Morgunblaðið - 03.08.2006, Blaðsíða 15
MORGUNBLAÐIÐ FIMMTUDAGUR 3. ÁGÚST 2006 15
ERLENT
St. Pétursborg. AFP. | Rússneska dag-
blaðið Izvestia fullyrti í gær, að verð-
mæti listmunanna sem hefur verið
stolið úr Hermitage safninu í St. Pét-
ursborg væri 100 milljónir Banda-
ríkjadala, eða sem svarar um 7,2
milljörðum króna. Upphaflega viður-
kenndu starfsmenn Hermitage að
listmunum fyrir fimm milljónir dala
hefði verið stolið en blaðið segir
þjófnaðinn mun alvarlegri og um-
fangsmeiri en áður var talið.
„Verðmæti hlutanna á opnum
markaði er að minnsta kosti tuttugu-
föld sú upphæð,“ segir í Izvestia um
upphaflegt mat starfsmanna safns-
ins. Blaðamenn Izvestia hittu sér-
fræðinga að máli og sýndu þeim lista
yfir munina sem er saknað og byggir
matið á þeirra svörum. Meðal mun-
anna eru tugir helgimynda í gull- og
silfurrömmum, auk skartgripa og
úra.
Blaðið hefur eftir starfsmönnum á
safninu, að þeim hafi verið bannað að
tjá sig um þjófnaðinn eða eiga á
hættu að verða reknir. Þá hefur
Míkhaíl Pjotrovskí, yfirmaður safns-
ins, skellt skuldinni á starfsmenn og
fullyrt að þjófnaðurinn, sem átti sér
stað á nokkrum árum, hefði ekki tek-
ist án aðstoðar þeirra.
Stofnað af Katrínu miklu
Hermitage listasafnið er það
stærsta í heimi og var stofnað af
Katrínu miklu árið 1764 með kaup-
um á málverkum úr safni Johann
Ernest Gotzkowski. Listaverkaeign
þess, sem er dreifð um nokkur
hundruð herbergi, er sögð ómetan-
leg. Þar má finna verk eftir helstu
meistara myndlistarinnar, þeirra á
meðal Michelangelo, Leonardo da
Vinci, Rembrandt og Picasso.
Stálu listmunum fyrir
7,2 milljarða króna
AP
Gestir í stórbrotnum aðalinngangi Vetrarhallarinnar, helstu byggingar Hermitage-safnsins, í St. Pétursborg.
Belgrad. AP. | Læknar í Serbíu náðu fyrr í vikunni í átta
nagla, hníf, penna, skrúfu, skeið, þvottaklemmu og
fleiri smærri hluti úr maga manns.
„Við áttum ekki orð,“ sagði dr. Maja Gulan, sem tók
þátt í aðgerðinni sem gerð var í bænum Uzice, 120 km
frá Belgrad. „Við höfum áður séð fólk sem hefur
gleypt hluti en ekki svona marga,“ bætti hún við.
Læknarnir sögðu að líffæri mannsins hefðu ekki hlotið
skaða af og að hann væri að jafna sig eftir aðgerðina.
Það var áhyggjufullur ættingi mannsins sem hafði
samband við sjúkrahús eftir að hafa séð hann gleypa
hluti.
Með nagla, hníf og penna í maganum
Los Angeles. AFP, AP. | Tony Blair,
forsætisráðherra Bretlands, hefur
hvatt stjórnvöld á Vesturlöndum til
að endurskoða stefnu sína í barátt-
unni við öfgasamtök í heiminum.
Blair segir að í þeirri baráttu þurfi
að leggja jafnmikla áherslu á „mild-
ar“ aðferðir og hernaðarmáttinn.
Blair hvatti til þess að myndað
yrði „bandalag hófsemi“ í baráttunni
við ofstæki sem breiddist út um Mið-
Austurlönd og víðar.
Blair sagði í ræðu á ráðstefnu um
alþjóðamál í Los Angeles í fyrradag
að hann vonaðist til þess að átökum
Ísraelshers og Hizbollah-hreyfing-
arinnar í Líbanon lyki á næstu dög-
um. Um leið og það gerðist þyrftu
Vesturveldin að taka stefnu sína til
gagngerrar endurskoðunar.
„Rök mín eru þessi: Við fáum ekki
sigur í orrustunni við þessa hnatt-
rænu öfgastefnu nema við sigrum á
sviði gildanna ekki síður en valdbeit-
ingar, nema við sýnum að við séum
óhlutdræg, sanngjörn og réttlát þeg-
ar við höfum þessi gildi í frammi í
heiminum.“
„Orrusta sem við
verðum að vinna“
Blair bætti við að mildari aðferðir
– ásamt þeim hernaði sem þegar
hefur verið hafinn – væru nauðsyn-
legar til að berjast gegn öfgastefn-
unni sem breiddist út um Mið-
Austurlönd. „Rök mín eru þau að
það er ekki hægt að vinna þetta stríð
með hefðbundnum hætti.
Við sigrum ekki nema við endur-
metum aðferðir okkar, nema við
blásum nýju lífi í stefnu okkar í
heimsmálunum í víðara samhengi,
baráttunni gegn fátækt og loftslags-
breytingum og fyrir auknum við-
skiptum, og hvað snertir Mið-
Austurlönd, beitum öllum viljakrafti
okkar til að koma á friði milli Ísraela
og Palestínumanna. Og þetta er orr-
ustu sem við verðum að vinna.“
Blair sagði að hernaðurinn í Írak
og Afganistan hefði ekki snúist um
að skipta um stjórn, heldur gildi.
Hann áréttaði stuðning sinn við
stefnu George W. Bush Bandaríkja-
forseta í málefnum þessara tveggja
landa og sagði að ákvörðunin um
hernaðinn eftir hryðjuverkin 11.
september 2001 hefði verið tekin
með það að leiðarljósi að vernda
Bandaríkin og Bretland. „Við hefð-
um einfaldlega getað valið öryggið
sem vígvöll, en gerðum það ekki. Við
völdum gildin. Við sögðum að við
vildum ekki aðra talibanastjórn eða
aðra útgáfu af Saddam. Við gerðum
okkur grein fyrir því … að það er
ekki hægt að sigrast á ofstækisfullri
hugmyndafræði með því einu að
fangelsa eða drepa leiðtogana; við
þurfum að sigrast á hugmyndum
þeirra.“
Blair lét í ljós stuðning við Ísraela
í baráttunni við Hizbollah-hreyfing-
una sem hann sagði hafa átt upp-
tökin að átökunum með því að ögra
Ísraelum. „Markmiðið með þessari
ögrun, sem kom átökunum af stað,
var skýrt. Það var að valda glund-
roða, sundrung og blóðsúthellingum
í því skyni að kalla fram hefnd Ísr-
aela, sem myndu æsa upp araba og
múslíma, ekki gegn þeim sem áttu
upptökin, heldur þeim sem svöruðu
árásinni.“
Blair kvaðst aldrei vilja stofna ör-
yggishagsmunum Ísraela í hættu en
hvatti þá til að friðmælast við Palest-
ínumenn. Nauðsynlegt væri að bæta
aðstæður Palestínumanna og sýna
öfgamönnum fram á að hægt væri að
koma á friði í þessum heimshluta.
Tony Blair hvetur til
„bandalags hófsemi“
gegn ofstækisöflum
Leggur til gagngera endurskoðun á
baráttu Vesturlanda við öfgasamtök
Reuters