Litli Bergþór - 01.07.2016, Blaðsíða 4

4 Litli-Bergþór
Formannspistill
Á aðalfundi Umf. Biskupstungna árið 1969 var samþykkt tillaga,
sem send var til sveitarstjórnar. Tillagan var stutt og hljómaði svona.
„Aðalfundur Umf. Bisk. 1969 telur áríðandi að hafist verði handa á
þessu ári við sundlaugarbyggingu og mannvirki henni viðkomandi.“
Félagsmenn fengu þessa ósk uppfyllta vorið 1972 þegar fyrsta skóflustungan var tekin að
sundlaugarbyggingunni. Framkvæmdir tóku 4 ár og var ekkert til sparað. Það var mikil bót fyrir
sveitina þegar Reykholtslaug var vígð árið 1976 og Tungnamenn eignuðust loksins alvöru sundlaug.
Í 40 ár hefur Reykholtslaug tekið á móti fjölda gesta og hún hefur reynst vel fyrir skólabörn sem þar
hafa lært að synda.
Á aðalfundi Umf. Bisk. 2016, sem haldin var á dögunum var aftur samþykkt áskorun til sveitarstjórnar,
nú um að hafist verði handa um endurbætur á sundlauginni í Reykholti og sundlaugarsvæðinu.
Laugin sjálf og svæðið í kring er farið að láta verulega á sjá og ef ekkert verður að gert gæti
sundlauginni hreinlega verið lokað. Það væri skrýtin staða að í Reykholti þar sem nóg er til af heitu
vatni og fólki, heimafólki sem og ferðamönnum, til að nýta hana, að allt í einu væri engin sundlaug
lengur. Ég vona svo sannarlega að þessi staða komi ekki upp og að við getum tryggt það að hægt sé
að bjóða uppá góða sundaðstöðu fyrir bæði börn og fullorðna í Biskupstungum og að sjálfsögðu fyrir
alla þessa ferðamenn.
Með óskum um gott og farsælt sumar
Smári Þorsteinsson
formaður Umf.Bisk.