólk sem þeir
þekktu úr Menntaskólanum við Hamrahlíð, auk
fagottleikarans Rebekku sem er frá Keflavík. Hjalta-
lín vakti fyrst athygli þegar hún kom fram í Kastljósi
á síðasta ári. Nokkru síðar kom sveitin fram í þætti
Jóns Ólafssonar og þá fór boltinn endanlega að rúlla.
Upptökur á nýju plötunni hófust í byrjun þessa árs og
upphaflega stóð til að gera þröngskífu með fimm til
sex lögum. „Svo breyttist konseptið meira og meira.
Við höfðum það mikið efni þegar upp var staðið að
það var ekkert vit í því að gera þröngskífu ef við
gátum gert breiðskífu,“ segir Guðmundur.
Næstu tónleikar Hjaltalíns verða á tónlistarhátíð-
inni Nokia on Ice sem verður haldin um helgina á
Organ og Gauki á Stöng. Sjöunda desember hitar
sveitin síðan upp fyrir hinn bandaríska kvartett
Akron/Family á Organ. - fb
Einstakur hljómur Hjaltalín
> Plata vikunnar
Bloodgroup - Sticky Situation
★★★★
„Þessi fyrsta plata Bloodgroup er
skemmtilega samsett og dansvæn
rafpoppplata sem einkennist af
flottum lagasmíðum, góðu sándi og
umfram allt miklu stuði.“ TJ
> Í SPILARANUM
Rökkurró - Það kólnar í kvöld …
Daft Punk - Alive 2007
Ellen - Einhvers staðar einhvern tímann … aftur
Sunset Rubdown - Random Spirit Lover
Rufus Wainwright - Rufus Does Judy at Carnegie Hall
RÖKKURRÓ
HJALTALÍN Hljómsveitin Hjaltalín gefur á næstunni út frumraun
sína.
RUFUS WAINWRIGHT
Umræða um íslenska texta í tónlistarmenningu landsins hefur verið
nokkuð hávær að undanförnu. Dagur íslenskrar tungu og dagur
íslenskrar tónlistar kyntu undir þessari umræðu og skemmst er að
minnast orða Dr. Gunna í Bakþönkum í gær. Þar fór Doktorinn ekki
leynt með þá skoðun sína að popparar á Íslandi eigi að semja texta sína
á íslensku og nefna sig íslenskum nöfnum. Nefndi hann sérstaklega
Sprengjuhöllina sem gott dæmi um alvöru íslenska sveit.
Dr. Gunni er reyndar sjálfur gæddur þeim hæfileika að geta samið
frambærileg popplög á íslensku en því miður er staðreyndin sú að
þessi hæfileiki er ekki öllum í blóð borinn. Ef litið er yfir íslenska
dægurlagatexta undanfarna áratugi má nefnilega sjá að mikill
meirihluti textanna er ægilegt fánýti með hnoðkenndu rími. Síðasti
áratugur hefur verið sérstaklega slæmur að þessu leyti. Að semja
lagatexta á íslensku eingöngu til þess að semja lagatexta á íslensku er
þess vegna hugmynd sem mér finnst að ætti að taka með örlítilli varúð.
Ég held líka að það sé nokkuð almennur og víðtekinn misskilningur
að þær íslenskar hljómsveitir sem semji texta sína á ensku geri slíkt
eingöngu með það að markmiði að vinna sigra á erlendri grundu.
Enskan er einfaldlega alþjóðlegt tungumál tónlistar og ég held að það
sé tónlistarfólki eðlislægt að semja texta á ensku, alveg eins og erindi-
viðlag-erindi-viðlag-brú-viðlag er venjan í uppbyggingu á popplagi.
Ég þori samt alveg að viðurkenna að vondir textar á ensku eru alveg
jafn slæmir og vondir textar á íslensku, ef ekki verri. Við skulum þess
vegna halda áfram að hefja upp vegsemd íslenskrar tónlistar á
íslensku en jafnframt njóta tónlistar þeirra sem kjósa engilsaxneskuna
fram yfir okkar ylhýra móðurmál. Bæði má nefnilega gera svo vel þyki
og góð tónlist er einfaldlega í eðli sínu góð,
alveg sama á hvaða tungumáli hún er.
Er svarið alltaf á íslensku?
Ástralska poppdrottningin
Kylie Minogue sendir frá
sér nýja plötu í næstu viku.
X er tíunda hljóðversplata
hennar og sú fyrsta eftir að
hún greindist með brjósta-
krabbamein snemma á ár-
inu 2005. Trausti Júlíusson
tékkaði á Kylie.
Það eru komin tuttugu ár síðan
Kylie Minogue gerði sinn fyrsta
plötusamning. Tuttugu ár eru ekk-
ert sérstaklega langur tími fyrir
rokkstjörnur, djasstónlistarmenn
eða blúshetjur, en það eru ekkert
mjög margar tyggjókúlupopp-
stjörnur sem endast svo lengi.
Kylie fór ekki þessa venjulegu
leið. Hún byrjaði í dauðhreinsaðri
poppverksmiðju Stock, Aitken og
Waterman á níunda áratugnum, en
færði sig með árunum yfir í áhuga-
verðari tónlist. Vinsældirnar hafa
haldist að mestu, en virðingin
fyrir henni hefur aukist mikið.
Það er líka þannig að bestu plöt-
urnar hennar eru ekki elstu plöt-
urnar eins og hjá svo mörgum tón-
listarmönnum sem byrja
eitur ferskir og þynnast svo út með
árunum, heldur þær nýjustu. Á
mánudaginn kemur út ný Kylie
plata, X, sem eins og nafnið gefur
til kynna er hennar tíunda hljóð-
versplata.
Hlé vegna krabbameinsmeðferðar
Síðasta plata Kylie, Body Langu-
age, kom út fyrir fjórum árum.
Hún vakti meðal annars athygli
fyrir smáskífulagið Slow sem
Emilíana Torrini samdi að stórum
hluta, en það fór beint á topp
breska vinsældalistans þrátt fyrir
að vera vægast sagt mjög óvenju-
legt popplag. Í kjölfar plötunnar
fór Kylie í mikla tónleikaferð árið
2005, Showgirl-túrinn.
Þegar hún greindist með
brjóstakrabba var hins vegar síð-
asta hluta tónleikaferðarinnar
frestað þar til eftir uppskurð og
geislameðferð. Eftir vel heppnaða
aðgerð hélt hún tónleikaferðinni
áfram árið 2006.
Vinsældir Kylie eru með ólík-
indum, sérstaklega í Bretlandi og
Ástralíu. Hún fyllti til dæmis
Earls Court Arena sjö kvöld í röð
fyrr á þessu ári og sýning með
ljósmyndum og búningum frá
ferlinum sló öll fyrri aðsóknar-
met bæði í London og Ástralíu þar
sem gestir fóru yfir 500.000.
Frísklegt elektrópopp
Það er erfitt að útskýra vinsældir
Kylie Minogue, en það er augljóst
að hún er harðdugleg og metnaðar-
full í öllu sem hún tekur sér fyrir
hendur. Tónleikarnir hennar eru
vandlega skipulagðar stórsýningar.
Hún leggur mikið upp úr sviðs-
mynd og búningum og eins og
Madonna er Kylie mjög dugleg að
finna sér samstarfsmenn þegar
hún býr til plötur.
X var tekin upp í London, Stokk-
hólmi og á Ibiza. Tónlistin á henni
er létt og frísklegt elektrópopp,
unnið með hópi atvinnumanna úr
poppbransanum.
Svíar eru áberandi, en meðal
upptökustjóra og lagahöfunda má
nefna Bloodshy og Avant (sem
gerðu Toxic með Britney Spears),
Guy Chambers og Kathy Dennis,
Calvin Harris og Kish Mauve sem
samdi fyrsta smáskífulagið 2
Hearts.
Lagið Sensitized vekur líka
athygli, en það er byggt á laginu
Bonnie & Clyde með franska snill-
ingnum Serge Gainsbourg. Auk
plötunnar X er von á nýrri heim-
ildarmynd um Kylie, White
Diamond. Hún er gerð af sam-
starfsmanni hennar til langs tíma,
William Baker, og fjallar um endur-
komu hennar eftir hléið sem hún
gerði á ferlinum fyrir krabba-
meinsmeðferðina og tónleika
hennar í Melbourne í Ástralíu í
desember í fyrra.
Kylie snýr aftur
Rokksveitin Led
Zeppelin, sem
heldur endur-
komutónleika í
London í næsta
mánuði, ætlar í
tónleikaferð á
næsta ári. Þetta
staðfesti Ian Ast-
bury, söngvari
The Cult, á tón-
leikum sveitar-
innar í Bandaríkj-
unum á
dögunum.
„Við komum
aftur á næsta ári
og hitum þá upp
fyrir hljómsveit sem þið ættuð að kannast
við. Nafnið byrjar á L og það er Z í því,“
sagði Astbury og
átti þar við Led
Zeppelin.
Zeppelin hefur
sjálf ekki tilkynnt
um tónleikaferð-
ina en mun lík-
lega gera það á
næstu dögum,
fjölmörgum aðdá-
endum sínum til
mikillar ánægju.
Tuttugu milljón
aðdáendur Zepp-
elin reyndu að fá
miða á tónleika
sveitarinnar í
London en aðeins
tuttugu þúsund voru dregnir út. Verða það
fyrstu tónleikar Led Zeppelin í fjórtán ár.
Led Zeppelin í tónleikaferð
LED ZEPPELIN Rokksveitin Led Zeppelin ætlar í tónleikaferð á
næsta ári.
KYLIE MINOGUE Kann að
velja sér samstarfsmenn.