Tímarit hjúkrunarfræðinga - 01.02.2013, Blaðsíða 16

Tímarit hjúkrunarfræðinga – 1. tbl. 89. árg. 201312
KJARAKÖNNUN 2012
Cecilie Björgvinsdóttir, cissy@hjukrun.is
Félag íslenskra hjúkrunarfræðinga hefur nú í fjórða sinn gert kjarakönnun meðal
félagsmanna sinna. Í ljós komu áhugaverðar upplýsingar um laun, starfshlutfall
og menntun hjúkrunarfræðinga.
Félag íslenskra hjúkrunarfræðinga stóð fyrir kjarakönnun á
meðal félagsmanna sinna í nóvember 2012. Stærð úrtaksins
var 3.713 hjúkrunarfræðingar, heildarfjöldi svarenda var 665
eða 17,9% en það er betri þátttaka en á fyrri árum og er það
ánægjulegt.
Markmið könnunarinnar var að kanna launakjör hjúkrunar-
fræðinga. Könnunin var lokuð vefkönnun þar sem þátttakendur
fengu sendan póst með aðgangsorði að svarsíðu á netinu.
Samkvæmt könnuninni hækka grunnlaun um 2,5% á milli ára.
Þegar spurt var um eftir hvaða kjarasamningi viðkomandi
starfaði kom í ljós að 84,6% svarenda voru á kjarasamningi
FÍH við fjármálaráðherra, 4% á kjarasamningi við Samband
íslenskra sveitarfélaga, 4,7% voru á kjarasamningi við Samtök
fyrirtækja í heilbrigðisþjónustu, 3,1% á kjarasamningi við
Reykjavíkurborg og 3,6% voru á öðrum kjörum.
15,7% svarenda voru á aldrinum 25-34 ára, 25,9% svarenda
voru 35-44 ára, 27,6% svarenda 45-54 ára og 30,9%
svarenda á aldrinum 55-71 ára.
Þegar spurt var um ábyrgðarsvið í starfi reyndust 65,3%
svarenda vera almennir hjúkrunarfræðingar, 6,3% voru
aðstoðar deildarstjórar, 7,6% deildarstjórar og 8,8% verkefna-
stjórar. Þá voru 2,9% yfirhjúkrunarfræðingar eða hjúkrunar-
forstjórar, 2,6% hjúkrunarstjórar en 6,6% í öðru óskilgreindu
starfi.
Flestir svarendur starfa á höfuðborgarsvæðinu eða 71,3%.
Fyrsta könnun félagsins staðfesti þá tilfinningu að hjúkrunar-
fræðingar hefðu aukið við sig starfshlutfall frá því sem var
2008 en þetta starfshlutfall hefur haldist nær óbreytt frá 2009.
Meðalstarfshlutfall þeirra sem þátt tóku í könnuninni er 82,5%.
Eins ber að geta þess að það er einkar ánægjulegt að sjá
hversu vel menntuð stéttin er eins og sjá má af fjölda þeirra
sem hafa lokið formlegu viðbótarnámi.
Þegar þessi grein er rituð ríkir mikil óánægja á meðal
hjúkrunarfræðinga hvað varðar launakjör og vinnuálag. Það er
mat félagsins að um sé að ræða annars vegar ráðuneytisbundinn
og hins vegar kynbundinn launamun. Þetta má lesa út úr
gögnum á vef fjármálaráðuneytisins þar sem veittar eru
upplýsingar um meðaltalslaun allra starfsmanna ríkisins. Hinn
22. janúar 2013 samþykkti ríkisstjórnin á fundi sínum tillögu
fjármála- og efnahagsráðherra og velferðarráðherra um að
grípa þegar til aðgerða til að minnka launamun kvenna- og
karlahópa og verður það gert áður en endurnýjun miðlægra
kjarasamninga á sér stað. Verið er að vinna að endurskoðun
stofnanasamninga þessa dagana.
Til þess að leiðrétta kjör hjúkrunarfræðinga nú þegar þarf að
endurskoða alla stofnanasamninga, þar sem hjúkrunarfræðingar
starfa, með sérstaka áherslu á betri röðun stéttarinnar inn
í launatöflu. Raunveruleikinn er sá að „vinstra, efra horn“
launatöflunar er sá staður þar sem flestir hjúkrunarfræðingar
raðast nú. Taka þarf meira tillit til menntunar og ábyrgðar í starfi.
Vinna við miðlæga kjarasamninga hefst svo á haustmánuðum
2013 en þeir renna út 2014.
Kannanir af þessu tagi eru félaginu afar mikilvægar svo standa
megi vörð um kjör og réttindi okkar félagsmanna.
Cecilie B.H. Björgvinsdóttir er sviðstjóri kjara- og réttindasviðs
hjá Félagi íslenskra hjúkrunarfræðinga.