Morgunblaðið - 29.05.1979, Síða 17

MORGUNBLAÐIÐ, ÞRIÐJUDAGUR 29. MAÍ 1979
17
Bjartsýni á betri afla
jókst er ísinn hvarf
„Já við erum að íara með nokkur net og ætlum að
reyna að leggja þau. Þá eigum við nokkur net sem verið
hafa í sjó í nokkra daga. Reynum að finna þau og
vonandi er eitthvað í þeim ef þau eru þá bara ekki full
af þara,“ sagði Ragnar Tómasson á Raufarhöfn á
föstudagsmorgun er hann var að leggja í hann á
Sigurvoninni með tengdaföður sínum, Birni Lúðvíks-
syni útgerðarmanni, og eiginkonu, Sigurveigu
Björnsdóttur.
Ragnar sagði að þeir á
Sigurvoninni hefðu orðið
fyrir nokkru netatjóni og
að afli væri lítill enn sem
komið væri, en Sigurvonin,
falleg trilla sem Björn
smíðaði ásamt föður sínum
Lúðvík Önundarsyni fyrir
tæpum tveimur áratugum,
hefur jafnan verið fengsæll
og happasæll bátur.
ísinn, sem fyllti höfnina
á Raufarhöfn og sundin þar
fyrir utan hafði horfið að
mestu leyti um nóttina og
var sjórinn greiðfær er
Sigurvonin lagði upp í
veiðiferð. Að skilnaði sagði
Ragnar að þeir á Sigurvon-
inni væru bjartsýnir á að
eitthvað gæfi í þessari ferð
og af þeim sökum voru
nokkrar tunnur undir
hrogn settar um borð rétt
áður en festar voru leystar
og báturinn brunaði út
höfnina.
Texti: Ágúst Ásgeirsson
Myndir: Kristinn Óiafsson
Ragnar Tómasson leysir
landfestar á Sigurvoninni.

Hafísinn þekur mikinn hluta hafnarinnar á Raufarhöfn, en auður sjór var þó við
athafnabryggjur.
Valur Einarsson og Rósa L. Sigmundsdóttir verka grásleppuhrogn
hjá Karli Ágústssyni.
Aðeins hafa verið verkaðar um 270 tunnur af grásleppuhrognum hjá
Karli Ágústssyni á Raufarhöfn miðað við um 1100 á sama tíma í fyrra.
„Net verða ekki
keypt fyrir samúð”
„Við erum búnir að verka um 270 tunnur núna, en á sama tíma í
fyrra voru þær um 1100 og voru allir hættir veiðum um 25. maí þá.
Það virðist vera mikil grásleppa í sjónum og vel hefur veiðst þegar
gefið hefur. Ég held að menn muni halda veiðum áfram í nokkrar
vikur til viðbótar vegna útkomunnar í vetur og vor. Grásleppan er að
vísu farin að hrygna, en við vonumst samt til að ná um 220—300
tunnum til viðbótar. Sjómenn hafa þó orðið fyrir miklu netatjóni og á
það sjálfsagt eftir að segja til sín, en veiða má grásleppuna fram að
10. júní næstkomandi. „Þannig mælti Karl Ágústsson umsýslumaður
á Raufarhöfn í spjalli við Mbl. á Raufarhöfn á föstudagsmorgun, en
Karl er nú eini verkandi grásleppuhrogna í þorpinu.
„Það er óhætt að segja að
þorpsbúar hafi orðið fyrir miklu
áfalli af völdum hafíssins og
vegna þess tíðarfars sem ríkt
hefur að undanförnu. Hafísnefnd-
' in leit hér við 12. maí og sýndi
mikla samúð, en það dugar lítt við
netakaup. Net verða ekki keypt
fyrir samúð. Nefndin hefði þurft
að koma með peninga, það hefði
verið eina leiðin til að bjarga
málum í svipinn. Sjómennirnir
eyddu öllum sínum peningum og
tóku lán að auki til netakaupa í
vetur. Þeir eiga því flestir í
miklum erfiðleikum sem stendur,"
bætti Karl við.
Karl rekur verzlun á Raufar-
höfn, og sagði hann að vöruþurrð
hefði stundum gert vart við sig.
Þungatakmarkanir á vegum
síðustu daga hefðu sett strik í
reikninginn og skip hefðu ekki
komið til Raufarhafnar frá því um
páska. Sem stæði ætti hann t.d.
engin brauð, þau væru föst inni á
Kópaskeri.
Sagði Karl að ryðja hefði þurft
snjó af vegum í hverri viku í vetur
Karl Ágústsson
svo að mjólk hefði getað borizt til
Raufarhafnar. Sagði hann það
hafa verið reglu að vegir hefðu
verið ruddir á mánudögum en
mjólk flutt á föstudögum. Reynt
hefði þó verið, er líða tók á vetur,
að stilla saman snjómokstur og
mjólkurflutninga. Bílar þeir er
náð hefðu í mjólkina hefðu farið
til Húsavíkur á mokstursdegi, en
þó oft lent í erfiðleikum á baka-
leiðinni daginn eftir. „Það er
öðruvísi á með okkur komið en
flestum öðrum landsmönnum. Við
fáum mjólk aðeins einu sinni í
viku,“ sagði Karl.
„Hundrað ár með
veginn“
„Það bætir ekki úr skák að
vegurinn um Sléttu lokast alltaf ef
eitthvað snjóar. Vegurinn er
örlítið upphækkaður að Sigurðar-
stöðum, en síðustu 20 kílómetr-
arnir eru niðurgrafnir. Miðað við
þróun síðustu ára reiknast okkur
til að það taki akkúrat eitt hundr-
að ár að klára veginn hingað,,,
bætti Karl við. Fróðir menn tjáðu
Mbl. að til stæði að halda áfram
með Sléttuveg í núverandi vegar-
stæði frá Blikalóni, þ.e. meðfram
sjónum, en öllu skynsamlegra
væri áreiðanlega að fara með
hann í næstum beinni línu frá
Blikalóni yfir Sléttu til Raufar-
hafnar. Nóg efni i undirbygg-
inguna væri t.d. að finna í vegar-
stæðinu.